WATUMISHI MAHAKAMA KUU MBEYA WATAKIWA KUTOA HUDUMA BORA KWA WATEJA

Na Ibrahim Mgallah, Mahakama Kuu-Mbeya

Jaji wa Mahakama Kuu ya Tanzania, Kanda ya Mbeya, Mhe. Dkt. Lillian Mongella amewasihi watumishi wa Mahakama katika Kanda hiyo kutoa huduma bora kwa wateja ili kufikia maono ya taasisi ya upatikanaji wa haki kwa wote na kwa wakati.

Mhe. Jaji Mongella, ambaye alimwakilisha Jaji Mfawidhi wa Mahakama Kuu ya Tanzania katika Kanda hiyo, Mhe. Rose Ebrahim alitoa wito huo hivi karibuni alipokuwa anafungua mafunzo elekezi yaliyowaleta pamoja watumishi wa kada mbalimbali waliwemo walinzi, madereva, wasaidizi wa kumbukumbu, wahudumu wa ofisi, makatibu mahsusi na Maafisa Utumishi au Tawala.

Aliwakumbusha watumishi hao kuwa sifa ya taasisi inaweza kuharibiwa na mtu mmoja asiyetoa huduma nzuri kwa wateja, hiuvyo kila mtumishi anatakiwa kutoa huduma bora kwa wateja ili kuendeleza sifa nzuri ya Mahakama. Kadhalika, aliwaomba watumishi hao kusikiliza kwa makini yote yatakayofundishwa na kuyafanyia kazi mara baada ya mafunzo.

Mafunzo hayo yaliyofanyika katika ukumbi wa mikutano Mahakama Kuu Mbeya yenye mada kuu inayohusu Huduma kwa Mteja ni mwendelezo wa mafunzo yanayofanywa na Mahakama ili kuwajengea uwezo watumishi wake.

Akiwasilisha mada katika mafunzo hayo, Jaji wa Mahakama Kuu Mbeya, Mhe. David Ngunyale amesema kila mtumishi anatakiwa kutoa huduma bora kwa namna ambayo mteja ataridhika. “Nawasihi mtoe huduma bora kwa namna ambayo wewe utaridhika na mteja ataridhika kwenye huduma aliyoipata,” Jaji Ngunyale aliwambia watumishi hao.

Vile vile akawataka watumishi hao kufanya kazi kwa amani na upendo na kuwasihi kuridhika na kile wanachikipata na kwamba wanatakiwa kutoa huduma kwa usawa na kuzingatia hali ya mtu. Aidha, Mhe. Ngunyale aliwakumbusha watumishi kutunza siri wanapotekeleza majukumu yao.   

Akihitimisha mafunzo hayo, Kaimu Mtendeji wa Mahakama Kuu Mbeya, Bw. Moses Luwoga aliishukuru kamati ya mafunzo kwa kuandaa mafunzo hayo. “Ni matumaini yangu kuwa mafunzo haya yataongeza ufanisi katika kuwahudumia wateja wanaofika kupata huduma mahakamani,” alisema. Pia aliwashukuru watumishi na mkufunzi kwa utayari wao wa kuhudhuria mafunzo hayo.      

 

 Jaji wa Mahakama Kuu ya Tanzania, Kanda ya Mbeya, Mhe. Dkt. Lillian Mongella akifungua mafunzo ya huduma kwa wateja kwa watumishi wa Mahakama hiyo.

Jaji wa Mahakama Kuu ya Tanzania, Kanda ya Mbeya, Mhe. David Ngunyale (picha chini kushoto) akieleza jambo alipokuwa anawasilisha mada kwenye mafunzo kwa watumishi hao (picha ya juu na chini).