WATENDAJI KATA WA DAR ES SALAAM WAJENGEWA UWEZO KUHUSU MIGOGORO YA KIFAMILIA

 

 Na Magreth Kinabo- Mahakama

Jaji Mfawidhi wa Mahakama ya Tanzania Kanda ya Dar es Salaam   Mhe. Amir Mruma leo tarehe 27 Januari, mwaka 2022 amefungua mafunzo ya elimu ya sheria kwa watendaji wa kata wa mkoa wa Dar es Salaam ili kuwajengea uwezo wa kutatua migogoro ya kijamii kama vile ndoa, talaka na mirathi.

Akizungumza na watendaji kata hao, katika ukumbi wa Manispaa ya Temeke, Jaji Mruma alisema elimu hiyo, imetolewa ikiwa ni mwendelezo wa Maadhimisho ya Wiki ya Sheria katika kanda hiyo.

‘‘Nyie ni wadau wetu wa Mahakama, pia ni walinzi wa amani katika maeneo yenu, sisi na nyie tunafanya kazi ya kuhakikisha nchi yetu ina amani, hivyo tutaendelea kushirikiana,’’ alisema Jaji Mruma.

Jaji Mruma aliongeza kwamba hivi sasa Mahakama inatoa haki kwa njia ya mtandao, hivyo haitarudi nyuma, bali itatengeneza mfumo wa kuweza kuwasiliana na nyie.

Kwa upande wake Hakimu Mkazi Mwandamizi, Mhe. Ramadhani Rugemalila, alisema wametoa mafunzo hayo ili kuweza kuwafanya watendaji hao kuwa wasuluhishi wazuri juu ya migogoro hiyo inayoibuka katika jamii kupitia barazala usuluhishi. Mafunzo hayo yamehusisha watendaji kata zaidi ya 100.

Naye Jaji Mfawidhi wa Kituo Jumuishi cha Utoaji Haki (IJC)cha masuala ya kifamilia, Mhe. Ilvin Mugeta, akitoa mada ya Sheria ya Ndoa  alisema ni vizuri watendaji hao kuwa wasiri, wasio na upendeleo,na kuzingatia maadili ,ikiwemo kutopokea rushwa wanapoifanya kazi hiyo ya usuluhishi.

Jaji Mugeta pia aliwataka watendaji hao kuzingatia ujazaji mzuri wa fomu namba tatu ya usuluhishi, pale baraza la usuluhishi linaposhindwa kutatua mgogoro wa ndoa.

Akizungumzia kuhusu IJC Jaji Mugeta alisema tangu kianzishwe tarehe 27 Agosti kimeshapokea mashauri 2,044, hivyo aliwataka watu wenye migogoro kuhusu masuala ya ndoa wafike katika kituo ili kuweza kupata haki.

Jaji Mfawidhi wa Mahakama ya Tanzania Kanda ya Dar es Salaam   Mhe. Amir Mruma leo tarehe 27 Januari, mwaka 2022 amefungua mafunzo ya elimu ya sheria kwa watendaji wa kata wa mkoa wa Dar es Salaam. 

(picha na maktaba)