MKUU WA MKOA DODOMA AZINDUA MASHINDANO MEI MOSI 2022, ATOA UJUMBE MZITO

Na Faustine Kapama-Mahakama, Dodoma

Mkuu wa Mkoa wa Dodoma, Mhe. Antony Mtaka leo tarehe 21 Aprili, 2022 amezindua rasmi mashindano ya michezo mbalimbali ya Mei Mosi kwa mwaka huu wa 2022 yanayofanyika katika Uwanja wa Jamhuri jijini hapa na kuhimiza wanamichezo wote kushiriki kikamilifu, kwani michezo ni ajira, furaha na afya.

Akizungumzia katika uzinduzi huo, Mhe. Mtaka amewashuruku viongozi waliondaa mashindanio hayo, akiwemo Mwenyekiti wa Kamati ya Michezo ya Mei Mosi, Mhe, Dkt. Hamis Mkanachi kwa kuweka Kauli Mbiu ambayo inahamasisha wananchi kushiriki katika shughuli mbalimbali, ikiwemo michezo, sensa na chanjo dhidi ya ugonjwa wa korona.

Amenukuu Kauli Mbiu hiyo inayosema, “Michezo ni Afya na Huamsha Ari ya Kazi, Cheza, Chanja na Hesabiwa,” na kusema kuwa yeye huwa hakubaliani na mambo ya michezi ni afya na ndiyo maana wachezaji waliopo huwa hawafanyi vizuri katika michezo mbalimbali, ikiwemo ya Ligi Kuu.

“Tunaenda UMISHUMITA kesho kutwa, mtu yupo Darasa la Nne na anakipaji cha kucheza, lakini anaambiwa michezo ni afya, michezo ni furaha. Hizi furaha kila mmoja anazo kwa namna yake. Tukianza kuwajenga wajue kwamba michezo ni biashara, michezo ni ajira, inaweza ikawa jambo la maana zaidi,” amesema.

Kwa mujibu wa Mkuu huyo wa Mkoa, haishangazi kuona sehemu kubwa ya wachezaji kwenye Ligi  wanaofanya vizuri bado ushindani wa wale wanaotoka nje na waliopo ndani ni mkubwa, maana mchezaji hukaa pale uwanjani akicheza kiafya, afya, au kifuraha, furaha.

“Kwa hiyo, kwangu mimi (nashauri) tuanze kubeba kauli mbiu ya michezo ni ajira, michezo ni burudani ili kama hapa kuna mzazi ana mtoto anacheza ajue kwamba atapata A ya kucheza vizuri kama anavyopata A ya darasani,”amesema.

Mhe. Mtaka amesema uzinduzi huo ni mwanzo rasmi katika safari kuelekea kilele cha siku ya Mei Mosi na kwamba kuna matukio mengi ambayo yamepangwa kama Mkoa kuelekea siku hiyo.

“Moja ni shughuli hizi za kimichezo na pili kesho tutaanza maonyesho ya shughuli na bidhaa mbalimbali kwenye viwanja vya Jakaya Kikwete Convention ambapo kuna waonyeshaji zaidi ya 300 watakaokuwa pale kwa ajili ya kusherehesha kuelekea Mei Mosi,” amesema.

Hivyo amewashukuru wakuu wote wa taasisi, viongozi wa serikali na sekta binafsi kwa kuridhia watumishi wao kuja Dodoma kushiriki katika shughuli za kimichezo  kulelekea kilele cha Mei Mosi.

Mhe. Mtaka ametumia fursa hiyo kukumbushia kuwa alipokuwa akizindua siku rasmi itakayofanyika sensa ya watu na makazi,  Rais wa Jamhuri ya Muungano wa Tanzania, Mhe. Samia Suluhu Hassan aliwaelekeza viongozi wote wa serikali  na wadau wote kutumia kila aina ya mikosanyiko ya watu kuwahabarisha Watanzania kuhusu sensa, hivyo amewaomba wananchi  wote kujiandaa kuhesabiwa.

Kuhusu chanjo, Mkuu wa Mkoa amewaambia wanamichezo waliofurika katika Uwanja wa Jamhuri kuwa uhai wa binadamu sio mali ya serikali, kanisa wala msikiti na kuwakumbusha ipo siku watakufa na kuuacha msikiti, kanisa na serikali, hivyo suala la kuchanja ni kwa faida ya mtu mwenyewe kwa kujua anabeba dhamana ya familia na maisha yake.

“Hivyo tukumbushane kuchanja ni kwa faida yako, kama utaweza kucheza na afya yako ni wewe mwenyewe na mapungufu yako. Mtu aliyechanja huwa amejizuia na hatari kubwa zaidi tunapokuwa kwenye mikusanyiko mikubwa kama hii,”amesema.

Aliongelea pia suala la sensa ambapo kwa sasa zoezi linaloendelea ni kutambua mali za watu na makazi, hivyo akatumia hadhara hiyo kuhimiza kila mmoja kutoa ushirikiano katika zoezi hilo.

“Tutoe ushirikiano wa dhati kwa viongozi wa serikali wanaokuja kwenye maneo yetu kwa ajili ya kutambua barabara, mitaa na nyumba ili kuweka utambuzi na utambulisho wa makazi na watu wajitokeze siku ya sensa na kutoa ushirikiano unaostahili,” Mhe. Mtaka alisema.

Akiwa katika uwanja huo, Mkuu wa Mkoa huyo alicheza penati kuashiria uzinduzi rasmi wa michezo hiyo na kufanikiwa kumtungua kipa wa timu ya Ngorongoro aliyekuwa ameandaliwa kwa ajili ya tukio hilo.

Kabla ya sherehe hizo za uzinduzi, wanamichezo wote walishiriki katika maandamano yaliyoanzia viwanja vya Nyerere Square na kuishia katika Uwanja wa Jamhuri. 

Uzinduzi huo umehudhuriwa na viongozi kutoka sekta na taasisi mbalimbali za serikali na Mahakama, akimwemo Jaji Mfawidhi wa Mahakama Kuu ya Tanzania, Kanda ya Dodoma, Mhe. Gerson Mdemu, Naibu Msajili wa Mahakama Kuu katika  Kanda, Mhe. Silvia Rushasi na Mwenyekiti wa Michezo wa Mahakama, Mkoa wa Dodoma, Hakimu Mkazi Mwandamizi, Mhe.Denis Mpelembwa.

Viongozi wa Mahakama Sports walioongoza wanamichezo wa Mahakama ya Tanzania kwenye uzinduzi huo ni Mweyekiti wa Mahakama Sports Wilson Dede, Makamu Mwenyekiti Fidelis Choka, Katibu Mkuu Robert Tende, Naibu Katibu Mkuu Theodosia Mwangoka, Wajumbe wawili Rajab Mwariko na Mchawi Mwanansolo, Afisa Michezo Nkuruma Katagira, Meneja wa Timu Antony Mfaume, Meneja Vifaa Teresia Mogani na Mwalimu Spear Mbwembwe.

Mkuu wa Mkoa wa Dodoma, Mhe. Antony Mtaka  akizungumza leo tarehe 21 Aprili, 2022 na wanamichezo katika ufunguzi rasmi wa mashindano ya michezo mbalimbali ya Mei Mosi kwa mwaka huu wa 2022 yanayofanyika katika Uwanja wa Jamhuri.

Jaji Mfawidhi wa Mahakama Kuu ya Tanzania, Kanda ya Dodoma, Mhe. Gerson Mdemu (katikati) akiwa na viongozi wa Mahakama, Naibu Msajili wa Mahakama Kuu katika  Kanda, Mhe. Silvia Rushasi (kushoto) na Mwenyekiti wa Michezo wa Mahakama, Mkoa wa Dodoma, Hakimu Mkazi Mwandamizi, Mhe.Denis Mpelembwa (kulia) katika uzinduzi wa mashindano ya michezo mbalimbali ya Mei Mosi.

Timu ya Mahakama ya Tanzania (Mahakama Sports) ikishiriki katika maandamano yaliyoanzia viwanja vya Nyerere Square na kuishia katika Uwanja wa Jamhuri katika uzinduzi wa michezo hiyo.

Sehemu ya wanamichezo wa Mahakama Sports (picha ya juu na chini) wakiwa kwenye maandamano.

Timu ya Mahakama ya Tanzania (Mahakama Sports) ikiwa katika picha ya pamoja katika viwanja vya Nyerere Square kabla ya maandamano.

Timu ya Mahakama ya Tanzania (Mahakama Sports) ikiwa jukwaani kwanye uzinduzi wa mashindano ya Mei Mosi katika Uwanja wa Jamhuri. 

Sehemu ya viongozi wa Mahakama Sports wakiwa kwenye jukwaa kushuhudia uzinduzi wa michezo hiyo.

Mkuu wa Mkoa wa Dodoma, Mhe. Antony Mtaka (katikati) akiwa na viongozi mbalimbali akiwemo Jaji Mfawidhi wa Mahakama Kuu ya Tanzania, Kanda ya Dodoma, Mhe. Gerson Mdemu (kulia) na Mwenyekiti wa Kamati ya Michezo ya Mei Mosi, Mhe, Dkt. Hamis Mkanachi (kushoto).

Mwenyekiti wa Kamati ya Michezo ya Mei Mosi, Mhe, Dkt. Hamis Mkanachi akizungumza na wanamichezo.

Mkuu wa Mkoa wa Dodoma, Mhe. Antony Mtaka akicheza penati kuashiria uzinduzi wa mashindano hayo. Mhe. Mtaka alifunga penati hiyo.