JAJI MTULYA AHIMIZA UTAMBUZI, ULINZI MAENEO YA MAHAKAMA

 Na. Francisca Swai – Mahakama, Musoma

Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya amewaasa watumishi mahakamani kulinda mipaka ya maeneo ya Mahakama ili kuepusha kuvamiwa na wananchi.

Akiwa katika siku ya pili ya ziara yake ya kikazi kukagua shughuli mbalimbali za kiutendaji za kimahakama, Mhe. Mtulya amesisitiza utambuzi wa mipaka yote ya Mahakama katika Kanda hiyo na kuwahimiza viongozi wa maeneo husika kuweka alama stahiki.

Amemwelekeza Mtendaji wa Mahakama Kuu, Kanda ya Musoma, Bw. Festo Chonya kutayarisha mpango maalumu wa kuweka alama tambuzi za kudumu katika maeneo yote ya Mahakama licha ya baadhi ya maeneo kuwa na mipaka ya miti pamoja na katani.

Aidha, Jaji Mfawidhi huyo amewasisitiza Mahakimu na watumishi wote kufanya kazi kwa bidii, hususani kuyapa kipaumbele mashauri ya ndoa, talaka na mirathi kwa vile yana athari za moja kwa moja katika familia.

Katika ziara hiyo, Mhe. Jaji Mtulya alitembelea na kujionea Mahakama mbalimbali ikiwemo Mahakama ya Mwanzo Mcharo na Mugeta zinazofanya kazi katika Ofisi za Tarafa katika maeneo yao na Mahakama ya Mwanzo Mugumu inayotumia jengo la Halmashauri ya Wilaya ya Serengeti.

Alibainisha kuwa Mahakama zote hizo tayari zina maeneo maalumu kwa ajili ya ujenzi wa Mahakama mpya za kisasa kupitia mradi wa Benki ya Dunia.

Kadhalika, Mhe. Mtulya alipata nafasi ya kutembelea Mahakama ya Mwanzo Robada ambayo ni ya kisasa iliyopo katika eneo la Hifadhi ya Mbuga ya Serengeti katika kijiji cha Robanda, umbali wa Kilometa 45 kutoka Serengeti mjini (Mugumu).

Jaji Mfawidhi huyo amempongeza Hakimu Mkazi Mfawidhi wa Mahakama hiyo, Mhe. Akinyi Mlowa kwa kufanya kazi kwa bidii licha ya kuwa katika mazingira hatarishi yanayozungukwa na wanyama wakali wa aina mbalimbali.

Akitoa taarifa ya hali ya usalama mbele ya Mhe. Mtulya, Hakimu Mlowa  alisema sehemu ambayo Mahakama yake imejengwa inazungukwa na milima na mapori ambayo ni makazi ya wanyama kama vile tembo, simba, nyoka, nyani, tumbili na wengine.

Hakimu huyo alielezea hatari inayomkabili katika utekelezaji wa majukumu yake ikiwemo uvamizi wa wanyama hao mahakamani hapo, ambapo siku za hivi karibuni kumekuwepo na uvamizi wa simba. Hata hivyo, Mhe. Mlowa alimweleza Jaji Mfawidhi huyo kuwa Mlinzi wa kibarua, Bw. Omary Marongori  amekuwa msaada mkubwa katika kukabiliana na wanyama hao.

Naye Mtendaji wa Kijiji hicho, Bw. Jumanne Kiriba alisema hivi karibuni uvamizi wa Simba wanaoshambulia mifugo ya wananchi umeongezeka na kwa kushirikiana na Taasisi ya Utafiti wa Wanyamapori Tanzania (TAWIRI) walifanikiwa kuwakamata watatu ingawa tishio la usalama bado ni kubwa.

Muonekano wa jengo la Mahakama ya Mwanzo Robanda iliyopo katika hifadhi ya Mbuga ya Serengeti.

Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya (kulia) akikabidhi vitendea kazi kwa watumishi wa Mahakama ya Mwanzo Mugumu Mjini. 

Hakimu Mkazi Mfawidhi wa Mahakama ya Wilaya Serengeti, Mhe. Jacob Ndira (aliyesimama) akipokea maelekezo kutoka kwa Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya alipotembelea Mahakama hiyo.

Hakimu Mkazi Mfawidhi wa Mahakama ya Mwanzo Mcharo, Mhe. Godfrey Simbeye (aliyesimama) akisoma taarifa ya utendaji kazi mbele ya Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya. 

Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya (wa tatu kushoto) akikagua eneo linalohifadhi majala ya miaka ya nyuma 1990, 1980 na kadhalika yaliyopo Mahakama ya Mwanzo Natta. Amemwelekeza Naibu Msajili wa Mahama Kuu, Kanda ya Musoma, Mhe. Frank Moshi kufuatilia utaratibu wa namna ya kuyaondoa majalada hayo.

Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya (kulia) akiongea na watumishi wa Mahakama ya Mwanzo Mugumu Mjini akiwemo Hakimu Mkazi Mfawidhi wa Mahakama hiyo, Mhe. Felix Ginene pamoja (aliyavaa t-shirt nyekundu).