MSAJILI MKUU ATUA MAHAKAMA BAGAMOYO, ATOA MAAGIZO KUMI NA MBILI MUHIMU

 Na Faustine Kapama – Mahakama.

Msajili Mkuu wa Mahakama ya Tanzania, Mhe. Wilbert Chuma, jana tarehe 14 Juni, 2022 alitembelea Mahakama ya Wilaya ya Bagamoyo kushuhudia shughuli mbalimbali za kimahakama na kutoa maagizo 12 yanayopaswa kufanyiwa kazi ili kuharakisha utoaji wa haki kwa wananchi.

Mhe. Chuma alipata pia nafasi ya kuongea na watumishi wa Mahakama hiyo na kubaini changamoto mbalimbali, ikiwemo mlundikano wa mashauri na kuagiza uwekwe mkakati wa kuuondosha haraka.

Katika mazungumzo yake, Msajili Mkuu pia alihimiza matumizi ya Teknolojia ya Habari na Mawasiliano (TEHAMA) katika kusajili na kusikiliza mashauri. Kadhalika, alielekeza watumishi kuendelea kuhuisha taarifa za mashauri kwenye mfumo wa JSDS2.

Amewahimiza Mahakimu kufikisha idadi ya mashauri 250 kwa mwaka ambayoyanaelekezwa na viongozi wa Mahakama. Sambamba na hilo, Msajili Mkuu aliwahimiza Mahakimu kuendelea kutoa nakala za hukumu na mwenendo wa mashauri kwa wakati.

Aidha, Mhe. Chuma aliwataka viongozi wa Mahakama hiyo kuendelea kuwa wabunifu katika kutatua changamoto mbalimbali za watumishi na zile ambazo hawana uwezo nazo kuziwasilisha katika mamlaka husika.

Msajili Mkuu pia alisisitiza maadili ya kazi,  kutekeleza maelekezo ya viongozi wa Mahakama, watumishi kufanya kazi kwa bidii na kuendelea kupendana, kufanya kazi kwa pamoja (team work) na kusaidiana katika kutatua changamoto mbalimbali zinazowakabili.

Kwa upande wake, Hakimu Mkazi Mfawidhi Mahakama ya Wilaya Bagamoyo Mhe. Sameera Suleman alimshukuru Msajili Mkuu kwa ujio wake. Alimjulisha kuwa wamejiwekea mkakati wa kumaliza mashauri ya mlundikano ifikapo tarehe 31 Julai, 2022 na kuahidi kuzingatia yote aliyowaelekeza.

Msajili Mkuu wa Mahakama ya Tanzania, Mhe. Wilbert Chuma akisaini kitabu cha wageni akipofika katika Mahakama ya Wilaya ya Bagamoyo jana tarehe 14 Juni, 2022.

Hakimu Mkazi Mfawidhi Mahakama ya Wilaya Bagamoyo Mhe. Sameera Suleman akimkaribisha Msajili Mkuu wa Mahakama ya Tanzania, Mhe. Wulbert Chuma.

Msajili Mkuu wa Mahakama ya Tanzania, Mhe. Wilbert Chuma akisalimiana na watumishi.

Msajili Mkuu wa Mahakama ya Tanzania, Mhe. Wilbert Chuma akiongea na watumishi.

Msajili Mkuu wa Mahakama ya Tanzania, Mhe. Wilbert Chuma akiwa katika picha za pamoja na watumishi (juu na chini).

Picha na 

(Katibu wa Msajili Mkuu wa Mahakama ya Tanzania, Mhe. Jovin Bishanga.)