MAHAKAMA MWANZA YAPOKEA BASI JIPYA KUTATUA CHANGAMOTO YA USAFIRI

Na Stephen Kapiga-Mahakama, Mwanza

Jaji Mfawidhi wa Mahakama Kuu ya Tanzania, Kanda ya Mwanza, Mhe. John Kahyoza jana tarehe 16 Agosti, 2022 amewakabidhi watumishi basi jipya aina ya TATA lililonunuliwa na Mahakama ya Tanzania ili kutatua changamoto ya usafiri iliyokuwa inawakabili.

Makabidhiano ya basi hilo jipya na la kisasa yalifanyika katika viwanja vilivyopo katika Kituo Jumuishi cha Utoaji Haki mara baada ya kukutana na watumishi wa Mahakama hiyo kwenye majadiliano yaliyolenga kutambua majukumu ya kila kada na kuboresha utendaji kazi za kimahakama kwa wananchi.

Bus hilo ambalo tayari limeanza kutoa huduma, hivyo kuwaondolea watumishi hao adha ya usafiri ya kuwahi ofisini na pia kurudi nyumbani ni miongoni mwa magari ya aina hiyo manne yaliyonunuliwa na Mahakama ya Tanzania hivi karibuni.

Mtendaji Mkuu wa Mahakama ya Tanzania, Prof. Elisante Ole Gabriel aliishukuru Serikali ya Jamhuri ya Muungano wa Tanzania inayoongozwa na Rais, Mhe. Samia Suluhu Hassan kwa kuwapa fedha za kununua magari manne kwa ajili ya usafiri kwa watumishi wake.

Prof. Ole Gabriel alitoa pongezi hizo jijini Dar es salaam hivi karibuni wakati akipokea magari hayo kutoka kwa Mkurugenzi wa Ununuzi na Ugavi wa Mahakama ya Tanzania, Bw. Charles Chale. Mtendaji Mkuu huyo alisema magari hayo yatapelekwa katika Kanda nne za Mahakama ambazo ni Morogoro, Shinyanga, Mwanza na Musoma.

Kabla ya makabidhiano ya basi hilo, Jaji Mfawidhi huyo aliendesha majadiliano na watumishi wote wanaohudumu katika Kituo hicho ambapo amewakumbusha kuzielewa hadidu rejea za kila kada ili kuweza kutoa huduma za kimahakama na kiutawala kwa viwango vinavyokubalika.

“Ni vizuri kwa kila mmoja wetu kujua majukumu yake kulingana na hadidu rejea za kufanya kazi ndani ya jengo hili. Pia tunatakiwa kutimiza matarajio ya wananchi ili tuweze kupimwa, kwani mwisho wa siku kila mmoja humu atapimwa utendaji kazi wake kwa kupitia kadi maalumu. Tuwe tayari kubadili utamaduni wetu wa utendaji kazi kutoka ule tuliokuwa nao hapo zamani,” alisema.

Akichangia katika majadiliano hayo, Msaidizi wa Sheria wa Jaji, Mhe. Geofrey Ndege alisema moja ya vitendo vinavyoweza kuondoa imani kwa jamii ni kuvujisha uamuzi na ushauri wa kisheria unaotolewa kwa Majaji kwa watu wasio stahili, hivyo akashauri watumishi kujiepusha na mambo kama hayo.

Majadiliano hayo yaliwawezesha watumishi kutambua kile ambacho wanatakiwa kutimiza na kile kinachotarajiwa kutoka kwao katika kuwahudumia wateja wote wa ndani na nje ya taasisi.

Aidha majadiliano hayo yameweza watumishi kuwa na mwanga jinsi ambavyo wanastahili kufanya kazi katika jengo hilo, hivyo kuwajengea uelewa wa pamoja wa nini cha kufanya na kuacha tamaduni gani.

Jaji Mfawidhi wa Mahakama Kuu ya Tanzania, Kanda ya Mwanza, Mhe. John Kahyoza (picha chini) akiongoza majadiliano yaliyowajumuisha watumishi wa kada zote ili kutambua majukumu yao. Baada ya majadiliano hayo, Mhe. Kahyoza aliwakabidhi watumishi hao basi jipya ili kutatua changamoto ya usafiri. Picha juu ni mwonekano wa basi hilo.

Jaji Mfawidhi wa Mahakama Kuu ya Tanzania, Kanda ya Mwanza, Mhe. John Kahyoza (katikati) akiwa na baadhi ya watumishi mara baada ya kuwakabidhi basi hilo jipya.

Baadhi ya madereva wakiwa katika picha ya pamoja mbele ya basi hilo.