KILA MTUMISHI AWAJIBIKE KUTEKELEZA MPANGO MKAKATI WA MAHAKAMA: JAJI KILEKAMAJENGA

 Na Ahmed Mbilinyi-Mahakama, Bukoba

Jaji Mfawidhi wa Mahakama Kuu ya Tanzania, Kanda ya Bukoba, Mhe. Dkt. Ntemi Kilekamajenga amewataka watumishi wa Kanda hiyo kuungana kwa pamoja na kusaidiana kutekeleza Mpango Mkakati wa Mahakama ya Tanzania wa mwaka (2020/2021 – 2024/2025) ili mhimili huo uweze kufikia malengo yake kwa ufanisi.

Akizungumza katika kikao cha Baraza la Wafanyakazi wa Kanda hiyo kilichofanyika hivi karibuni, Mhe. Kilekamajenga alisema kuwa ili kufikia malengo na kufanikisha utekelezaji wa mpango huo ni muhimu kushirikiana na kufanya shughuli zote za kimahakama kwa upendo.

Kwa upande wake, Mtendaji wa Mahakama Kanda ya Bukoba, Bw. Lothan Simkoko aliwaambia watumishi kuwa mpango mkakati huo utashushwa kwa kila ngazi ya Mahakama ili waweze kufanya kazi katika njia moja na hatimaye kuifikia azma ya Mahakama ya kutoa haki kwa wakati.

Ulitolewa msisitizo katika kikao hicho kilichowashirikisha watumishi wote wa Mahakama katika kila ngazi kuhusu umuhimu wa kila mtumishi kuujua mpango mkakati wa Mahakama 2020/21 – 2024/25 ili kurahisisha utekelezaji wake.

Katika mkutano wa Baraza hilo, wajumbe waliafikia jumla ya maazimio saba (7) yachukuliwe na wapelekwe kwenye kikao cha Baraza la Wafanyakazi Taifa, ikiwemo watumishi wote wa Mahakama kuwekwa kwenye mfumo mmoja wa malipo ya mshahara yaani “TJS”.

Pia waliazimia watumishi wote wapatiwe stahili za malipo ya ‘court attire’ na sio malipo hayo kutolewa kwa Mahakimu pekee, watumishi kupatiwa posho mbalimbali zitakazokuwa zinaingizwa moja kwa moja kwenye akaunti zao, mfano posho ya chakula, posho ya mazingira magumu ili kuweza kuwasaidia watumishi kutokana na kuwa na viwango vidogo vya mshahara.

Jaji Mfawidhi wa Mahakama Kuu ya Tanzania, Kanda ya Bukoba, (katikati) ,Mhe Dkt Ntemi Kilekamajenga akifungua kikao cha Baraza la wafanyakazi Kanda ya Bukoba.

Mtendaji wa Mahakama Kuu Kanda ya Bukoba, Bw. Lothan Simkoko akiwasilisha mada ya mpango mkakati wa Mahakama 2020/21 – 2024/25

Katibu wa Tughe Mkoa wa Kagera, Bw. Edward Mwashitanda akichangia mada katika Baraza la wafanyakazi Kanda ya Bukoba.