UJUMBE BENKI YA DUNIA WATEMBELEA UJENZI MAHAKAMA ZA BUTIAMA, RORYA

 Na. Francisca Swai – Mahakama, Musoma

Ujumbe wa Benki ya Dunia jana tarehe 29 Machi, 2022 ulitembelea na kukagua maendeleo ya miradi ya ujenzi wa Mahakama za Wilaya Rorya na Butiama mkoani Mara zinazojengwa kwa ufadhili wa benki hiyo.

Katika ukaguzi wa miradi hiyo inayotarajiwa kukamilika tarehe 12 Aprili, 2022, ujumbe huo ulionesha kuridhishwa na hatua iliyofikiwa katika ujenzi na kumsisitiza mkandarasi wa miradi hiyo ‘United Builedrs’ kuongeza kasi katika hatua zilizobaki ili ujenzi uweze kukamilika ndani ya wakati.

Ujumbe huo ambao waliambatana na baadhi ya watumishi wa Mahakama ya Tanzania wakiongozwa na Naibu Msajili wa Mahakama Kuu ya Tanzania kutoka Kitengo cha Uboreshaji wa Huduma za Mahakama, Mhe. Sekela Mwaisege ulipata nafasi ya kutembelea Mahakama Kuu Musoma na kusalimiana na Jaji Mfawidhi wa Mahakama, Kanda ya Musoma, Mhe. Fahamu Mtulya.

Akiongea na ugeni huo, Jaji Mtulya aliwashukuru kwa kutembelea ujenzi wa Mahakama hizo mbili za Wilaya pamoja na kuendelea kufadhili miradi ya ujenzi wa Mahakama mbalimbali nchini, jambo linalosaidia kuboresha taswira na mtazamo kwa wananchi kuhusu huduma za Mahakama.

Aidha, Mhe. Mtulya alisisitiza kukamilisha miradi hiyo kwa wakati na kwa ubora unaotakiwa.  Alisema umalizaji mzuri wa ujenzi unaozingatia ubora utasaidia kuepuka usumbufu kwa watumiaji wa majengo hayo ya kisasa hasa katika suala zima la mifumo ya umeme na maji.

Ugeni huo katika ukaguzi wa miradi yote miwili ya Mahakama ya Wilaya ya Rorya na Butiama uliongozwa na Mtendaji wa Mahakama Kanda ya Musoma, Bw. Festo Chonya.

Jaji Mfawidhi wa Mahakama Kuu, Kanda ya Musoma, Mhe. Fahamu Mtulya (wa sita kulia) akiwa katika picha ya pamoja na ujumbe wa Benki ya Dunia ulioongozwa na Bw. Benjamin Mtesigwa (wa sita kushoto) pamoja na watumishi toka Makao Makuu ya Mahakama ya Tanzania, waliongozwa na Naibu Msajili wa Mahakama Kuu ya Tanzania kutoka Kitengo cha Uboreshaji wa Huduma za Mahakama, Mhe. Sekela Mwaisege (katikati). Ugeni huo katika ukaguzi wa miradi yote miwili ya Mahakama ya Wilaya ya Rorya na Butiama uliongozwa na Mtendaji wa Mahakama Kanda ya Musoma, Bw. Festo Chonya (wa tano kushoto).