Na. Faustine Kapama-Mahakama, Songea.
Ziara
ya kikazi ya kimahakama, Kanda ya Songea anayofanya Jaji Mkuu wa Tanzania, Mhe.
Prof. Ibrahim Hamis Juma imeingia siku ya tatu ambapo leo tarehe 2 Machi, 2022
ametembelea Mahakama ya Wilaya Tunduru na kuwasifu watumishi wa Mahakama hiyo
na Mahakama za Mwanzo kwa kutekeleza majukumu yao kikamilifu, ikiwemo kutoa
haki kwa wakati.
Akiongea
na watumishi wa kada mbalimbali kutoka katika Mahakama hizo, Jaji Mkuu amesema
kuwa watumishi kwa sasa wamebadilika kitabia na kimtazamo, hatua iliyotokana na
faida kubwa ambayo imepatikana kutoka kwenye uboreshaji wa huduma za
kimahakama. Amesema kuwa utoaji wa huduma unaotolewa na watumishi wa Mahakama
wa leo ni tofauti kabisa.
Mhe.
Prof. Juma amewaomba watumishi hao kuendelea kusimamia zile nguzo tatu ambazo
zimesaidia mabadiliko yaliyopo, ikiwemo nguzo ya kwanza ambayo ni Utawala Bora,
Uwajibikaji na Usimamizi wa Rasilimali. Jaji Mkuu amebainisha kuwa kumekuwepo
na uwajibikaji mzuri na utumiaji wa rasilimali ndogo iliyopo uliopelekea kutoa
haki kwa mafanikio makubwa.
Vile
vile, aliwaomba watumishi hao kuendelea kusimamia nguzo ya pili ya kutoa haki
kwa wakati ambapo taarifa ya utendaji iliyowasilishwa na Hakimu Mfawidhi wa
Mahakama hiyo, Mhe.Cosmas Kando imeonesha jinsi walivyoshiriki katika kutoa haki
kwa wakati na pale haki imechelewa haikuwa ni makosa yao. Aliwaeleza nguzo
nyingine ya tatu ambayo pia ni muhimu ni kuendelea kuaminiwa na wananchi.
“Leo
asubuhi nimeongea na Mkuu wa Wilaya, amewasifu sana. Ana imani kubwa na
Mahakama na amesema malalamiko yanayopelekwa kwake hayatokani na watumishi wa
Mahakama, yanatokana na upelelezi na uendeshaji wa mashauri ambayo hayapo
kwenye eneo lenu. Kwa hiyo, mwelekeo wenu wa kuhakikisha imani inaendelea
kuimarishwa ni muhimu katika shughuli za kila siku,” amesema.
Kadhalika,
Jaji Mkuu aliwapongeza watumishi hao kwa namna walivyoshiriki kwenye eneo
jingine la matumizi ya Teknolojia ya Habari na Mawasiliano (TEHAMA) baada ya
kubaini lugha yao kwa sasa ni asilimia 100 ya mashauri kusajiliwa kwa njia ya
mtandao.
“Hiyo
ni hatua ambayo ni ya kupongezwa kwa sababu tayari mpo katika barabara ya
matumizi ya TEHAMA ambayo tunaelekea kwenye Mahakama Mtandao. Hilo ndiyo lengo
letu, ifikapo mwaka 2025 tuweze kufanya shughuli zetu zote kupitia mitandao na
nyinyi mpo katika nafasi nzuri zaidi kufika safari hiyo,” alisema.
Kabla
ya kuongea na watumishi hao wa Mahakama, Mhe, Prof. Juma alikutana na Mkuu wa
Wilaya ya Tunduru, Mhe. Julius Mtatiro na kufanya naye mazungumzo mafupi ambapo
alibainisha kuwa mlundikano uliopo kwenye Mahakama ya Wilaya ya Tunduru
unatokana na mashauri ambayo Mahakama haina mamlaka.
Alisema
kuwa mashauri hayo yamechelewa kutokana na kutokamilika kwa upelelezi, hatua
ambayo inasababisha ule mzigo kushindwa kuutua na kuupeleka Mahakama Kuu ambayo
ndiyo yenye mamlaka ya kuyasikiliza. Hivyo aliwaomba wote wanaohusika na upelelezi,
uendeshaji wa mashitaka kutumia takwimu za Mahakama ili waweze kujua wapi kuna
ucheleweshaji mkubwa.
“Vile
vile naomba Hakimu Mfawidhi pakitokea mlundikano ambao unasababishwa na
upelelezi, peleka (taarifa) kwa wahusika na kwa kuwa nchi yetu kuna ngazi za
viongozi, kama hakuna majibu nenda katika mkoa na kama mkoa hautoi majibu nenda
kwa (Mkurugenzi wa Mashitaka) DPP mwenyewe Dar es Salaam,” Jaji Mkuu alishauri .
Mhe.
Prof. Juma alitoa pongezi za dhati kwa DPP Silyvester Mwakitalu kwa kazi kubwa ambayo
ameifanya kwa muda mfupi, ambapo amepunguza kwa kiasi kikubwa mlundikano wa
mashauri. “Yeye (DPP) ni msikivu sana, ukimjulisha tu huwa anachukua maamuzi ya
haraka,” alisema.
Katika
ziara yake ya siku nne, Jaji Mkuu atatembelea maeneo mbalimbali, ikiwemo Wilaya
ya Songea, Mbinga, Nyasa, Namtumbo na Tunduru na kuhitimisha ziara hiyo kwa
kutembelea Mahakama ya Wilaya Songea, Mahakama ya Hakimu Mkazi Songea na
Mahakama Kuu Songea. Katika maeneo yote atakayopitia, Mhe. Prof. Juma atakagua
shughuli mbalimbali za kimahakama, ujenzi wa miundombinu pamoja na kuongea na
watumishi wa kada zote.
Jaji
Mkuu ameambatana na viongozi mbalimbali kutoka Makao Makuu, wakiwemo Msajili
Mkuu wa Mahakama ya Tanzania, Mhe. Wilbert Chuma, Msajili wa Mahakama ya Rifani, Mhe. Kevin Mhina, Mtendaji wa Mahakama ya
Rufani, Bw. Solanus Nyimbi na Mtendaji wa Mahakama Kuu ya Tanzania, Bw. Leonard
Magacha.
Wengine
ni Mkurugenzi wa Ukaguzi wa Huduma za Kimahakama, Malalamiko na Maadili, Mhe.
Annah Magutu, Mkurugenzi Msaidizi wa TEHAMA wa Mahakama ya Tanzania, Bw.
Machumu Essaba, Katibu wa Jaji Mkuu Adrean Kilimi, Katibu wa Msajili Mkuu, Bw.
Jovin Constantine, Mkurugenzi wa Rasilimali Watu na Utawala, Bi Beatrice
Patrick na mwakilishi wa Chama Cha Majaji na Mahakimu Tanzania, Mhe. Nemes
Mombury.
Kwa
upande wa Mahakama Kuu ya Tanzania, Kanda ya Songea, yupo Jaji Mfawidhi, Mhe. Sekela
Moshi, Naibu Msajili, Mhe. Warsha Ng’umbu, Mtendaji wa Mahakama Kuu wa Kanda,
Bw. Geofrey Mashafi, Hakimu Mkazi
Mfawidhi wa Mahakama ya Songea, Mhe. Livin Lyakinana, Afisa Utumishi, Bw. Brian
Haule, Mhasibu, Bw. Japhet Komba na Afisa TEHAMA, Bi. Catherine Francis.
Jaji Mkuu wa Tanzania, Mhe. Prof. Ibrahim Hamis Juma akiongea na watumishi wa Mahakama ya Wilaya ya Tunduru na Mahakama za Mwanzo leo tarehe 2 Machi, 2022 alipokuwa katika ziara ya kikazi ya Mahakama, Kanda ya Songea.
Meza kuu ikiongozwa na Jaji Mkuu wa Tanzania, Mhe. Prof. Ibrahim Hamis Juma (katikati) ikifuatilia taarifa ya utendaji ya Mahakama ya Wilaya ya Tunduru katika kikao cha watumishi. Kushoto ni Jaji Mfawidhi wa Mahakama Kuu ya Tanzania, Kanda ya Songea, Mhe. Sekela Moshi na kulia ni Msajili Mkuu wa Mahakama ya Tanzania, Mhe, Wilbert Chuma.
Viongozi waandamizi wa Mahakama ya Tanzania wakifuatilia taarifa ya utendaji ya Mahakama ya Wilaya ya Tunduru. Picha ya juu kutoka kulia ni Msajili wa Mahakama ya Rufani, Mhe. Kevin Mhina, Naibu Msajili, Mahakama Kuu, Kanda ya Songea, Mhe. Warsha Ng’umbu, Katibu wa Jaji Mkuu Adrean Kilimi na Katibu wa Msajili Mkuu, Bw. Jovin Constantine. Picha ya chini kutoka kulia ni Mtendaji wa Mahakama Kuu ya Tanzania, Bw. Leonard Magacha, Mkurugenzi wa Ukaguzi wa Huduma za Kimahakama, Malalamiko na Maadili, Mhe. Annah Magutu, Mkurugenzi Msaidizi wa TEHAMA wa Mahakama ya Tanzania, Bw. Machumu Essaba na Mkurugenzi wa Rasilimali Watu na Utawala, Bi Beatrice Patrick.
Sehemu ya viongozi wa Mahakama ya Tanzania (picha ya juu na chini) na watumishi wakimsikiliza Jaji Mkuu wa Tanzania, Mhe. Prof. Ibrahim Hamis Juma (hayupo katika picha).
Hakuna maoni:
Chapisha Maoni