WADAU WA MAHAKAMA KIGOMA WAUNGA MKONO MATUMIZI YA TEHAMA

Na Festor Sanga- Mahakama Kuu Kigoma

Shirika la Umoja wa Mataifa la Kuhudumia Wakimbizi (UNHCR) kupitia ofisi ndogo ya Kigoma limetoa vifaa vya kielektroniki kwa lengo la kuunga mkono jitihada za zinazofanywa na Mahakama Kuu ya Tanzania Kanda ya Kigoma kuelekea Mahakama Mtandao ili kuwezesha utoaji wa huduma za haki kwa wakati na kwa wote.

Vifaa vilivyopokelewa na Mahakama hiyo katika hafla iliyofanyika hivi karibuni ni seti tatu za kompyuta-Desktop, Printer tatu (Multifunctional) na UPS tatu.  

Akikabidhi vifaa hivyo kwa uongozi wa Mahakama hiyo, Mwakilishi wa UNHCR ofisi ndogo ya Kigoma Bw. Peter Muriyuki alisema kuwa wakimbizi wananufaika na huduma zitolewazo na Mahakama hivyo wameona ni vyema kuunga mkono juhudi za uboreshaji ili kurahisisha huduma za utoaji wa haki.

“Tunatambua kuwa mahitaji ya huduma ya haki yameongezeka kutokana na uwepo wa kambi za wamkimbizi za Nduta- Kibondo na Nyarugusu-Kasulu hivyo tumeona tuunge mkono uboreshaji unaoendelea ndani ya Mahakama hususan, matumizi ya Teknolojia ya Habari na Mawasiliano (TEHAMA) ili huduma za Mahakama ziweze kutolewa kwa wakati.Tutaendelea kuunga mkono jitihada hizo kwa kutoa vifaa vya TEHAMA, mafunzo na maeneo mengine ya ushirikiano” alisema Bw. Muriyuki.

Wakati huohuo, Mahakama hiyo ilikabidhi vifaa vya TEHAMA zikiwemo Laptop mbili (2) kwa Uongozi wa Gereza la Kwitanga (Kigoma) na Ilagala (Uvinza) ili kuwezesha usikilizaji wa mashauri kwa njia ya mtandao.Vifaa hivyo vilivyonunuliwa na Mahakama ikiwa ni mwendelezo wa mkakati wa ndani wa kuhakikisha kila gereza linakuwa na huduma ya usikilizaji wa mashauri kwa njia ya mtandao.

Awamu ya kwanza Mahakama hiyo, ilitoa vifaa kama hivyo katika Magereza ya Kasulu na Kibondo na kufanya hadi sasa Magereza yote matano katika Kanda kuwa na uwezo wa kusikiliza mashauri kwa njia ya matandao.

Akitoa neno la shukrani kwa niaba ya Uongozi wa Magereza Mkoa, Kamishna Msaidizi wa Magereza Bw. Edwin Kusiluka alisema kuwa kupatikana kwa vifaa hivyo kutatua malalamiko ya wafungwa wanaotoka nje ya Mkoa wa Kigoma ambao wako Magereza ya Kwitanga na Ilagala (Magereza ya Kilimo) ambao awali walilazimika kusafirishwa kwenda Gereza la Bangwe ambalo lina miundombinu wezeshi kwa mifumo ya TEHAMA kwenda kusikiliza rufaa za kesi zao kwa njia ya Mtandao.

“Tunaishukuru Mahakama kwa vifaa hivi tulivyokabidhiwa. Vifaa hivi vitasaidia katika utoaji wa haki kwa wakati,kupunguza gharama za kutoa wafungwa Gereza la Kwitanga na Ilagala hadi Kigoma na kuongeza utulivu na amani magerezani, hivyo tunaahidi kutoa ushirikiano na kuunga mkono juhudi za uboreshaji huo kuelekea Mahakama Mtandao,” alisema Kusiluka.

Naye Jaji Mfawidhi wa Mahakama Kuu ya Tanzania Kanda ya Kigoma Mhe. Jaji Lameck Mlacha aliushukuru uongozi wa UNHCR ofisi ndogo ya Kigoma kwa kuunga mkono jitihada zinazofanywa na Mahakama kuelekea Mahakama Mtandao.

Aidha alitoa rai kwa Uongozi wa Magereza kupaza sauti ya pamoja ili uboreshaji unaoendelea ndani ya Mahakama uende sambamba na uboreshaji wa magereza kimiundombinu ili kuruhusu matumizi ya TEHAMA.

Jaji Mfawidhi wa Mahakama Kuu ya Tanzania Kanda ya Kigoma, Mhe. Jaji Lameck Mlacha(kushoto) akipokea baadhi ya vifaa vya TEHAMA kutoka kwa Mwakilishi wa Shirika la Umoja wa Mataifa la Kuhudumia Wakimbizi UNHCR ofisi ndogo ya Kigoma Bw. Peter Muriyuki (katikati) na kulia ni Bi Rehema Msami wa UNHCR.

Jaji Mfawidhi wa Mahakama Kuu ya Tanzania Kanda ya Kigoma Mhe. Jaji Lameck Mlacha (kushoto)akimkabidhi kompyuta mwakilishi kutoka Gereza la Ilagala Inspekta Mangole.

Wadau wa Mahakama na watumishi wakimsikiliza Jaji Mfawidhi wa Mahakama Kuu ya Tanzania Kanda ya Kigoma Mhe. Jaji Lameck Mlacha (hayupo pichani)

Kamishna Msaidizi wa Jeshi la Magereza Edwin Kusiluka akitoa neno la shukrani kwa niaba ya Uongozi wa Jeshi la Magereza Mkoani Kigoma.

Jaji mfawidhi wa Mahakama Kuu kanda ya Kigoma Mhe Jaji Lameck Mlacha(wa pili kulia) pamoja na Mwakilishi wa UNHCR Ofisi Ndogo ya Kigoma Bw. Peter Muriyuki( wa pili kushoto) wakiweka sahihi hati ya makabidhiano. Wa Kwanza kulia ni Hakimu Mkazi Mfawidhi wa Mahakama ya Hakimu Mkazi Kigoma Mhe. Rose Kangwa na wa kwanza kushoto ni Bi Rehema Msami kutoka UNHCR wakishuhudia tukio hilo la uwekaji sahihi hati ya makabidhiano.

(Picha na Festor Sanga- Mahakama Kuu Kigoma)