MTENDAJI MKUU WA MAHAKAMA KUSHIRIKIANA NA IJA

 Na Rosena Suka - Lushoto

Mtendaji Mkuu wa Mahakama ya Tanzania, Prof. Elisante Ole Gabriel ameahidi kushirikiana na Chuo cha Uongozi wa Mahakama Lushoto (IJA) ili kiweze kutekeleza majukumu yake kikamilifu, ikiwemo kutoa wahitimu bora watakaolisaidia taifa katika maeneo mbalimbali ya maendeleo.

Prof. Ole Gabriel, ambaye ni Katibu wa Tume ya Utumishi wa Mahakama alitoa ahadi hiyo katika ziara ya Tume iliyofanya katika Chuo hicho hivi karibuni kutembelea maeneo mbalimbali, likiwemo Jengo la Hostel ya Wavulana ambalo linajengwa kwa kugharamiwa na Mahakama ya Tanzania katika mpango wa uboreshaji wa majengo chuoni hapo.

Kwa upande wake Mwenyekiti wa Baraza la Uongozi la Chuo, Mhe. Dkt. Gerald Ndika, ambaye ni Jaji wa Mahakama ya Rufani aliupongeza uongozi wa Chuo kwa jitihada zake inazozifanya katika kutoa mafunzo yanayolenga kuwajengea uwezo watumishi mbalimbali wa Mahakama ya Tanzania.

Katika ziara hiyo, ambayo ni mwendelezo wa shughuli mbalimbali zinazofanyika kuelekea siku ya mahafali ya ishirini na moja ambayo inafanyika tarehe 12 Novemba, 2021, Prof. Ole Gabriel ameambatana na Makamishna mbalimbali wa Tume ya Utumishi wa Mahakama.

Wajumbe wa Tume hiyo pia walipata nafasi ya kukutana na  menejimenti ya Chuo ambapo walifanya majadiliano yaliyolenga kuboresha huduma zinazotolewa na chuo hicho.  Katika kikao hicho, Katibu wa Tume hiyo ambaye ni Mtendaji Mkuu wa Mahakama alitoa salamu kwa niaba ya wajumbe wa Tume hiyo.

Prof. Elisante aliiambia Menejimenti  kwamba Chuo kina wajibu mkubwa kwa Mahakama ya Tanzania na Taifa kwa ujumla katika kutoa elimu ambayo italeta matokeo chanya kwa taifa sio tu kwa kufaulu katika mitihani mbalimbali bali kutoa wanafunzi waliobora ambao wanaweza kufanya kazi popote na katika mazingira yoyote.

1.  Jaji wa Mahakama ya Rufani na Mkuu wa Chuo cha Uongozi wa Mahakama Lushoto, Mhe. Dkt. Paul Faustine Kihwelo akifungua majadiliano ya wajumbe wa Tume ya Utumishi ya Mahakama na Menejimenti ya Chuo yaliyofanyika Chuoni Lushoto hivi karibuni.

  Baadhi ya wajumbe wa Tume ya Utumishi ya Mahakama wakipatiwa maelezo ya kitabu cha mwongozo wa Mahakimu wa Mahakama za Mwanzo kutoka kwa msimamizi wa kitengo cha Maktaba cha Chuo, Bw. Faridi Sechonge (aliyesimama katikati). 

  Mtendaji Mkuu wa Mahakama ya Tanzania, Prof. Elisante Ole Gabriel akitoa maelekezo kwa mafundi wanaojenga jengo la hostel ya wavulana wakati wa ziara ya Makamishina wa Tume ya Utumishi ya Mahakama katika Chuo cha Mahakama Lushoto hivi karibuni.

Wajumbe wa Tume ya Utumishi ya Mahakama wakiwa katika picha ya pamoja na wanachuo wa Stashashada ya Sheria mwaka wa pili walipotembelea hivi karibuni katika Chuo cha Uongozi wa Mahakama Lushoto.