JAJI KIONGOZI ATEMBELEA UJENZI MAKAO MAKUU YA MAHAKAMA YA TANZANIA

Na Tiganya Vincent-Mahakama –Dodoma

Jaji Kiongozi wa Mahakama Kuu ya Tanzania, Mhe. Mustapher Siyani ametembelea miradi miwili ya Mahakama ya Tanzania Jijini Dodoma kukagua maendeleo ya utekelezaji wake.

Mhe. Siyani ameongozana na Jaji wa Mahakama ya Rufani, Mhe. Dkt. Gerald Ndika, Mtendaji Mkuu wa Mahakama ya Tanzania, Prof. Elisante Ole Gabriel na viongozi wengine wa Mahakama ambapo alitembelea mradi wa ujenzi wa jengo la Makao Makuu ya Mahakama Tanzania ambao ujenzi wake unatarajiwa kukamilika Desemba mwaka huu.

Mradi wa pili ambao umetembelewa na Jaji Kiongozi ni ujenzi wa nyumba za Majaji ambapo nyumba za Majaji wa Mahakama ya Rufaa zinatarajiwa kukamilika Desemba mwaka huu na zile za Majaji wa Mahakama Kuu zitakamilika mapema mwakani.

Akizungumza mara baada ya kutembelea miradi yote, Mhe. Siyani ameelezea kufurahishwa kwake na ujenzi wa ofisi mbalimbali zikiwemo za Majaji ambazo zitawapa mazingira mazuri ya kutekeleza majukumu yao na nyumba za Majaji zinatoa mazingira mazuri ya kuishi.

Mtendaji Mkuu wa Mahakama ya Tanzania amesema Mkandarasi anayejenga Makao Makuu ya Mahakama ndiyo anayejenga nyumba za Majaji na kuongeza kuwa kasi yake inaridhisha na ataweza kumaliza kwa muda waliokubaliana.

Amesema lengo ni kutaka kuhakikisha kuwa watumishi wote wa Mahakama ya Tanzania ambao wako Dar es salaam wanahamia Dodoma kama walivyoahidi.

Prof. Ole Gabriel amemshukuru Rais wa Jamhuri ya Muungano wa Tanzania, Mhe. Samia Suluhu Hassan kwa uwezeshaji ambao umesaidia kuboresha miundombinu ya majengo na kujenga jengo la kisasa la Mahakama ya Tanzania Jijini Dodoma.

Mwenyekiti wa Baraza la Uongozi wa Chuo cha Uongozi wa Mahakama na Jaji wa Mahakama ya Rufani, Mhe. Dkt. Gerald Ndika (mbele)akiwa ameongozana na Jaji Kiongozi Mustapher Siyani katika ziara ya kukagua maendeleo ya ujenzi wa Makao Makuu ya Mahakama ya Tanzania.

Jaji Kiongozi Mustapher Siyani (aliyenyosha mikono) akitoa maoni yake mara baada ya kukagua maeneo mbalimbali ya mradi wa  ujenzi wa Makao Makuu ya Mahakama ya Tanzania jijini Dodoma.

Msajili wa Mahakama Kuu, Mhe. Sharmillah Sarwatt (kushoto) akitoa mchango wake wakati wa ziara ya Jaji Kiongozi na Viongozi wengine kutembelea mradi wa ujenzi wa Makao Makuu ya Mahakama ya Tanzania na nyumba za Majaji jijini Dodoma.

Mtendaji Mkuu wa Mahakama ya Tanzania Prof. Elisante Ole Gabriel akitoa ufafanuzi kwa Mwenyekiti wa Baraza la Uongozi wa Chuo cha Uongozi wa Mahakama na Jaji wa Mahakama ya Rufani,  Mhe. Dkt. Gerald Ndika na  Jaji Kiongozi Mustapher Siyani wakati walikuwa katika ziara ya kukagua maendeleo ya ujenzi wa Makao Makuu ya Mahakama ya Tanzania.

Mtendaji Mkuu wa Mahakama ya Tanzania, Prof. Elisante Ole Gabriel akimwonyesha kitu Mwenyekiti wa Baraza la Uongozi wa Chuo cha Uongozi wa Mahakama na Jaji wa Mahakama ya Rufaa Mhe.Dkt. Gerald Ndika na  Jaji Kiongozi Mustapher Siyani wakati walikuwa katika ziara ya kukagua maendeleo ya ujenzi wa Makao Makuu ya Mahakama ya Tanzania. 

(Picha na Tiganya Vincent-Mahakama ya Tanzania)