KAMATI YA MAWAKILI MKOANI KAGERA YAZINDULIWA

 Na Ahmed Mbilinyi- Mahakama, Bukoba

Kaimu Jaji Mfawidhi wa Mahakama Kuu ya Tanzania, Kanda ya Bukoba, Mhe. Angaza Mwipopo hivi karibuni alizindua Kamati ya Mawakili ya Mkoa wa Kagera na kuhimiza wajumbe kutekeleza majukumu yao kwa kuzingatia weledi na maadili ya hali ya juu.

Uzinduzi wa Kamati hiyo inayojulikana kwa Kiingereza kama ‘Kagera Regional Advocate Committee’ ulifanyika ofisini kwa Mhe. Mwipopo katika jengo la mahakama Kuu mjini Bukoba.

Jaji huyo aliwasisitiza wajumbe wa Kamati hiyo kufanyakazi kwa weledi na kutenda haki bila upendeleo kwa kuzingatia moja ya majukumu ya kamati ni kupokea malalamiko ya wateja yanayohusu huduma za uwakili wanazopokea kutoka kwa Mawakili.

Mhe. Mwipopo aliongeza kuwa kazi ya Wakili sio tu kufanya biashara bali pia ni huduma muhimu ambayo inatakiwa kutolewa kwa maadili ya hali ya juu na weledi mkubwa.

 “Fanyeni majukumu yenu kwa mujibu wa sheria, msiende nje ya mipaka yenu,” alisema Jaji Mwipopo.

Kamati hiyo inaundwa na wajumbe mbalimbali wakiwemo Msajili wa Mahakama Kuu, Kanda ya Bukoba, Mhe. Odira Amworo, ambaye ni Mwenyekiti na Wakili wa Serikari Mwandamizi kutoka Ofisi ya Mwanasheria Mkuu wa Serikari, Mhe. Nestory Nchimani, ambaye ndiye Katibu wa kamati.

Wajumbe wengine wa Kamati hiyo ni Wakili wa Serikari Mwandamizi Ofisi ya Taifa ya Mashtaka, Mhe. Juma Masanja na Mwenyekiti wa Chama cha wanasheria Mkoa wa Kagera, Mhe. Peter Matete.

Kaimu Jaji Mfawidhi Mahakama Kuu Kanda ya Bukoba Mhe. Angaza Mwipopo akisisitiza jambo wakati wa uzinduzi wa Kamati ya Mawakili ya Mkoa wa Kagera.

Kaimu Jaji Mfawidhi wa Mahakama Kuu ya Tanzania, Kanda ya Bukoba, Mhe. Angaza Mwipopo (wa tatu kushoto) akiwa katika picha ya pamoja na Wajumbe wa Kamati ya Mawakili ya Mkoa wa Kagera aliyoizindua hivi karibuni.