TUME YA UTUMISHI WA MAHAKAMA YAWATAKA MAHAKIMU NA WATENDAJI KUTOCHELEWESHA MASHAURI

 Na Lydia Churi-Mahakama, Tanga

Tume ya Utumishi wa Mahakama imewaagiza Mahakimu na watendaji wote nchini kutochelewesha mashauri mahakamani bila ya sababu za msingi.

Akizungumza na Waandishi wa Habari wakati akihitimisha ziara ya wajumbe wa Tume ya Utumishi wa Mahakama mwishoni mwa wiki mjini Tanga, Kaimu Mwenyekiti wa Tume huyo, Jaji wa Mahakama ya Rufani Mhe. Dkt. Gerald Ndika amesema Mahakama inakabiliwa na changamoto ya mashauri kutomalizika kwa wakati mahakamani changomoto ambayo pia inasababishwa na upelelezi wa mashauri kutokamilika kwa haraka.

“Tumewashauri wadau husika wakatafakari vizuri ili shauri linapofikishwa mahakamani upelelezi wake uwe umekamilika na siyo kuletwa na kuegeshwa mahakamani kusubiri upelelezi”, alisema Jaji Ndika.

Alisema katika ziara ya wajumbe wa Tume ya Utumishi wa Mahakama baadhi ya wadau waliishauri Mahakama ya Tanzania kuhakikisha kuwa suala la utoaji haki linapewa uzito unaostahili kwa kuwa lina uhusiano mkubwa na usalama wa taifa  katika ngazi zote yaani wilaya, Mkoa na Taifa.

Akifafanua kuhusu ziara ya Tume hiyo katika mikoa ya Pwani, Morogoro na Tanga, Dkt. Ndika alisema mojawapo ya mikakati ya Tume ya kufahamu hali halisi ya utendaji kazi wa Mahakama ya Tanzania ni kufanya ziara katika mikoa mbalimbali ambazo zinaiwezesha kutoa elimu kwa Umma kupitia wajumbe wa Kamati za Maadili za Maafisa wa Mahakama pamoja na wadau muhimu wa utoaji haki.

Alisema katika ziara hiyo, Tume imefanikiwa kupata maoni, ushauri na kufikisha elimu iliyokusudiwa baada ya kukutana na wajumbe wote wa Kamati za Maadili za mikoa ya Pwani, Morogoro na Tanga pamoja na wilaya zake.

Kuhusu msongamano wa mahabusu magerezani, ilionekana kuwa wakati Mahakama ikiendelea na jitihada za kujenga majengo, upo umuhimu wa wadau wa Mahakama kuendelea kujenga Magereza ili kupunguza msongamano.  

Tume ya Utumishi wa Mahakama imeundwa na Ibara ya 112 (1) ya Katiba ya Jamhuri ya Muungano wa Tanzania ya mwaka 1977. Aidha, majukumu ya Tume yameelezwa kwenye katiba hiyo katika Ibara ya 113 (1) ikisomwa pamoja na kifungu cha 29 cha Sheria ya Uendeshaji wa Mahakama Na. 4 ya mwaka 2011. Tume ya Utumishi wa Mahakama ni chombo cha Kikatiba kilichopewa jukumu la kusimamia uendeshaji wa Mahakama ya Tanzania.

Kaimu Mwenyekiti wa Tume huyo, Jaji wa Mahakama ya Rufani Mhe. Dkt. Gerald Ndika akizungumza na Waandishi wa Habari mara baada ya kumalizika kwa ziara ya Tume ya Utumishi wa Mahakama mjini Tanga. Kushoto ni Katibu wa Tume hiyo ambaye pia ni Mtendaji Mkuu wa Mahakama ya Tanzania Prof. Elisante Ole Gabriel na kulia ni Jaji Mfawidhi wa Mahakama Kuu kanda ya Tanga Mhe. Latifa Mansoor. 

Mwanasheria Mkuu wa Serikali ambaye ni Kamishna wa Tume ya Utumishi wa Mahakama Mhe. Dkt. Eliezer Mbuki Feleshi akizungumza wakati wa Mkutano wa Tume na Wadau wa Mahakama. Kulia ni Jaji Kiongozi wa Mahakama Kuu ya Tanzania na Kamishna wa Tume Mhe. Mustapher Siyani.

Sehemu ya Wajumbe wa Kamati za Maadili ya Maafisa wa Mahakama Mkoa wa Tanga pamoja na wilaya zake wakiwa kwenye Mkutano wa Tume uliomalizika mwishoni mwa wiki mjini Tanga.

Sehemu ya Wajumbe wa Kamati za Maadili ya Maafisa wa Mahakama Mkoa wa Tanga pamoja na wilaya zake wakiwa kwenye Mkutano wa Tume uliomalizika mwishoni mwa wiki mjini Tanga.