MAHAKAMA SPORTS KUKUTANA NA MIPANGO, KILIMO ROBO FAINALI

Na Faustine Kapama-Mahakama, Dodoma

Timu ya Mahakama ya Tanzania (Mahakama Sports) leo tarehe 25 April, 2022 imeendelea kufanya mazoezi muhimu kabla ya kukutana robo fainali na timu za Mipango na Kilimo katika mchezo wa kuvuta kamba wanaume na wanawake kwenye mashindano ya Mei Mosi yanayofanyika Uwanja wa Jamhuri jijini hapa.

Kwa mujibu wa ratiba iliyotolewa na viongozi wa mashindano hayo, mechi za robo fainali zitachezwa kesho tarehe 26 Aprili, 2022 ambapo Mahakama Sports wanaume watakutana na timu ya Mipango, huku wanawake wakikabana koo na timu ya Kilimo kwenye hatua hiyo.

Mshindi kwenye hatua hii atatinga moja kwa moja katika hatua ya nusu fainali. Akizungumza katika uwanja wa mazoezi, Mwalimu wa Timu Spear Mbwembe amesema vijana wake wapo kwenye hali nzuri, wanaendelea na mazoezi kama kawaida na wapo tayari kukabiliana na yoyote atakayepangwa kushindana nao.

“Ninawashukuru sana vijana wangu, wapo vizuri, hatuna majeruhi na wanatekeleza vyema programu ya mazoezi niliyoiandaa. Ingawa mazoezi ni makali, lakini wanapokea maelekezo na kwa kweli wanafanya vizuri. Tupo tayari kwa robo fainali kesho,” amesema.

Mechi zingine zitakazochezwa katika hatua hiyo ya robo fainali kwa upande wa wanaume ni Uchukuzi watakaomenyana na Tume ya Taifa ya Uchaguzi, Kilimo watakutana na TPDC, wakati Ngorongoro watapigishana kwata na Mambo ya Ndani.

Mshindi kati ya Mahakama na Mipango atakutana na mshindi kati ya Kilimo na TPDC katika hatua ya nusu fainali, huku mshindi kati ya Uchukuzi na Tume ya Taifa ya Uchukuzi atakutana na mshindi kati ya Ngorongoro na Mambo ya Ndani kwenye hatua hiyo.

Kwa upande wa wanawake robo fainali, Tamisemi itakutana na Ocean Road, TPDC watakabiliana na Ngorongoro, huku Uchukuzi wakijaribu ‘kuchota fedha’ Hazina.

Mshindi kati ya Mahakama na Kilimo atakutana na mshindi kati ya TPDC na Ngorongoro katika hatua ya nusu fainali ambapo mshindi kati ya Tamisemi na Ocean road atakutana na mshindi kati ya Uchukuzi na Hazina kwenye hatua hiyo.

Mahakama Sports imeingia robo fainali baada ya kushinda mechi zake zote kwenye hatua ya makundi. Mahakama Sports wanaume walimenyana na TPDC na Tanesco, ambao waliingia mitini kwa kuhofia kipigo, huku Mahakama Sports wanawake ikiwatambia Ocean Road, Tanesco na Tume ya Taifa ya Uchaguzi.

Viongozi ambao wameambatana na Mahakama Sports ni Mwenyekiti Wilson Dede Makamu Mwenyekiti Fidelis Choka, Katibu Mkuu Robert Tende, Naibu Katibu Mkuu Theodosia Mwangoka, Wajumbe wawili Rajab Mwariko na Mchawi Mwanansolo, Afisa Michezo Nkuruma Katagira, Meneja wa Timu Antony Mfaume na Meneja Vifaa na Tiba Teresia Mogani.

Mahakama Sports  wanawake na wanaume (picha ya juu na chini) wakijiandaa kuvuta kamba katika uwanja wa mazoezi leo tarehe 25 Aprili, 2022 kwa ajili ya maandalizi ya mechi za robo fainali zinazofanyika kesho katika Uwanja wa Jamhuri jijini Dodoma.

Mahakama Sports  wanawake na wanaume (picha ya juu na chini) wakifanya mazoezi ya kuvuta kamba katika uwanja wa mazoezi.

Mahakama Sports  wanawake na wanaume (picha ya juu na chini) wakifanya mazoezi ya kunyakua-nyakua ili kuimarisha misuri.

      Hii inaitwa piga pin syle. 

Mahakama Sports  wanawake na wanaume (picha ya juu na chini) wakiwa katika picha ya pamoja baada ya mazoezi makali.

Jamaa anasema havutwi mtu hapa.