MAHAKAMA SPORTS YAKOMBA VIKOMBE MASHINDANO MEI MOSI

Na Faustine Kapama-Mahakama, Dodoma

Mashindano ya Mei Mosi yaliyokuwa yanafanyika katika Uwanja wa Jamhuri jijini hapa yamekamilika leo tarehe 29 Aprili, 2022 kwa timu ya Mahakama ya Tanzania (Mahakama Sports) kushika nafasi ya pili kwenye mchezo wa kuvuta kamba wanaume na wanawake.

Mahakama Sports iliingia fainali kupambana na timu ya Uchukuzi kwa upande wa wanaume na wanawake, lakini ikashindwa kwa taabu na wapinzani wao, hivyo kuweza kujinyakulia vikombe viwili baada ya kushika nafasi ya pili.

Ilikuwa mchezo wa kamba wanawake ulioanza majira ya mchana huku timu zote mbili zikikamiana. Katika mzunguko wa kwanza, timu ya Uchukuzi ilifanikiwa kupata pointi moja baada ya kuwazidi ujanja Mahakama Sports. Hata hivyo, Mahakama Sports walikuja juu katika mzunguko wa pili na kufanikiwa kuwaburuta Uchukuzi, hivyo ngoma ikabaki sawia kwa pande zote mbili.

Waamuzi walilazimika kuchezesha mzunguko wa pili ili kuweza kupata mshindi, ndipo Uchukuzi walipofanikiwa kupata pointi nyingine ya pili baada ya Mahakama Sports kuteleza wakati wakiwa wamebakiza upenyo mchache kushinda, hivyo kuwawezesha wapinzani wao kutumia faida hiyo na kuibuka washindi.

Mchezo wa wanaume haukuwa mgumu, ila ulitawaliwa na ujanja kwa upande mmoja. Katika mizunguko yote miwili, Uchukuzi walitumia ujanja wa kuachia kamba kabla ya mwamuzi kupuliza filimbi, hatua iliyowafanya Mahakama Sports kulegeza.

Kitendo hicho kiliwafanya Uchukuzi kuvuta kamba kwa nguvu na kwa kushitukiza, huku Mahakama Sports wakiwa bado hawajajiandaa, hivyo kuwafanya wapinzani hao kujipatia pointi zote mbili zilizowawezesha kuibuka washindi.

Akizungumza baada ya fainali hizo, Mwenyekiti wa Mahakama Sports Wilson Dede amewashukuru wachezaji wote kwa mafanikio makubwa licha ya timu pinzani kufika kwenye michuano hiyo kwa kuikamia Mahakama.

“Timu zote katika mashindano haya zilikuwa zinaiangalia Mahakama kwa sababu wanatujua vilivyo. Hata hawa waliobahatika wanatujua sisi ni nani, leo wamebahatisha ndiyo maana wameshangilia uwanja mzima kwa sababu walikuwa wanapambana na mwamba. Tunajipanga kwa mashindano yajayo,” amesema.

Kwa upande wake, Mwalimu Spear Mbwembwe amewapongeza vijana wake kwa kazi nzuri na kujituma sio tu kwenye mazoezi lakini hata wanapokuwa kwenye mapambano uwanjani. “Sisi ni washindi, wala hatujapoteza. Kuna timu 41 zilizokuwepo hapa, lakini sisi tumekuwa wa pili. Lazima tujipongeze,” amesema.

Ushindi huo umeshuhudiwa na Mkurugenzi wa Fedha na Mipango wa Mahakama ya Tanzania, Bw. Erasmus Uiso, ambaye pia ni mlezi wa Timu hiyo na Mkurugenzi wa Rasilimali Watu na Utawala, Bi Beatrice Patrick, ambao wote kwa pamoja wamewapongeza wachezaji kwa kuiheshimisha Mahakama. Wameahidi kuwapa ushirikiano ili waweze kufanya vizuri zaidi kwanye mashindano yajayo.

Mashujaa hao wa Mahakama Sports wanawake walioshiriki katika mashindano hayo wakiongozwa na mama Mchawi Mwanansolo walikuwa Stephania Bishobe, Zahara Selemani, Rebecca Mwakabuba, Hadija Mkuvi, Beatrice Dibogo, Jamila Kisusu, Judith Sarakikya, Saraphina Mkumbo, Melina Mwinuka, Namweta Mcharo, Mwanabibi Bakari, Lucy Mbwaga, Zuhura Hamza, Scholastica Shemtoi na Josephine Aidani.

Kwa upande wa Mahakama Sports wanaume chini ya Rajab Mwariko walikuwa Leonard Kazimzuri, Cletus Yuda, Seleman Dimoso, Patrick Nundwe, Denis Chipeta, Frank Lutego, Ashel Chaula, Abdul Mbaraka, Mushi Martin, Moris Magogo, Chilemba Chikawe, Issa Kabandika, Philipo Ferdinand, Emmanuel Seshahu na Fred Ndimbo. 

Mahakama Sports iliingia robo fainali baada ya kushinda mechi zake zote kwenye hatua ya makundi. Mahakama Sports wanaume walimenyana na TPDC na Tanesco, ambao waliingia mitini kwa kuhofia kipigo, huku Mahakama Sports wanawake ikiwazalisha Ocean Road, Tanesco na Tume ya Taifa ya Uchaguzi. Baada ya hapo, Mahakama Sports ilikutana na TPDC kwenye nusu fainali na kufanikiwa kutinga fainali kukutana na Uchukuzi.

Mbali na Mwenyekiti, viongozi wengine ambao waliambatana na Mahakama Sports ni Makamu Mwenyekiti Fidelis Choka, Katibu Mkuu Robert Tende, Naibu Katibu Mkuu Theodosia Mwangoka, Wajumbe wawili Rajab Mwariko na Mchawi Mwanansolo, Afisa Michezo Nkuruma Katagira, Meneja wa Timu Antony Mfaume na Meneja Vifaa na Tiba Teresia Mogani.

Nahodha wa Mahakama Sports wanawake Hadija Mkuvi akipokea kombe la mshindi wa pili kutoka kwa mgeni rasmi.

Nahodha wa Mahakama Sports wanaume Cletus Yuda akipokea kombe la mshindi wa pili kutoka kwa mgeni rasmi.

Viongozi wa Mahakama wakiwa katika picha za pamoja na Mahakama Sports wanawake (juu) na Mahakama Sports wanaume(chini).

Viongozi wa Mahakama Sports wakifurahia kombe la ushindi na Mwalimu wa Timu Spear Mbwembwe (aliyeshika kombe).

Mwalimu Spear Mbwembwe akipokea kombe kutoka kwa Nahodha wa Mahakama Sports wanaume Cletus Yuda.

Nahodha wa Mahakama Sports wanawake Hadija Mkuvi akimkabidhi kombe la ushindi Mwalimu Spear Mbwembwe.

Mkurugenzi wa Rasilimali Watu na Utawala, Bi Beatrice Patrick akinyanyua kombe la ushindi baada ya kukabidhiwa na Mwalimu wa Timu Spear Mbwembwe.

Mkurugenzi wa Fedha na Mipango wa Mahakama ya Tanzania, Bw. Erasmus Uiso akinyanyua kombe la ushindi.

Mwenyekiti wa Mahakama Sports Wilson Dede akimkabidhi kombe la ushindi Mkurugenzi wa Fedha na Mipango wa Mahakama ya Tanzania, ambaye pia ni mlezi wa Timu hiyo, Bw. Erasmus Uiso.