Na Faustine Kapama – Mahakama, Dodoma
Jaji Mkuu wa Tanzania, Mhe. Prof.
Ibrahim Hamis Juma, leo tarehe 26 Januari, 2022 ameweka jiwe la msingi kwenye jengo
la Makao Makuu ya Mahakama ya Tanzania yanayojengwa katika eneo la Tambuka Reli
jijini Dodoma.
Akizungumza katika hafla hiyo, Mhe.
Prof. Juma ameishukuru Serikali la Jamhuri ya Muungano wa Tanzania kwa kutenga
kiasi kikubwa cha fedha cha zaidi ya billioni 129 za Kitanzania ili kufanikisha
mradi wa ujenzi huo.
“Napenda kumshukuru Rais wa Jamhuri
ya Muungano wa Tanzania kwa kuendelea kuiwezesha Mahakama kuweza kufikia katika
hatua hii. Billioni 129 ni uwezeshaji mkubwa na tutaendelea kuuthamini siku
zote,” alisema katika hafla hiyo iliyohudhuriwa na viongozi mbalimbali wa
Mahakama na Serikali.
Kwa mujibu wa Jaji Mkuu, kwa sasa
jengo la Makao Makuu ya Mahakama linalojumuisha Mahakama ya Upeo (Supreme
Court), Mahakama ya Rufani na Mahakama Kuu (Majila Kuu) ambalo lipo katika eneo
la mita za mraba 60, 000 linaonesha hatua nzuri iliyofikiwa, hivyo hakutakuwa
na sababu yoyote ya kuacha kuhamia Dodoma wakati utakapofika.
Hivyo, amewataka Majaji, Mahakimu na
watumishi wote wa Mahakama kuanza kujiandaa kisaikolojia kwa ajili ya kuhamia
Makao Makuu, huku akibainisha kuwa taarifa ya Matendaji Mkuu wa Mahakama, Prof.
Elisante Ole Gabriel inaonyesha shughuli za ujenzi zikamilika ifikapo Desemba
2022.
“Sasa tumefikia katika hatua ambayo
kuhamia Dodoma hakukwepeki. Waheshimiwa Majaji tuanze kujitayarisha kisaikolojia,
kama kujifunza lugha ya Kigogo tuanze kujifunza ili tuweze kujumuika na
wananchi katika jiji hili kubwa la Dodoma,” ameseama.
Jaji Mkuu amesema kuwa muda wa kuwa
tayari kukamilioka kwa ujenzi unafahamika, hivyo aliomba matayarisho ya kutoa
huduma kuanza sasa. “Kuna mambo mengi ambayo yanatakiwa kufanyiwa kazi sasa,
siyo wakati jengo limekamilika ndiyo uanze kutafuta thamani na watumishi. Kwa
hiyo matayarisho yaanze mapema ili kama tunaaza shughuli hapa baada ya siku ya
sheria mwakani, basi hizo shughuli zianze,” amesema.
Amewashukuru wajenzi wanaosimamia
ujenzi huo kwa hatua kubwa na ajabu iliyofikiwa na pia mihimili miwili ya
Serikali na Bunge kwa kuendelea kuivumilia Mahakama kuendelea kubali Dar es
Salaam katika kipindi chote cha matayarisho ya ujenzi na makazi ya Majaji
yakiwa yanaendeelea.
Mhe. Prof. Juma amebainisha pia kuwa
gharama iliyotumika katika mradi huo ni kubwa, hivyo akawataka watumishi wote
wa Mahakama kulilinda na kulitunza jengo hilo ili liweze kutumika kwa muda
mrefu na pia kwa manufaa ya wananchi kwa ujumla.
Hafla ya kuweka jewe la msingi
katika jengo la Makao Makuu ya Mahakama ya Tanzania imehudhuriwa na viongozi
mbalimbali wa Mahakama, akiwemo Jaji Kiongozi wa Mahakama Kuu ya Tanzania, Mhe.
Mustapher Siyani, Majaji mbalimbali wa Mahakama Kuu, Mtendaji Mkuu wa Mahakama
ya Tanzania, Prof. Elisante Ole Gabriel, Msajili Mkuu wa Mahakama ya Tanzania,
Mhe Wilbert Martin Chuma pamoja na maafisa wengine waandamizi wa Mahakama.
Baadhi ya viongozi kwa upande wa
Serikali waliohudhuria waliongozwa na Waziri wa Sheria na Katiba, Mhe. George
Simbachawene na Naibu Waziri, Mhe. Geofrey Pinda, Mwanasheria Mkuu wa Serikali,
Mhe. Jaji Dkt Eliezer Mbuki Feleshi, Naibu Waziri wa Mambo ya Ndani, Mhe.
Jumanne Sagini, Katibu Mkuu Wizara ya Katiba na Sheria, Bi. Mary Makondo, Naibu
Katibu Mkuu wa Wizara hiyo, Dkt Khatibu Kazungu na Mkurugenzi wa Mashtaka
(DPP), Bw. Sylvester Mwakitalu.
Akizungumza katika hafla hiyo, Jaji
Kiongozi Siyani amesema kuwa uwekaji wa jiwe la msingi wa jengo hilo hata kabla
ya kukamilika kwake unatoa picha halisi ya uwekezaji mkubwa uliofanywa na
Serikali, jambo ambalo lilisubiriwa siyo tu na watumishi wa Mahakama bali pia
wananchi na wadau wote wa sheria nchini.
Amesema kuwa licha Dodoma kuwa Makao
Makuu ya nchi, Mahakama ya Tanzania bado haina majengo yake maalumu kwa ajili
ya Makao Makuu ambapo kumekuwepo na maafisa wengi mbalimbali wa Mahakama
hulazimika kusafiri kutoka Dar es Salaam kwenda Dodoma katika shughuli za
kiserikali zinazohusisha mihimili mingine, jambo ambalo limekuwa likiongeza
gharama za ofisi.
“Ni matumaini yangu kuwa kujengwa
kwa jengo hili linalokusudiwa kutumika kama Makao Makuu ya Mahakama hapa Dodoma kutaiwezesha Mahakama
kuwa karibu na kuungana na mihimili mingine ya Serikali na hivyo kurahisisha
mawasiliano na utendaji wa kazi baina yetu,” amesema Mhe. Siyani.
Jaji Kiongozi amebainisha
pia kuwa uwekaji huo wa jiwe la msingi ni hatua nyingine katika uboreshaji unaoendelea
katika Mahakama ya Tanzania ambayo ni matokeo ya mikakati iliyojiwekea kama
Taasisi kupitia Mpango Mkakati wa Mahakama wa Miaka Mitano (2015/16 – 2019/20),
ambao mwaka huu umehuishwa kupitia Mpango Mkakati wa Mahakama wa Miaka Mitano (2020/21
– 2024/25), na Mpango wa Miaka Mitano wa Maendeleo ya Miundombinu ya Mahakama (2016/17
– 2020/21), ambao nao upo katika mchakato wa kuhuishwa, ili kukamilisha ujenzi
wa mioundombinu unaoendelea sehemu mbalimbali pote nchini.
Kwa upande wake, Mhe.
Simbachawene ameipongeza Mahakama ya Tanzania kwa usimamizi mzuri wa miradi ya
maendeleo ambayo imekuwa ya mfano. “Maeneo ambayo mnayasimamia na hasa kwenye
miradi, kwa kweli mingi ni ya mfano, tunawapongeza sana,” amesema.
Amebainisha kuwa majengo
mengi ambayo ataanza kuyatembelea wiki ijayo yanaonekana ni ya mfano. Kwa
mujibu wa Waziri huyo, pamoja na kuwa na jukumu la kusimamia haki, Mahakama pia
ina watu wazuri ambao wanaweza kusimamia miradi yao, hivyo alimpongeza Mtendaji
Mkuu wa Mahakama kwa kusimamia vizuri kazi hizo.
Mhe. Simbachawene
amebainisha pia kuwa Serikali ya Awamu ya Sita inayoongozwa na Rais wa Jamhuri
ya Muungano wa Tanzania, Mhe, Samia Suluhu Hassan inayo dhamira na
haijabadilisha chochote katika mwelekeo wa kuhakikisha Serikali kwa ujumla wake
inahamia Dodoma na uwekezaji kubwa unaofanyika ndani ya Mahakama ya Tanzania ni
ishara kwa vitendo vya kuonyesha dhamira hiyo.
Hakuna maoni:
Chapisha Maoni