KILA MTUMISHI AWAJIBIKE KUTEKELEZA MPANGO MKAKATI WA MAHAKAMA; JAJI MTULYA

 Na Francisca Swai, Mahakama-Musoma

Jaji Mfawidhi wa Mahakama Kuu Kanda ya Musoma, Mhe. Fahamu Mtulya amewataka watumishi wa Kanda hiyo kuungana kwa pamoja na kusaidia kutekeleza Mpango Mkakati wa Mahakama ya Tanzania wa mwaka (2020/2021-2024/2025) ili Mhimili huo uweze kufikia malengo yake kwa ufanisi.

Akizungumza katika kikao cha Baraza la Wafanyakazi wa Kanda hiyo hivi karibuni, Mhe. Mtulya alisema kuwa ili kufikia malengo ya kufanikisha utekelezaji wa Mpango huo ni muhimu Watumishi kushirikiana na kufanya shughuli zote kwa upendo.

Naye Mtendaji wa Mahakama Kanda ya Musoma, Bw. Festo Chonya alipata fursa ya kuuelezea mpango mkakati huo na kuwaeleza watumishi kuwa mpango huo utashushwa kwa kila ngazi ya Mahakama ili waweze kuwafanya kazi katika njia moja na hatimaye kuifikia azma ya Mahakama ya kutoa haki kwa wakati.

Katika kikao hicho kilichowashirikisha watumishi wote wa Mahakama katika kila ngazi ilisisitizwa umuhimu wa kila Mtumishi kuujua mpango mkakati wa Mahakama 2020/21-2024/25 kwa urahisi wa utekelezaji wake.

Katika mkutano wa Baraza hilo wajumbe waliafikiana jumla ya maazimio nane ikiwemo watumishi wote wa Mahakama kuwekwa kwenye mfumo mmoja wa malipo ya mshahara yaani ‘TJS’, watumishi waliojiendeleza nje ya kada zao kufikiriwa kubadilishwa kada, watumishi waliosahaulika kupandishwa cheo waombewe kibali maalumu cha kupandishwa cheo na kadhalika.

 

Jaji Mfawidhi wa Mahakama Kuu- Kanda ya Musoma, Mhe. Fahamu Mtulya (aliyesimama) akizungumza na Wajumbe wa Baraza la wafanyakazi Kanda ya Musoma (hawapo katika picha). Kulia kwake ni Jaji wa Mahakama Kuu, Kanda ya Musoma, Mhe. Awamu Mbagwa na kushoto kwake ni Afisa Tawala wa Kanda hiyo, Bi. Alicia Bernado ambaye pia ni Katibu wa Baraza hilo la Wafanyakazi Kanda ya Musoma.

Wajumbe wa Baraza la Wafanyakazi Kanda ya Musoma wakiimba wimbo wa TUGHE (Solidarity Forever).

Mtendaji wa Mahakama Kanda ya Musoma, Bw. Festo Chonya akiuelezea Mpango Mkakati wa Mahakama 2020/21-2024/25 kwa wajumbe wa Baraza hilo (hawapo katika picha).

Afisa TEHAMA Mahakama Kuu- Kanda ya Musoma, Bw. Simon Lyova, akiwasilisha mada mada kuhusu TEHAMA katika kikao cha Baraza hilo.

Picha ya Pamoja na wajumbe wajumbe wa Baraza la wafanyakazi Musoma. Katikati ni Jaji Mfawidhi wa Mahakama Kuu- Kanda ya Musoma, Mhe. Fahamu Mtulya, kushoto ni Jaji wa Mahakama Kuu-Kanda ya Musoma, Mhe. Awamu Mbagwa na kulia ni  Bi. Alicia Bernado, Katibu wa Baraza la Wafanyakazi Kanda ya Musoma.