ZITUMIENI SHERIA ZA KIELEKTRONIKI KUONGEZA UFANISI: DKT. MAMBI

Na Innocent Kansha – Mahakama, Dodoma.

Jaji wa Mahakama Kuu ya Tanzania, Kanda ya Dodoma, Mhe. Dkt. Adam Mambi amewahimiza Wahasibu na Wakaguzi wa Ndani wa Mahakama ya Tanzania kusoma, kuelewa na kuitumia Sheria ya Miamala ya Kielektroniki “Electronic Transaction Act” ya mwaka 2015 pamoja na Sheria ya Serikali Mtandao “e–Government Act” ya mwaka 2019 ili kuongeza weledi na ufanisi, kwani kwa kuzitafsiri vizuri itaongeza tija katika kutekeleza majukumu yao ya kila siku.

Akifanya mapitio ya tafsiri na matumizi ya Sheria hizo katika mafunzo ya Wahasibu na Wakaguzi wa Ndani yanayofanyika katika Ukumbi wa Kituo Jumuishi cha Utoaji Haki Jijini Dodoma hivi karibuni kama Mwezeshaji, Jaji Mambi alisema kuwa sheria hizo zinalenga utekelezaji wa Mpango Mkakati wa Mahakama kwenye nguzo zote za utawala, uwajibikaji na usimamizi wa rasilimali; haki kufikika na kupatikana kwa wakati na kuimarisha imani kwa umma na ushirikishwaji wa wadau.

“Malengo ya uwepo wa Sheria ya Miamala ya Kielektroniki ni kujielekeza katika kuweka utambuzi wa kisheria wa miamala ya kielektroniki, huduma za Serikali mtandao, matumizi ya Teknolojia ya Habari na Mawasiliano (TEHAMA) katika ukusanyaji wa ushahidi, kukubalika kwa ushahidi wa kielektroniki, urahisishaji wa matumizi ya sahihi salama za kielektroniki na mambo mengine mtambuka yanayohusiana na hayo”, Dkt. Mambi alisema.

Akifafanua sheria hiyo, Jaji Mambi alisema Sheria ya Miamala ya Kielektroniki namba 13 ya mwaka 2015 inaelekeza masuala mbalimbali ikiwemo malipo ya fedha kielekroniki, usimamizi wa fedha na pia utekelezaji wa sheria ya miamala ya kielektroniki. Amesema katika Sheria tajwa vifungu vya 13 na 15 ni muhimu katika utekelezaji wa majukumu ya kiuhasibu hasa kwenye kufanya malipo kimtandao.

“Kifungu cha 13 cha sheria ya miamala ya kielektroniki namba 13 ya mwaka 2015 kinazungumzia zaidi serikali mtandao, kinatambua matumizi ya serikali mtandao ama huduma za serikali mtandaoni (E-Government). Kifungu cha 15 cha sheria hiyo kinaelezea malipo na uwasilishaji wa stakabadhi kielektroniki na hayo mambo ni ya msingi katika utekelezaji wa shughuli za kihasibu, aliongeza Dkt. Mambi.

Kwa upande wa uhalali wa muamala wa kielektroniki, Jaji Mambi alisema, Kifungu cha  5, kifungu kidogo cha kwanza (1) kinaelekeza endapo sheria inahitaji taarifa au muamala kuwa katika namna iliyoainishwa isiyo ya kielektroniki au kimaandishi, masharti hayo yatakuwa yametimizwa na taarifa au muamala wa kielektroniki ambayo imewekwa katika namna sawa au inayokaribiana na namna maalum isiyo ya kielektroniki, inaweza kufikiwa na mtu mwingine kwa ajili ya rejea, ina uwezo wa kuhifadhiwa na mtu huyo mwingine. Alisema pia kuwa kifungu cha 5(2) na Kifungu kidogo cha pili (2) kitatumika iwapo katika maandishi ni ya lazima au iwapo sheria inaainisha madhara ya taarifa ambayo haiko kimaandishi.

Aidha, Dkt. Mambi alieleza kuwa, malipo ya fedha na utoaji wa stakabadhi kwa njia ya kielektroniki yameainishwa katika Kifungu cha 15 cha sheria hiyo kuwa, endapo sheria inahitaji malipo kufanyika, masharti hayo yatakuwa yametekelezwa iwapo malipo yatakuwa yamefanyika kwa njia ya kielektroniki na kukidhi masharti yoyote yaliyotolewa na sheria nyingine husika.

Kwa mujibu wa sheria hiyo, utoaji wa stakabadhi yoyote ya malipo, masharti hayo yatakuwa yametekelezwa iwapo stakabadhi hiyo itakuwa katika mfumo wa ujumbe wa kielektroniki na ujumbe kusomeka na unaeleweka kiasi kwamba unaweza kutumika katika rejea.

Washiriki wa mafunzo hayo ya Waasibu na Wakaguzi wa Ndani wakaombwa kutosita kutoa elimu waliyoipata kwa watumishi wengine ambao hawakupata nafasi hiyo adhimu ya kushiriki ili kuwajengea uwezo na uelewa wa pamoja katika kusukuma gurudumu la shughuli za taasisi.

Jaji wa Mahakama Kuu ya Tanzania, Kanda ya Dodoma, Mhe. Dkt. Adam Mambi (aliyesimama) akitoa mada ya mapitio na tafsiri ya matumizi ya Sheria ya Miamala ya Kielektroniki “Electronic Transaction Act” ya mwaka 2015 pamoja na Sheria ya Serikali Mtandao “e–Government Act” ya mwaka 2019 wakati wa mafunzo ya Wahasibu na Wakaguzi wa Ndani wa Mahakama ya Tanzania yanayoendelea Jijini Dodoma.

Jaji wa Mahakama Kuu ya Tanzania, Kanda ya Dodoma, Mhe. Dkt. Adam Mambi (mwenye tai nyekundu) akifafanua jambo wakati wa mafunzo hayo.

Jaji wa Mahakama Kuu ya Tanzania, Kanda ya Dodoma, Mhe. Dkt. Adam Mambi akiwa darasani.

Mhasibu Mkuu wa Mahakama ya Tanzania, Bw. Joseph Elikana akitoa mada wakati wa mafunzo ya Wahasibu na Wakaguzi wa Ndani wa Mahakama ya Tanzania yanayoendelea Jijini Dodoma.

Mhasibu Mkuu wa Mahakama ya Tanzania, Bw. Joseph Elikana (aliyenyoosha mikono) akitoa mada wakati wa mafunzo ya Wahasibu na Wakaguzi wa Ndani wa Mahakama ya Tanzania yanayoendelea Jijini Dodoma.

Meneja Bajeti Mradi wa Maboresho ya Mahakama ya Tanzania, Bw. Anthony Mfaume (aliyesimama) akitoa mada wakati wa mafunzo ya Wahasibu na Wakaguzi wa Ndani wa Mahakama ya Tanzania yanayoendelea Jijini Dodoma.

(Picha na Innocent Kansha - Mahakama.)