MAJAJI WAASWA KUZINGATIA MISINGI YA HAKI KATIKA MAJUKUMU YAO

Na Innocent Kansha – Mahakama, Lushoto

Jaji wa Mahakama ya Rufani, Mhe. Augustine Mwarija amewaasa Majaji Wapya wa Mahakama Kuu ya Tanzania kufuata misingi ya kanuni, Sheria, taratibu na miongozo iliyowekwa ili kurahisisha utendaji kazi wa kila siku.

Akizungumza wakati wa mafunzo elekezi ya Majaji Wapya wa Mahakama Kuu ya Tanzania yanayoendelea katika Chuo cha Uongozi wa Mahakama Lushoto, Jaji Mwarija amewasisitiza Majaji kuwa waadilifu na imara wanapotekeleza majukumu yao na pia kuzingatia misingi ya haki wanapotoa uamuzi katika mashauri.  

“Mwananchi hatarajii kusikia au kuona Jaji anakosea kwa makusudi ama bahati mbaya kwa kuzingatia mamlaka aliyokasimiwa, hivyo hakuna bahati mbaya kwa mwananchi, mnapaswa kuzingatia misingi inayokubalika wakati wa kuwasikiliza na kutoa uamuzi ulio sahihi kwa wateja wenu,” aliongeza Jaji Mwarija.

Jaji Mwarija alisema, sheria ni nyingi, kanuni na miongozo mbalimbali inayotumika katika kazi za Majaji hivyo ni wajibu wa kila Jaji kuhakikisha anatimiza jukumu lake kikamilifu kwa kufuata misingi hiyo. Katika hali hiyo Majaji wanapaswa kuzingatia masuala muhimu wakati wa kusikiliza na kuamua mashauri ili kulinda hadhi ya kazi yao.

“Jaji anapaswa kuwa mtu huru wakati wote anaposikiliza na kuamua mashauri, na uhuru huo umeainishwa kwenye sheria mama yaani Katiba ya Jamhuri ya Muungano wa Tanzania ya mwaka 1977 kama ilivyofanyiwa marejeo mara kwa mara, katika Ibara ya 107B”, aliongeza Mhe. Mwarija.

"Ili kulinda uhuru wa Mahakama Jaji anapaswa kuwajibika kwa kufuata Katiba na sheria. Kwa mujibu wa kanuni za Jumuiya ya Madola za uwajibikaji na mahusiano ya Mihimili mitatu ya dola “Majaji wanapaswa kuwajibika kwa kuzingatia Katiba na Sheria wanazozitumia kwa uaminifu, kwa uhuru na kwa kuzingatia uadilifu. Kanuni hii ni msingi unaoleta imani kwa Umma, kwa Mahakama na kuimarisha umuhimu wa Mahakama kama moja ya mihimili ya dola ikiashiria msingi wa uwajibikaji kwa umma,” mwisho wa nukuu.

Jaji Mwarija, pia alielezea njia zinazotumika kulinda matumizi mabaya ya uhuru wa Mahakama kuwa ni kulinda uhuru wa Mahakama usitumike vibaya, kuna kanuni mbalimbali za kimaadili zilizoratibiwa na nyingine hazijaratibiwa zinazolinda uhuru huo, kanuni za mwenendo na kanuni za maadili za Maafisa wa Mahakama zilizoainishwa za mwaka 2020 chini ya kifungu namba 66 (2) (c) cha Sheria ya Uendeshaji wa Mahakama Sura ya 237 (Judiciary Administration Act Cap. 237).

Sheria hii inaelezea viwango vya kanuni za kimaadili anavyopaswa kuwa navyo na kuonyeshwa na Afisa wa Mahakama dhidi yake na kwa wengine, kwa uadilifu, usawa na kwa kutokuonyesha upendeleo.

Mafunzo hayo elekezi kwa Majaji ni sehemu ya utekelezaji wa sera ya mafunzo ya Mahakama ya mwaka 2019 inayoratibiwa na Chuo cha Uongozi wa Mahakama kwa kushirikiana na Mahakama ya Tanzania kwa watumishi wa Mahakama na Taasisi zingine za nje.

Jaji wa Mahakama ya Rufani, Mhe. Augustine Mwarija akizungumza na Majaji Wapya wa Mahakama Kuu ya Tanzania (hawapo pichani) wakati apokutana nao kwenye Mafunzo Elekezi yanayoendelea Chuo cha Uongozi wa Mahakama (IJA) Lushoto

Jaji wa Mahakama ya Rufani, Mhe. Augustine Mwarija akizungumza na sehemu ya Majaji Wapya wa Mahakama Kuu ya Tanzania wakati apokutana nao kwenye Mafunzo Elekezi yanayoendelea Chuo cha Uongozi wa Mahakama (IJA) Lushoto

Jaji wa Mahakama ya Rufani, Mhe. Augustine Mwarija (hayupo pichani) akizungumza na sehemu ya Majaji Wapya wa Mahakama Kuu ya Tanzania wakati apokutana nao kwenye Mafunzo Elekezi yanayoendelea Chuo cha Uongozi wa Mahakama (IJA) Lushoto

Sehemu ya Majaji Wapya wa Mahakama Kuu ya Tanzania wakimsikiliza Jaji wa Mahakama ya Rufani, Mhe. Augustine Mwarija (hayupo pichani) wakati apokutana nao kwenye Mafunzo Elekezi yanayoendelea Chuo cha Uongozi wa Mahakama (IJA) Lushoto

Majaji wa Mahakama Kuu ya Tanzania, Mhe. Kevin Mhina akichangia wakati wa mafunzo hayo

(Picha na Innocent Kansha - Mahakama)