Na. Faustine Kapama-Mahakama, Songea.
Jaji
Mkuu wa Tanzania, Mhe. Ibrahim Hamis Juma leo tarehe 3 Machi, 2022 amemaliza
ziara yake ya kikazi ya siku nne ya Mahakama, Kanda ya Songea kwa kutembelea Mahakama
ya Mwanzo Songea, Mahakama ya Wilaya Songea, Mahakama ya Hakimu Mkazi Songea na
Mahakama Kuu Songea kabla ya kuongea na watumishi kwenye kikao cha majumuisho
na kuahidi kuchukua hatua zitakazosaidia kurahisisha utoaji wa haki kwa
wananchi.
Baadhi
ya hatua hizo ni kuzitazama Mahakama za Mwanzo kwa jicho la kipekee kibajeti,
kuimarisha miundombinu mbalimbali katika ngazi zote ikiwemo ujenzi wa majengo ya
Mahakama, hususani Kituo Jumuishi cha Utoaji Haki na kushughulikia changamoto
mbalimbali zinazowakabili watumishi kwa lengo la kuimarisha ufanisi kazini. Aidha,
Mhe. Prof. Juma amewapongeza watumishi wote katika Kanda hiyo kwa kufanya kazi kwa
bidii, uaminifu na kutoa haki kwa wananchi kwa wakati.
Akiwa
katika Mahakama hizo, Jaji MKuu alipokea taarifa za utendaji kutoka kwa Mahakimu
Wakazi Wafawidhi, kabla ya kupata taarifa jumuishi iliyotolewa na Jaji Mfawidhi
wa Mahakama Kuu ya Tanzania, Kanda ya Songea katika Mkoa wa Ruvuma, Mhe. Sekela
Moshi.
Katika taarifa yake iliyosheheni mambo mengi, Mhe. Moshi amesema,
pamoja na mambo mengine, “Mkoa wa Ruvuma unasimamiwa na Mahakama Kuu moja,
Mahakama ya Hakimu Mkazi Songea moja, Mahakama za Wilaya tano (Songea, Nyasa,
Namtumbo, Mbinga na Tunduru) na Mahakama za Mwanzo 47 katika utekelezaji wa
majukumu ya Mahakama katika utoaji haki kwa wananchi. Kati ya Mahakama za
Mwanzo 47, zinazofanya kazi ni 35.”
Akizungumzia usikilizaji wa mashauri, Jaji Mfawidhi huyo amemweleza
Jaji Mkuu kuwa katika ngazi ya Mahakama Kuu kati ya Januari na Desemba 2021
mashauri 214 yalifunguliwa, mashauri 233 yaliamuliwa na yaliyobaki yalikuwa 94,
wakati katika kipindi cha Januari hadi Februari, 2022 mashauri 23
yamefunguliwa, yaliyoamuliwa ni 32 na yaliyobaki ni 85.
Amesema katika ngazi ya Mahakama ya Hakimu Mkazi, kati ya Januari na Desemba mwaka 2021 yalifunguliwa mashauri
32, yaliyoamuliwa yalikuwa 40 na yaliyobaki yalikuwa 36, ambapo katika kipindi
cha Januari na Februari 2022, mashauri
yaliyofunguliwa yalikuwa sita, yaliyoamuliwa ni mashauri nane na yaliyobaki yalikuwa 34, huku mashauri mawili
yakionekana ni ya mlundikano.
Kwa upande wa Mahakama za Wilaya, Mhe. Moshi amesema kuwa kati Januari
na Desemba mwaka 2021 yalifunguliwa jumla
ya mashauri 1,048, yaliyoamuliwa yalikuwa 969 na yale yaliyobaki ni 479, wakati
katika kipindi cha Januari na Februari 2022, jumla ya mashauri ambayo yamefunguliwa
ni 132, yaliyoamuliwa ni 127 na yamebaki mashauri 510.
Hata hivyo, Jaji Mfawidhi huyo amemweleza Mhe. Prof. Juma kuwa Mahakama
Kanda ya Songea ina mashauri mengi ya uhujumu uchumi kutokana na baadhi ya Wilaya
kuzungukwa na Hifadhi ya Taifa ya Julius Nyerere (zamani ikiitwa Selous Game
Reserve) na kwamba Kanda hiyo inapakana na nchi jirani, jambo linalosababisha wahalifu
kuingia nchini pamoja na mashahidi na washtakiwa kukimbilia kwenye nchi hizo.
“Tumejiwekea mikakati mbalimbali ya kuhakikisha mashauri ya muda
mrefu mahakamani yanaisha na kuzuia mlundikano (Backstopping). Mikakati hiyo ni
usikilizwaji mfululizo na kuahirisha kwa muda mfupi mashauri yaliyokaa muda
mrefu, kuwa na kikao maalum cha kuondosha
mashauri ‘special clean up session’ kila baada miezi miwili,” amesema.
Mhe. Moshi ametaja mikakati mingine ni kupanga mashauri mengi ya
kusikiliza kupitia kwa Majaji waliopo na Mahakimu wanne wenye mamlaka ya ziada
waliopo (extended jurisdiction), kuwa na vikao vya Kamati za Kusukuma Mashauri
ya jinai (Case Flow Management Meetings) na Kamati za Kusukuma Mashauri ya
madai (BenchBar Management Meetings).
Katika
kikao hicho cha majumuisho, Jaji Mkuu alitoa fursa kwa watumishi wa kada zote
kueleza changamoto zinazowakabili wakati wanapotekeleza majukumu yao ambapo
viongozi walioambatana naye katika ziara yake waliweza kutoa ufafanuzi wa hoja
zilizoibuliwa na kuamsha furaha kutoka kwa watumishi hao mara kwa mara kufuatia
majibu mazuri na ya kina yaliyotolewa.
Kabla
ya kutembelea Mahakama hizo, Mhe. Prof. Juma alitembelea Ofisi ya Mkuu wa Mkoa
wa Ruvuma ambapo alipokelewa na Mkuu wa Wilaya ya Songea, Mhe. Pololet Mgema na
kufanya naye mazungumzo mafupi. Mkuu huyo wa Wilaya amemhakikishia Jaji Mkuu
kuwa Serikali katika Mkoa huo itaendelea kushirikiana na Mahakama katika
kutatua changamoto mbalimbali zilizopo ili kuharakisha utoaji wa haki kwa
wananchi.
Katika ziara yake ya siku nne, Jaji Mkuu alitembelea maeneo
mbalimbali, ikiwemo Wilaya ya Songea, Mbinga, Nyasa, Namtumbo na Tunduru.
Katika maeneo yote aliyopitia, Mhe. Prof. Juma amekagua shughuli mbalimbali za
kimahakama, ujenzi wa miundombinu pamoja na kuongea na watumishi wa kada zote.
Jaji Mkuu aliambatana na viongozi mbalimbali kutoka Makao Makuu,
wakiwemo Msajili Mkuu wa Mahakama ya Tanzania, Mhe. Wilbert Chuma, Msajili wa
Mahakama ya rufani, Mhe. Kevin Mhina, Mtendaji wa Mahakama ya Rufani, Bw. Solanus
Nyimbi na Mtendaji wa Mahakama Kuu ya Tanzania, Bw. Leonard Magacha.
Wengine ni Mkurugenzi wa Ukaguzi wa Huduma za Kimahakama,
Malalamiko na Maadili, Mhe. Annah Magutu, Mkurugenzi Msaidizi wa TEHAMA wa
Mahakama ya Tanzania, Bw. Machumu Essaba, Katibu wa Jaji Mkuu Adrean Kilimi,
Katibu wa Msajili Mkuu, Bw. Jovin Constantine, Mkurugenzi wa Rasilimali Watu na
Utawala, Bi Beatrice Patrick na mwakilishi wa Chama Cha Majaji na Mahakimu
Tanzania, Mhe. Nemes Mombury.
Kwa upande wa Mahakama Kuu ya Tanzania, Kanda ya Songea, yupo Jaji
Mfawidhi, Mhe. Sekela Moshi, Naibu Msajili, Mhe. Warsha Ng’umbu, Mtendaji wa
Mahakama Kuu wa Kanda, Bw. Geofrey
Mashafi, Hakimu Mkazi Mfawidhi wa Mahakama ya Songea, Mhe. Livin Lyakinana, Afisa
Utumishi, Bw. Brian Haule, Mhasibu, Bw. Japhet Komba na Afisa TEHAMA, Bi.
Catherine Francis.
Mtendaji wa Mahakama ya Rufani, Bw. Solanus Nyimbi akijibu moja ya hoja zilizoibuliwa na watumishi katika kikao hicho.
Hakuna maoni:
Chapisha Maoni