MAWAKILI WATAKIWA KUWA NA HOFU YA MUNGU

 Na Emmanuel Oguda-Mahakama, Shinyanga

Jaji Mfawidhi Mahakama Kuu ya Tanzania, Kanda ya Shinyanga, Mhe. Athuman Matuma amewataka Mawakili wa Serikali na wale wa Kujitegemea kuwa na hofu ya Mungu na kuzingatia maadili wanapotekeleza wajibu wao kuwezesha wananchi kupata haki zao kwa wakati.

Mhe. Matuma alitoa wito huo hivi karibuni kwenye kikao kazi kilichowaleta pamoja wadau wa Mahakama kutoka katika Kanda hiyo, wakiwemo Mawakili wa Serikali na Mawakili wa Kujitegemea. Kikao hicho kilichofanyika katika jengo la Mahakama Kuu Shinyanga.

Aidha, Jaji Mfawidhi huyo aliwataka Mawakili wote kuzingatia Sheria na kuheshimu viapo vyao ili wasiwe chanzo cha wananchi kutopata haki zao za msingi kwa wakati ambazo wanastahili.

“Wapo baadhi ya Mawakili wamekuwa ni chanzo cha uvunjaji wa haki za wananchi kwa maslahi yao binafsi. Napenda asitokee Wakili katika Kanda yetu ya Shinyanga atakayekuwa chanzo cha uvunjaji wa maadili kwa kutomtenda haki anayostahili kupata mwananchi,” alisema Jaji Matuma.

Mhe. Matuma pia aliwasisitiza wadau waliohudhuria kikao hicho kutoshiriki vitendo vya rushwa ambavyo kimsingi ni chanzo kikuu cha ukosefu wa haki kwa wananchi na kuwahimiza Mawakili kuwa na dhamira ya kweli katika kutenda haki bila kumuonea mtu yeyote.

Kadhalika, Jaji Mfawidhi huyo aliwasisitiza Mawakili wote kutokuwa chanzo cha kuahirisha mashauri mahakamani pasipokuwa na sababu za msingi na zenye ushawishi, huku akimtaka kila mmoja kuhakikisha anatunza kumbukumbu za tarehe za mashauri yake.

Alisema kuwa utaratibu huo utaepusha mgongano wa tarehe, jambo linalopelekea mashauri kuahirishwa mara kwa mara na kuongeza mrundikano mahakamani. “Kuahirisha shauri mara kwa mara hupelekea kuwa na mlundikano mahakamani, hali inayosababisha wananchi kuchelewa kupata haki zao kwa wakati,” alisema.

Mhe. Matuma pia aliwasisitiza Mawakili hao kufika mahakamani kwa muda uliopangwa wa kuanza kwa shughuli za Mahakama ili kuwezesha kila shauli kuanza kusikilizwa kwa wakati.

Kwa upande mwingine, Jaji Mfawidhi huyo aliwasisitiza maafisa wanaotoa msaada wa kisheria kwa wananchi wajulikanao kama ‘Paralegals’ kufanya kazi zao za msingi kama inavyotakiwa na siyo vinginevyo.

Alibainisha kuwa wapo baadhi yao wamekuwa wakifanya kazi za uwakili na kusahau majukumu yao ya msingi ya kutoa msaada wa kisheria ambayo wameelekezwa kwa mujibu wa sheria inayowaongoza.

Naye Naibu Msajili wa Mahakama Kuu, Kanda ya Shinyanga, Mhe. Hussein Mushi amewasisitiza  wadau wote wa Mahakama kufanya kazi kwa ushirikiano wa karibu na Mahakama ili kutimiza lengo la utoaji haki kwa wakati.

Wadau waliohudhuria kikao kazi hicho ni kutoka Ofisi ya Wanasheria Mkuu wa Serikali, Wenyeviti wa Mabaraza ya Ardhi, Maafisa wa Baraza la Usuluhishi, Mawakili wa Kujitegemea, Maafisa kutoka Vituo vya Msaada wa Kisheria, Maafisa Ustawi wa Jamii pamoja na Maafisa Huduma kwa Jamii kutoka Kanda ya Shinyanga.

Washiriki hao walipongeza kikao kazi hicho kwani kitaleta matokeo chanya katika kufikia lengo la Mahakama la utoaji haki kwa wakati. Wadau hao wameomba Mahakama kuendelea kuwa na vikao kazi hivyo kwa ajili ya kufanya tathmini ya utendaji kazi katika kufikia lengo la utoaji haki sawa kwa wote na kwa wakati.

Jaji Mfawidhi Mahakama Kuu ya Tanzania, Kanda ya Shinyanga, Mhe. Athuman Matuma (katikati) akiongea na wadau wa Mahakama wakati wa kikao kazi kilichofanyika hivi karibuni. Kushoto ni Jaji wa Mahakama Kuu kutoka Kanda hiyo, Mhe. Seif Kulita na kulia ni Mtendaji wa Mahakama Kuu, Kanda ya Shinyanga, Bi. Mavis Miti.

Jaji wa Mahakama Kuu, Kanda ya Shinyanga, Mhe Seif  Kulita (katikati) akisisitiza jambo wakati wa kikao kazi hicho.

Naibu Msajili wa Mahakama Kuu, Kanda ya Shinyanga, Mhe Hussein Mushi (aliyesimama) akifafanua jambo wakati wa kikao kazi cha wadau wa Mahakama.

Mwendesha Mashtaka wa TAKUKURU Shinyanga, Bw. Sengoka Mndambi akichangia hoja wakati wa kikao kazi kilichofanyika Mahakama Kuu Shinyanga.

Sehemu ya Mawakili wakimsikiliza kwa makini Jaji Mfawidhi wa Mahakama Kuu, Kanda ya Shinyanga, Mhe Athuman Matuma (hayupo katiia picha) wakati wa kikao kazi kilichofanyika katika jengo la Mahakama Kuu Shinyanga.

(Picha na Na Emmanuel Oguda-Mahakama, Shinyanga)