MTENDAJI MAHAKAMA ZA MWANZO AWAFUNDA MADALALI

 Na Faustine Kapama - Mahakama

Mtendaji wa Mahakama Kuu ya Tanzania anayeshughulikia Mahakama za Mwanzo, Bw. Humfrey Paya amewaasa Madalali kote nchini kufanya kazi zao kwa kuzingatia haki na sheria, hasa wanapotekeleza hukumu za Mahakama zinazohusu makundi ya watu wenye mahitaji maalumu ambao ni watoto, walemavu, wanawake na wazee.

Bw. Paya alitoa wito huo Ijumaa tarehe 12 Novemba, 2021 alipokuwa akifungua Mkutano Mkuu wa Chama cha Madalali kwa niaba ya Jaji Kiongozi wa Mahakama Kuu ya Tanzania, Mhe. Mustafa Siyani, kilichofanyika jijini Dar es Salaam.

Alibainisha kuwa kuna utafiti ambao ulifanywa na ndugu marafiki wahisani hasa Benki ya Dunia kuhusu vikwazo mbalimbali juu ya jukumu nyeti la Mahakama ya Tanzania kuhusu utoaji haki sawa kwa wote na kwa wakati, hususani kwenye makundi ya watu wenye mahitaji maalumu.

“Utafiti huo ulibaini kuwa hili ni kundi linaloathirika sana na kutotimizwa kwa wakati au kutokutekelezwa kabisa kwa amri halali za Mahakama kulikosababishwa na udhaifu katika usimamizi wa Madalali wakati huo. Mapendekezo ya utafiti huo yalipekea afua mbalimbali zilizochukuliwa na Mahakama ili kurekebisha hali hii na umuhimu mkubwa uliwekwa kwenu Madalali katika mchakato mzima wa utoaji haki,” alisema.

Kwa mujibu wa Mtendaji huyo, Madalali wa Mahakama ni wadau muhimu sana katika utekelezaji wa jukumu la Mhimili huo ambao ni utoaji wa haki kwa wananchi. Alibainisha pia kuwa Madalali waliosajiliwa ni maafisa wa Mahakama ambao wamepewa jukumu la kutekeleza amri halali za Mahakama.

“Kuthibitisha umuhimu huo, katika Mpango Mkakati wa Mahakama ulioanza 2015/206 hadi 20/21, Mahakama ya Tanzania iliingiza mchakato  wa uboreshaji wa huduma za kundi hili muhimu katika katika mradi wa uboreshaji wa Mahakama kupitia mradi wa huduma zinazomlenga mwananchi” alisema.

Bw. Paya alieleza kuwa mchakato huo ulilenga, pamoja na mambo mengine, kuimarisha kitengo kinachosimamia Mawakili na Madalali katika ofisi ya Msajili wa Mahakama Kuu ili kusimamia na kuratibu shughuli za madalali, lakini pia kuandaa kanuni kuhusu uteuzi, gharama, malipo na nidhamu za Madalali na Wasambaza nyaraka ambapo mchakato huo ulikamilika 2017 baada ya kupata kanuni zilizotolewa na Jaji Mkuu wa Tanzania.

Alibainisha hatua zingine zilizochukuliwa ni kusimamia mchakato wa uanzishaji wa Umoja wa Madalali na Wasambaza nyaraka, kuendesha usaili na mafunzo kwa Madalali na kuhakikisha idadi ya Madalali inaongezeka nchi nzima hadi kufikia 100. “Mpaka tunapomaliza Mpango Mkakati wa Miaka Mitano tulikuwa na Madalali 81, hivyo nasikitika kusema tumeshindwa kufikia lengo hilo,” Bw. Paya aliwaambia wajumbe wa Mkutano huo.

Hatua nyingine iliyochukuliwa, kwa mujibu wa Mtendaji huyo wa Mahakama, ilikuwa kuanzisha mfumo wa kielektroniki wa utambuzi na usimamizi wa Madalali, mpango ambao bado haujawa rasmi, lakini unatarajiwa kukamilika baada ya Chama cha Madalali kupata uongozi.

“Ni dhahili kuwa hadi kufikia tukio la leo majukumu ya Mahakama ya Tanzania kupitia ofisi ya Msajili wa Mahakama Kuu yametekelezwa zaidi ya asilimia 90 na kazi iliyobaki ni yenu kupitia  umoja wenu ambao utaanza kazi rasmi baada ya kupatikana uongozi kupitia uchaguzi wa leo,” alisema.

Katika Mkutano Mkuu huo kulifanyika uchaguzi wa uongozi wa Chama cha Madalali ambapo Bi. Mwamvua Kigulu alichaguliwa kuwa Mwenyekiti, huku Bw. Boniface Buberwa akishika nafasi ya Makamu Mwenyekiti. Viongozi wengine ni Bw. Hilary Ligate aliyechaguliwa kuwa Katibu, Bi. Jesca Masawe kuwa Katibu Msaidizi na Bw. Benson Swai alishika nafasi ya Mweka Hazina na Bw. Mark Msilu kuwa Mweka Hazina Msaidizi.

Mtendaji huyo wa Mahakama alitumia nafasi hiyo kuwaasa viongozi hao wapya kulinda kwa nguvu zao zote umoja wa chama hicho, waelewe katiba na kanuni zilizopo na kuwa mfano wa kuigwa katika masuala mazima ya maadili ya kazi na kukemea vitendo vya utovu wa nidhamu, rushwa na uzembe wa wanachama katika utekelezaji wa majukumu yao kwa ujumla.

Mtendaji wa Mahakama Kuu ya Tanzania anayeshughulikia Mahakama za Mwanzo, Bw. Humfrey Paya akisisitiza jambo alipokuwa akifungua Mkutano Mkuu wa Chama cha Madalali uliofanyika jijini Dar es Salaam Ijumaa tarehe 12 Novemba, 2021.

Mkuu wa Kitengo cha Madalali Mahakama Kuu ya Tanzania, Mhe. Richard Kabate akielezea jambo wakati wa Mkutano Mkuu wa Madalali uliofanyika jijini Dar es Salaam Ijumaa tarehe 12 Novemba, 2021.

Wajumbe wa Mkutano Mkuu wa Chama cha Madalali wakifuatilia hotuba ya ufunguzi kutoka kwa  Mtendaji wa Mahakama Kuu ya Tanzania anayeshughulikia Mahakama za Mwanzo, Bw. Humfrey Paya (hayupo kwenye picha)

Mwenyekiti wa Chama cha Madalali, Bi. Mwamvua Kigalu akiwahutubia wajumbe wa Mkutano Mkuu (hawapo katika picha)

Mtendaji wa Mahakama Kuu ya Tanzania anayeshughulikia Mahakama za Mwanzo, Bw. Humfrey Paya akiwa katika picha ya pamoja na viongozi wa Chama cha Madalali na wajumbe wa sekretarieti katika Kitengo cha Madalali Mahakama Kuu ya Tanzania baada ya kufungua Mkutano Mkuu wa Chama cha Madalali Ijumaa tarehe 12 Novemba, 2021 jijini Dar es Salaam. Waliokaa kushoto ni Mwenyekiti wa Chama cha Madalali, Bi. Mwamvua Kigalu na kushoto ni Makamu Mwenyekiti Bw. Boniface Buberwa. 

Sehemu ya wajumbe wa Mkutano Mkuu wa Chama cha Madalali uliofanyika Ijumaa tarehe 12 Novemba, 2021 jijini Dar es Salaam wakiwa katika picha ya pamoja na mgeni rasmi (aliyekaa katikati).

Kundi jingine la wajumbe wa Mkutano Mkuu wa Chama cha Madalali wakiwa katika picha ya pamoja na mgeni rasmi (aliyekaa katikati) pamoja na viongozi wa Chama cha Madalali baada ya kufungua mkutano huo.

Mtendaji wa Mahakama Kuu ya Tanzania anayeshughulikia Mahakama za Mwanzo, Bw. Humfrey Paya (aliyekaa katikati) akiwa katika picha ya pamoja na wajumbe wengine wa Mkutano Mkuu wa Madalali pamoja na viongozi wa Chama cha Madalali.