WATUMISHI MAHAKAMA KUU MUSOMA MENO NJE WAKIPOKEA BASI JIPYA

 Na Francisca Swai- Mahakama, Musoma.

Watumishi wa Mahakama Kuu ya Tanzania Kanda ya Musoma wameushukuru uongozi wa Mahakama kwa kutatua changamoto ya usafiri baada ya kupatiwa basi jipya na la kisasa, tukio lililoibua furaha na kupokelewa kwa nderemo na vifijo.

Pongezi hizo zimetolewa hivi karibuni na watumishi hao mara baada ya kupokea basi hilo lililonunuliwa na Mahakama ya Tanzania. Wamesema basi hilo litatatua changamoto waliyokuwa nayo ya muda mrefu ya ukosefu wa usafiri wa uhakikia.

Kwa mujibu wa watumishi hao, kumekuwepo na changamoto ya usafiri hasa baada ya kuhamia katika Jengo la Mahakama Kuu Musoma tangu Desemba 2019 ambalo lipo umbali wa kilomita nane kutoka Musoma mjini.

Akiongea na watumishi hao katika ghafla hiyo fupi, Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya amewaasa watumishi kushirikiana kulitunza basi hilo ili liweze kudumu kwa muda mrefu na kuwasaidia katika usafiri kufika kazini kwa wakati.

Naye Mtendaji wa Mahakama Kanda ya Musoma, Bw. Festo Chonya amesisitiza utumiaji na utunzaji mzuri wa basi hilo ambalo limetatua kilio cha muda mrefu kwa watumishi hao. Alisema uwepo wa basi hilo litakalowezesha watumishi kufika kazini kwa wakati uwe ni chachu ya kujituma ili kuongeza tija katika shughuli za utoaji haki kwa wakati.

Hivi karibuni, Mtendaji Mkuu wa Mahakama ya Tanzania, Prof. Elisante Ole Gabriel aliishukuru Serikali ya Jamhuri ya Muungano wa Tanzania inayoongozwa na Rais, Mhe. Samia Suluhu Hassan kwa kuwapa fedha za kununua magari manne kwa ajili ya usafiri kwa watumishi wake.

Prof. Ole Gabriel alitoa pongezi hizo jijini Dar es salaam wakati akipokea magari hayo kutoka kwa Mkurugenzi wa Ununuzi na Ugavi wa Mahakama ya Tanzania, Bw. Charles Chale. Mtendaji Mkuu huyo alisema magari hayo yatapelekwa katika Kanda nne za Mahakama ambazo ni Morogoro, Shinyanga, Mwanza na Musoma.

Alisema upatikanaji wa magari hayo ni jitihada za Jaji Mkuu wa Tanzania, Mhe. Profesa Ibrahim Juma kuona watanzania wanapata haki kwa wakati, hivyo kama watumishi wakiwa na usafiri wa uhakika itasaidia kutekeleza azima hiyo.

Prof Ole Gabriel aliwataka watumishi na madereva watakaokabidhiwa magari hayo kuyatunza ili yaweze kufanya kazi kwa muda mrefu na kusaidia katika uendelezaji wa mnyororo wa utoaji haki kwa wakati.

Picha ya pamoja ya viongozi na watumishi wa Mahakama Kuu Musoma baada ya mapokezi ya basi hilo la Mahakama.

Viongozi na watumishi wa Mahakama Kuu Musoma wakiwa na nyuso za furaha ndani ya basi mara baada ya kufanya safari fupi kuashiria uzinduzi wake.

Dereva wa Mahakama Kuu ya Tanzania Musoma, Bw. Lambo Rashidi, akiwasili katika viwanja vya Mahakama Kuu Musoma akitokea Dar es Salaam alikokabidhiwa basi hilo.

Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya akiwa na Dereva, Bw. Lambo Rashidi, katika mapokezi ya basi la Mahakama.

Viongozi wa Mahakama Kuu Musoma wakiongea na watumishi wakati wa mapokezi ya basi hilo la Mahakama.

(Picha na Francisca Swai- Mahakama, Musoma).