JAJI MFAWIDHI MOROGORO AONGOZA WATUMISHI KUPANDA MITI

Na Evelina Odemba – Mahakama Morogoro

Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe jana tarehe 6 Mei,2022 aliwaongoza watumishi wa Mahakama katika Kituo Jumuishi cha Utoaji Haki mkoani hapa kwenye zoezi la upandaji miti.

Zoezi hilo lililowajumuisha viongozi na watumishi wote na kufanikisha kupanda miti zaidi 70 katika eneo la wazi lililopo mbele ya jengo la Kituo hicho.

Akizungumza mara baada ya zoezi hilo, Mhe. Ngwembe alisema kuwa uwepo wa matukio ya uvamizi wa maeneo ya wazi ni miongoni mwa sababu zilizopelekea Mahakama mkoani Morogoro  kuchukua jukumu la kupanda miti hiyo ambayo licha ya kuhifadhi eneo pia lina faida nyingi.

Alisema, “Eneo hili la wazi ni  kubwa ambalo linaweza kuja kutumika baadae kwa shuguli za Mahakama, hivyo tumepanda miti jamii ya Mitiki na Mikongo inayosifika kwa mbao na kuhifadhi ardhi vizuri”  Mhe. Ngwembe aliongeza, “Tumeona eneo hili la wazi tuliifadhi kwa kupanda miti ambayo inafaida sana kwa kizazi hiki na kizazi kijacho cha Mahakama.”

Akizungumza kwa niaba ya watumishi wa Kituo Jumuishi cha Utoaji Haki, Mtendaji wa Mahakama Kuu, Kanda ya Morogoro, Bw. Ahmed Ng’eni alisema kuwa upandaji wa miti ni sehemu ya maazimio yaliyowekwa kituoni hapo ili kuhakikisha maeneo ya wazi yote yanahifadhiwa kwa namna endelevu.

“Mbali na kutupatia kivuli pia miti hii inaweza kutumika kama chanzo cha mbao hapo mbeleni”, alisema.

Zoezi hilo lenye faida halikuweza kuathiri shuguli za Mahakama kwani lilifanyika mara baada ya saa za kazi, ambapo Majaji, Mahakimu, Naibu Msajili, Mtendaji na watumishi wote walifanikiwa kupanda miti, huku Mhe. Ngwembe akimtaka kila mmoja kuutunza mti alioupanda ndani ya miezi sita.

 Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe akipanda mti katika eneo la wazi kwenye Kituo Jumuishi cha Utoaji Haki Morogoro.

  Jaji wa Mahakama Kuu ya Tanzania, Kanda ya Morogoro, Mhe. Messe Chaba akishiriki zoezi la upandaji miti.

Mtendaji wa mahakama kuu kanda ya Morogoro Ahmed Ng'eni akishiriki zoezi la upandaji miti.

Naibu Msajili wa Mahakama Kuu,  Kanda ya Morogoro,  Mhe. Sylivester Kanda akipanda miti.

1.     Maafisa kumbukumbu kutoka Mahakama Kuu, Boniphase Masubo (kulia) Respisious Kaijage (katikati) na Blanka Muhume (kushoto) wakishiriki zoezi la upandaji miti.

1.     Hakimu Mkazi wa Mahakama ya Mkoa Morogoro, Mhe. Manyama akipanda mti.

 Katibu wa TUGHE ambaye pia ni Mtumishi wa Mahakama, Bi. Mwajuma Nyundo, akishiriki zoezi hilo.