BUNGE LAIMWAGIA SIFA MAHAKAMA UBORESHAJI HUDUMA ZA UTOAJI HAKI

Na Faustine Kapama-Mahakama, Dodoma

Wabunge wa Jamhuri ya Muungano wa Tanzania wameipongeza Mahakama ya Tanzania kwa uboreshaji mkubwa wa huduma za utoaji haki, ikiwemo mindombinu ya majengo, matumizi ya Teknolojia ya Habari na Mawasiliano (TEHAMA) na kuanzisha kituo kwa lengo la kupata mrejesho wa huduma zitolewazo, malalamiko na mapendekezo.

Miongoni mwa Wabunge hao, Mhe. Asha Abdalla, Mhe. Joseph Tadayo, Augusta Rambati na Mhe. Issa  Mtemvu wametoa pongezi hizo leo tarehe 28 Aprili, 2022 walipokuwa wakichangia hotuba ya Waziri wa Katiba na Sheria, Mhe. Dkt. Damas Ndumbaro wakati akiwasilisha bungeni makadirio ya mapato na matumizi ya Wizara kwa mwaka wa fedha 2022/2023.

“Tunaipongeza sana Mahakama kwa kazi nzuri inayofanya, ikiwemo uboreshaji wa huduma za utoaji mbalimbali za haki kwa wananchi na ujenzi wa majengo ya kisasa. Mimi ni Mjumbe wa Kamati ya Sheria na Katiba. Tumetembelea baadhi ya miradi ya majengo, kwa kweli tumeiona thamani ya fedha katika majengo hayo,” Mhe. Asha Abdalla alisema.

Akichangia hotuba hiyo, Mhe. Augusta Rambati, ambaye pia ni mjumbe wa Kamati ya Katiba na Sheria alianza kwa kumpongeza Mtendaji Mkuu wa Mahakama ya Tanzania, Prof. Elisante Ole Gabriel kwa kazi nzuri ambayo anaifanya katika kusimamia shughuli mbalimbali za kiutendaji ndani ya Mhimili huo wa dola.

“Nimeshiriki katika ziara ya kukagua miradi ya maendeleo iliyopo chini ya Mahakama. Nikiri kwamba kwa macho yangu nimeona thamani ya fedha. Nichukue fursa hii kuwapongeza kuwa fedha ambazo zimetengwa hakika Mahakama wamezitendea haki na thamani ya fedha inaonekana kabisa,” amesema.

Kwa upande wake, Mhe. Tadayo alieleza kuwa alipata fursa ya kutembea na Kamati ya Katiba na Sheria kuangalia  miradi mbalimbali ya maendeleo ya Mahakama ambayo ipo chini ya Wizara hiyo na amekiri kuona maendeleo makubwa katika uboreshaji wa sekta ya utoaji haki kwa wananchi.

“Tumeona majengo ya kisasa, uboreshaji mkubwa wa mifumo ya TEHAMA pamoja na hiki kituo ambacho kinawasaidia wananchi kupeleka kero zao. Pia tumeona ushirikishwaji wa wadau wengine,” amesema.

Mhe. Tadayo alitoa mfano wa kitendo cha Kituo cha Sheria na Haki za Binadamu kupewa ofisi ndani ya jengo la Mahakama ili watu wote wanaohitaji msaada wa kisheria waweze kupata katika eneo moja. Amesema kitendo hicho ni mapinduzi makubwa yanayodhihirisha kuwa Serikali haifanyi maigizo kwenye suala zima la utoaji haki.

Awali akiwasilisha makadirio ya mapato na matumizi ya Wizara yake, Mhe. Dkt Ndumbaro aliliambia Bunge kuwa Mahakama imeendelea na utekelezaji wa Mpango wa Miaka Mitano (2021/22 – 2025/26) wa Ujenzi na Ukarabati wa Miundombinu ya Mahakama, ambapo katika mwaka 2021/2022 miradi 37 ilitekelezwa katika ngazi mbalimbali za Mahakama.

Amesema kuwa hadi kufikia Machi, 2022 miradi imefikia katika hatua mbalimbali za utekelezaji ikiwemo ujenzi wa vituo Jumuishi vya Utoaji Haki (IJCs) sita katika Mikoa ya Dar es salaam (Kinondoni na Temeke), Dodoma, Morogoro, Mwanza na Arusha.

Kumekuwepo pia na ujenzi wa Mahakama za Hakimu Mkazi mbili katika Mikoa ya Katavi na Lindi; ujenzi wa Mahakama za Wilaya nne katika Wilaya za Bahi, Chemba, Rungwe na Bunda; ujenzi wa Mahakama za mwanzo tatu za Matiri (Mbinga), Hydom (Mbulu) na Kibaigwa (Kongwa) na ujenzi wa Jengo la Kuhifadhia Kumbukumbu – Tanga.

Waziri Ndumbaro ametaja miradi inayoendelea kama ujenzi wa jengo la Makao Makuu ya Mahakama Dodoma ambapo ujenzi wa boma umekamilika kwa asilimia 100; ukarabati na upanuzi wa Mahakama Kuu Tabora na ujenzi wa Mahakama za Hakimu Mkazi katika Mikoa ya Songwe na Tabora.

Pia kuna ujenzi wa Mahakama za Wilaya za Nanyumbu, Namtumbo, Same, Tandahimba, Kilindi, Sikonge, Mwanga, Kakonko, Buhigwe, Uvinza, Butiama, Rorya, Itilima, Busega, Songwe, Mbogwe, Nyang’wale, Kyerwa, Misenyi, Gairo, Mvomero, Kilombero, Mkinga, Tanganyika na Kaliua.

Ametaja miradi mingine inayoendelea ambayo ni ujenzi wa Mahakama za Mwanzo Mang’ula na Mlimba (Morogoro), Nyakibimbili (Bukoba), Kabanga (Ngara), Chanika (DSM), na Kimbe (Kilindi) na Ujenzi wa bweni la wavulana katika Chuo cha Uongozi wa Mahakama - Lushoto.

Mhe. Dkt Ndumbaro amebainisha pia kuwa Mahakama imeendelea kuanzisha na kuboresha mifumo ya utoaji haki kwa kutumia TEHAMA na hadi kufikia Machi 2022, Mahakama imeanzisha mfumo wa ‘SEMA NA MAHAKAMA’ wenye lengo la kupata mrejesho wa huduma zitolewazo, malalamiko na mapendekezo.

Kwa mujibu wa Waziri Ndumbaro, vilevile Mahakama imefanya uboreshaji katika mifumo mbalimbali, ikiwemo mfumo wa kielektroniki wa usimamizi na uendeshaji wa mashauri (Judicial Statistical Dashboard System - JSDS II) na mfumo wa Mkutano Mtandao (Video Conferencing) unaowezesha kuendesha mashauri kwa njia ya mtandao.

Pia kuna mfumo wa kielektroniki wa kusajili na kuwatambua mawakili (eWakili); mfumo wa kutambua Viwanja na Majengo ya Mahakama (JMap) wenye lengo la kutambua hali halisi ya majengo na viwanja vya Mahakama ili kuwezesha uandaaji wa mpango wa ujenzi na ukarabati wa majengo ya Mahakama nchi nzima na mfumo wa kuratibu na kuhifadhi taarifa za mali na vitendea kazi mahakamani.

Akiwasilisha maoni ya Kamati kuhusu utekelezaji wa Bajeti ya Mfuko wa Mahakama kwa mwaka wa fedha 2021/22 pamoja na makadirio ya mapato na matumizi kwa mwaka wa fedha 2022/23, Mjumbe wa Kamati ya Katiba na Sheria, Mhe. Issa  Mtemvu alivitaja baadhi ya vipaumbele vya Mahakama katika mwaka wa fedha 2021/22.

Vipaumbele hivyo ilikuwa kuboresha mifumo ya TEHAMA kama nyenzo muhimu ya kuboresha utoaji wa huduma; kuongeza ushirikiano na wadau wa haki jinai ili kuharakisha huduma ya utoaji haki na kuendelea kutekeleza mpango wa ujenzi na ukarabati wa majengo ya Mahakama katika ngazi mbalimbali nchini.

Amesema mafanikio yaliyofikiwa katika kutekeleza vipaumbele hivyo ni kuboresha mfumo wa teknolojia ya habari na mawasiliano (TEHAMA) kama nyezo muhimu ya kuboresha utoaji wa huduma na kuendelea kutekeleza mpango (2021/22 – 2025/26) wa ujenzi na ukarabati wa mahakama katika ngazi mbalimbali ikiwa ni pamoja na utekelezaji wa miradi 37 katika ngazi mbalimbali za Mahakama.

Waziri wa Katiba na Sheria,Mhe. Dkt Ndumbaro  kiwasilisha makadirio ya mapato na matumizi ya Wizara yake Bungeni leo tarehe 28 Aprili, 2022.  

Mtendaji Mkuu wa Mahakama ya Tanzania, Prof. Elisante Ole Gabriel akiwasalimia Wabunge wakati akitambulishwa na Spika wa Bunge la Jamhuri ya Muungano wa Tanzania, Mhe. Dkt Tulia Ackson.

Msajili Mkuu wa Mahakama ya Tanzania, Mhe. Wilbert Chuma akipokea heshima kutoka kwa Wabunge wakati wa utambulisho.

Majaji wa Mahakama Kuu ya Tanzania na Jaji Mstaafu wa Mahakama ya Rufani, ambaye pia ni Mwenyekiti wa Tume ya Kurekebisha Sheria, Mhe. January Msoffe (kulia) wakifuatilia mjadala Bungeni.

Jaji Mfawidhi wa Mahakama Kuu ya Tanzania, Kanda ya Dodoma, Mhe. Gerson Mdemu akipokea salamu kutoka kwa Wabunge.

Jaji wa Mahakama Kuu ya Tanzania, Mhe. George Masaju akipokea salamu kutoka kwa Wabunge wakati wa utambulisho

Jaji wa Mahakama Kuu ya Tanzania na Mkuu wa Taasisi ya Mafunzo ya Uanasheria kwa Vitendo nchini (Law School), Mhe. Dkt. Benhajj Masoud akipokea salamu kutoka kwa Wabunge. 

Spika wa Bunge la Jamhuri ya Muungano wa Tanzania, Mhe. Dkt Tulia Ackson akisistiza jambo kabla ya Waziri wa Katiba na Sheria,Mhe. Dkt Ndumbaro  kuwasilisha makadirio ya mapato na matumizi ya Wizara yake Bungeni.