JUDICIARY OF TANZANIA: MAHAKAMA SPORTS DUDE KUUUBWA

· Tanesco wakata umeme, waingia mitini

· Mahakama wanawake waipigisha kura NEC

Na Faustine Kapama-Mahakama, Dodoma

Timu ya Mahakama ya Tanzania (Mahakama Sports) leo tarehe 22 April, 2022 imeendeleza ubabe katika mashindano ya Mei Mosi yanayofanyika katika Uwanja wa Jamhuri jijini hapa mara baada ya kuzoa pointi zote muhimu kwenye mchezo wa kuvuta kamba wanaume na wanawake.

Tanesco waliokuwa wamepangwa kupimana umwamba na Mahakama Sports wanaume walilazimika kukata umeme na kuingia mitini, huku Mahakama Sports wanawake wakaisambaratisha Tume ya Taifa ya Uchaguzi (NEC), hivyo kila timu pinzani kuachia pointi zote mbili kwa wababe hao kutoka Mhimili wa kutoa haki nchini.

Mechi ya kwanza iliwakutanisha Mahakama Sports wanawake majira ya saa moja asubuhi ambapo katika hatua ya kwanza NEC walijaribu kujitutumua lakini wakakumbana na kipigo kikali kilichowafanya washindwe kuelewana, hivyo kupururwa kirahisi na kutoka kwenye mstari mweupe.

Katika hatua ya pili, NEC walionekana kuchanganyikiwa kutokana na kushindwa kila mbinu waliyojaribu kuitumia ili kuwatoa Mahakama Sports kwenye mchezo na kuwaacha wababe hao wakiondoka na pointi zote mbili muhimu katika mashindano hayo.

Baada ya timu za wanawake kumalizika, Waamuzi walianza kuita wanaume, huku timu ya Mahakama Sports ikipangwa ya tatu na Tanesco. Mchezo huo ulipowadia, Mahakama Sports walionekana pekee yao kwenye ulingo na kusababisha Waamuzi hao kuuahirisha kwa muda ili kuwapa nafasi Tanesco kujipanga.

Mchezo huo ulipangwa wa mwisho katika hatua hiyo, lakini licha ya kuitwa mara kadhaa kupimana ubavu na miamba hiyo ya Mahakama, Tanesco walitoweka ghafla katika mazingira ya kutatanisha na kujibanza kusikojulikana, hivyo kuruhusu Mahakama Sports kupewa ushindi wa mezani.

Akizungumza baada ya kumalizika kwa mchezo huo, Mwenyekiti wa Mahakama Sports Wilson Dede alisema, “Tanesco hawajatutendea haki hata kidogo. Sisi ni wapenda haki daima na kazi yetu ni kutoa haki. Tulitaka tukutane nao hapa ili sio tu haki itendeke, bali pia ionekane imetendeka. Wanabahati sana hawa.”

Tangu yalipoanza mashindano hayo, Mahakama Sports wanawake wameshakuta na timu za Ocean Road, Tanesco na Tume ya Taifa ya Uchaguzi, huku Mahakama Sports wanaume wakimenyana na TPDC na Tanesco. Katika mechi zote hizo, Mahakama Sports wameibuka washindi.

Kufuatia kumalizika kwa hatua hii ya makundi, mashindano sasa yanaingia katika hatua ya mtoano wa timu 16 bora. Kwa mujibu wa kanuni za mashindano hayo, timu itakayopoteza katika hatua hii itakuwa imeyaaga mashindano kwa ujumla. Mechi za mtoano zinatarajiwa kuanza tarehe 25 Aprili, 2022 ili kupisha michezo mingine itakayoanza kesho kama riadha, bao, karata na minigine.

Michezo mingine ya kamba iliyochezwa leo kwa upande wa wanawake ilikuwa Ocean road walioshinda dhidi ya Tanesco, Hazina walioshinda dhidi ya Mipango, Utamaduni wakaangukia pua kwa Afya, Ngorongoro wakiibuka wababe wa Tanroads, Mambo ya Ndani wakishindwa kufurukuta kwa TAMISEMI na TPDC wakiwashinda Kilimo.

Kwa upande wa wanaume, Tume ya Taifa ya Uchaguzi waliwabamiza Tume ya Utumishi Walimu, Maliasili ikashinda dhidi ya Maji, Mgorongoro wakaibuka wababe wa Mipango, Uchukuzi wakashinda dhidi ya Hazina, Mambo ya Ndani wakawapigisha kwata Utamaduni na Kilimo wakawalimisha Tume ya Utumishi ya Walimu.

Mbali na Mwenyekiti, viongozi wengine ambao wameambatana na Mahakama Sports ni Makamu Mwenyekiti Fidelis Choka, Katibu Mkuu Robert Tende, Naibu Katibu Mkuu Theodosia Mwangoka, Wajumbe wawili Rajab Mwariko na Mchawi Mwanansolo, Afisa Michezo Nkuruma Katagira, Meneja wa Timu Antony Mfaume na Meneja Vifaa Teresia Mogani.

Mahakama Sports wanawake wakinyoosha mikono kuashiria utayari wa kuanza mchezo wao dhidi ya Tume ya Taifa ya Uchaguzi. Mahakama Sports waliibuka wababe.

Mahakama Sports wanawake wakiwapurura NEC.

Timu ya Tume ya Taifa ya Uchaguzi wanawake wakiwa hoi baada ya kupururwa na wababe wao Mahakama Sports wanawake.

Mahakama Sports wanawake chini ya kiongozi wao, Mama Mchawi Mwanansolo (picha ya juu na chini) wakiwatambia NEC baada ya kuwapigisha kura.

Mahakama Sports wanaume wakiwa tayari kuwakabiri Tanesco kwenye kichekecheo. Tanesco waliingia mitini baada ya kuhofia kichapo.

Mahakama Sports wanaume wakila push-up kusherekea ushindi baada ya Tanesco kukimbia.

Timu ya Tanesco wanawake (juu) na timu ya Hazina wanawake (chini) wakilamba nyasi za uwanja wakati wa kuonyeshana ubabe na wapinzani wao. Hazina walipata ushindi dhidi ya Mipango, huku Tanesco wakiambulia kichapo kutoka Ocean Road.