JAJI MTULYA AMALIZA ZIARA YAKE, APONGEZA WATUMISHI

 Na. Francisca Swai – Mahakama, Musoma

Jaji Mfawidhi wa Mahakama Kuu, Kanda ya Musoma, Mhe. Fahamu Mtulya amemaliza ziara yake ya kikazi kutembelea shughuli mbalimbali za kimahakama na kuwapongeza watumishi wote kwa kuendelea kuchapa kazi licha ya ugumu wa mazingira na changamoto mbalimbali zinazowakabili.

Akizungumza na watumishi wa Mahakama ya Hakimu Mkazi na Mahakama ya Wilaya Musoma katika kikao cha majumuisho siku ya mwisho, Mhe. Mtulya amesema katika ziara yake amejifunza mambo mengi, ikiwemo moyo wa kujituma na uchapaji kazi kwa bidiii kwa watumishi wote wa Mahakama.

“Nimejionea ubunifu mkubwa uliofanywa na watumishi ili kuboresha mazingira ya kazi, utunzaji wa mazingira, ukarabati wa majengo, utajiri mkubwa wa ardhi na ulinzi wa mipaka ya maeneo ya Mahakama, ushirikiano mlionao kati ya Mahakama, wadau na viongozi wa kiserikali,” amesema.

Mhe. Mtulya aliwaasa watumishi kuwa huru kutoa maoni, mapendekezo na kueleza changamoto zinazowakabili kwa viongozi ili waweze kushirikiana kuzitatua kwa pamoja.

Alisema kwa kufanya hivyo kila mmoja wao atakuwa ametimiza wajibu wake katika kuboresha mazingira ya kazi, kuleta ufanisi na kuisaidia Mahakama kufikia malengo yake kikamilifu katika kumhudumia mwananchi.

Katika kikao hicho, Mhe. Mtulya, alimtaka Naibu Msajili wa Mahakama Kuu, Kanda ya Musoma, Mhe. Frank Moshi pamoja na Mtendaji wa Kanda hiyo, Bw. Festo Chonya kushirikiana na kuhakikisha shughuli za usikilizwaji wa mashauri zinafanyika bila vikwazo vyovyote.

Aidha, Jaji Mfawidhi huyo alimpongeza Bw. Chonya kwa jitihada anazofanya ndani ya Kanda kuboresha majengo ya Mahakama licha ya ufinyu wa bajeti, ikiwemo uboreshaji wa kuridhisha wa nyumba ya kufikia Majaji iliyoko Tarime.

Mhe. Mtulya alimsisitizia Mtendaji huyo kuendelea na mpango uliopo wa kukarabati Mahakama zingine, kuweka alama tambuzi kulinda mipaka ya maeneo yote ya Mahakama na kuhakikisha hati miliki za maeneo hayo zinapatikana.

Hata hivyo, Jaji Mfawidhi huyo alimtaka Bw. Chonya kushughulikia changamoto za watumishi kwa wakati na kuwasilisha Makao Makuu zile zinazohitaji utekelezaji wa juu zaidi hasa za watumishi wanaokaribia kustaafu.

Katika siku hiyo ya mwisho, Mhe. Mtulya alimtembelea Mkuu wa Wilaya ya Butiama, Mhe. Moses Kaegele na baadaye kufanya ukaguzi wa gereza la Musoma ambapo alipata nafasi ya kuongea na wafungwa na mahabusu.

Jaji Mfawidhi wa Mahakama Kuu, Kanda ya Musoma, Mhe. Fahamu Mtulya (wa nne kutoka kushoto) akiwa katika picha ya pamoja na watumishi wa Mahakama, Afisa Tarafa ya Kiagata Bi, Levina Julius (wa pili kushoto) na Mtendaji wa Kata ya Mangemange, Bw. Kizito Kahaga (aliyesimama nyuma). Viongozi hao wameridhia Mahakama kuendesha huduma zake katika jengo la Ofisi ya Tarafa baada ya paa la Mahakama ya Kiagata kuezuliwa kutokana na mvua yenye upepo mkali iliypokuwa ikinyesha mwezi Desemba 2021.

Hakimu Mkazi Mfawidhi wa Mahakama ya Hakimu Mkazi Musoma, Mhe. Erick Marley (wa pili kulia) pamoja na baadhi ya watumishi wa Mahakama hiyo wakipokea kwa furaha vitendea kazi kutoka kwa Jaji Mfawidhi wa Mahakama Kuu, Kanda ya Musoma, Mhe. Fahamu Mtulya baada ya kikao cha majumuisho ya ziara yake.

Jaji Mfawidhi wa Mahakama Kuu, Kanda ya Musoma, Mhe. Fahamu Mtulya akisikiliza kwa makini maelezo ya utendaji kutoka kwa Hakimu Mkazi Mfawidhi wa Mahakama ya Mwanzo Zanaki, Mhe. Tumaini Mkongi. 

Hakimu Mkazi Mfawidhi wa Mahakama ya Mwanzo Kiagata, Mhe. Kenedy Mwaikambo akisoma taarifa ya utendaji kazi mbele ya Jaji Mfawidhi wa Mahakama Kuu, Kanda ya Musoma, Mhe. Fahamu Mtulya.

Mlinzi wa Mahakama ya Mwanzo Zanaki, Bw. Albinus John Simeo, akimuonesha Jaji Mfawidhi wa Mahakama Kuu, Kanda ya Musoma, Mhe. Fahamu Mtulya jengo lililotumika kama nyumba ya Chifu Wanzagi aliyekuwa akiamua migogoro mbalimbali ya wananchi wa eneo hilo la Zanaki/Muryaza kabla ya kuanzishwa Mahakama ya Zanaki mwaka 1964.