MAHAKAMA NGERENGERE YAFUATA NYAYO ZA JAJI MFAWIDHI MOROGORO

 Na Evelina Odemba – Mahakama, Morogoro

Hakimu Mfawidhi wa Mahakama ya Mwanzo Ngerengere iliyopo Wilaya ya Morogoro, Mhe. Mbaraka Mchopa hivi karibuni aliongoza kikundi cha wanamazingira kwa kushirikiana na watumishi kupanda miti katika eneo la wazi la Mahakama hiyo.

Akizungumza wakati wa zoezi hilo, Mhe. Mchopa alisema kuwa walipata msukumo wa kupanda miti baaada ya kuona zoezi la namna hiyo lililoendeshwa kwa mafanikio makubwa na Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe.

Alisema kuwa Mhe. Ngwembe aliendesha zoezi kama hilo la upandaji miti katika eneo la wazi kwenye Kituo Jumuishi cha Utoaji Haki mkoani hapa hivi karibuni.

 “Baada ya zoezi lile niliomba miti kupitia kikundi cha mazingira cha Mgambo ambapo walitupatia miti 107 bure ili kuunga juhudi hizi za utunzaji wa mazingira na kuhifadhi maeneo ya wazi ya Mahakama kwa matumizi ya baadae” alieleza.

Aidha, Mhe. Mchopa alisema kuwa kikundi cha mazingira cha Mgambo hakikuishia kutoa miti pekee bali kilishiriki kikamilifu kwenye zoezi la upandaji  na kutoa ushauri wa namna bora ya kuhifadhi miti hiyo ili iweze kukua.

Miti iliyopandwa ni jamii ya Misedelea, Mikongo na Mikaratusi, ambayo kwa mujibu wa Mhe. Mchopa, itahudumiwa na washtakiwa wanaopewa adhabu mbadala za kutumikia jamii chini ya usimamizi wa Mahakama hiyo.

Akitoa maoni yake kuhusu hatua hiyo, Mhe. Ngwembe amelipongeza zoezi lililofanywa na Mahakama hiyo na kutoa agizo kwa Mahakama zote zilizopo katika Kanda yake kuhakikisha zinapanda miti katika maeneo yote ya wazi ili kuyahifadhi.

Jaji Mfawidhi huyo amesisitiza kuwa miti yote itakayopandwa iwe ni miti ya faida kama matunda au itakayotumika kwa mbao siku za usoni.

“Nilielekeza na ninaelekeza tena kila Hakimu aliyepo kwenye Kanda hii ahakikishe anapanda miti kwenye maeneo ya wazi ya Mahakama, sio kupanda miti tu bali kuhakikisha wanaitunza miti hiyo,” alisema

Jaji Mfawidhi huyo aliongeza, “Kama umepanda miti 100 leo hakikisha unatukabidhi miti 100 ikiwa hai baada ya miezi 9, miti itakayokufa itolewe na kupandwa mingine.”

Ikumbukwe tarehe 6 Mei, 2022, Mhe. Ngwembe aliongoza zoezi la kupanda miti eneo la wazi katika Kituo Jumuishi cha Utoaji Haki mkoani hapo kama kampeni ya kutunza maeneo yote ya Mahakama kwa ajili ya matumizi ya kizazi cha kijacho. Zoezi  hilo lilipokelewa vyema na sasa jitihada za kuungwa mkono zinafanyika.

Hakimu Mfawidhi wa Mahakama ya Mwanzo Ngerengere katika Wilaya ya Morogoro, Mhe. Mbaraka Mchopa akipanda mti katika eneo la wazi la Mahakama hiyo. Nyuma ni wanakikundi cha mazingira cha Mgambo.

Mwenyekiti wa Kijiji  cha Ngerengere, Bw. Seleman Mkoba akipanda mti katika zoezi hilo.

Afisa Maendeleo, Bi Hellen Mbimi akipanda mti.

Mwenyekiti wa Kikundi cha Mazingira Mgambo, Bw. Tino Chiwaya akipanda mti.

Karani wa Mahakama ya Mwanzo Ngerengere, Bi. Jamila Kinyongo naye hakuwa nyuma kwenye zoezi hilo.

Hakimu Mfawidhi wa Mahakama ya Mwanzo Ngerengere (aliyevaa tai katikati) akiwa katika picha ya pamoja na wanakikundi hao wa mazingira baada ya zoezi la kupanda miti.