NAIBU MSAJILI AFAFANUA MAZINGIRA MTUHUMIWA KUACHIWA HURU, KUKAMATWA TENA

Na Castilia Mwanossa (SAUT)

Naibu Msajili wa Mahakama Kuu ya Tanzania, Masijala Kuu, Mhe. Elimo Massawe amesema kitendo cha mtuhumiwa kuachiwa huru na kukamatwa tena kinatokana na mazingira yanayozunguka usikilizaji kabla au baada ya kuhitimishwa kwa shauri husika, ikiwemo uwasilishaji wa ushahidi mahakamani.

Akizungumza na waandishi wa habari leo tarehe 2 Septemba, 2022 ofisini kwake Jijini Dar es Salaam, Naibu Msajili huyo amesema kuwa pale upande wa mashtaka unaposhindwa kuthibitisha shitaka bila kuacha shaka yoyote hupelekea Mahakama kumwachia huru mshitakiwa. Amesema katika mazingira hayo mshitakiwa hawezi kukamatwa tena na kushitakiwa kwa makosa yale yale aliyokuwa nayo hapo awali.

Hata hivyo, Mhe. Massawe alifafanua kuwa Mahakama inaweza kumwachi huru mshitakiwa kwa baadhi ya mashitaka pale upande wa mashtaka unaposhindwa kukamisha upelelezi ndani ya siku 60. Amebainisha kuwa katika mazingira hayo mshitakiwa anaweza kukamatwa tena na kushitakiwa kwa makossa hayo hayo pale upande wa mashitaka unapokamilisha upelelezi.

Kadhalika, Naibu Msajili huyo alieleza kuwa pale upande wa mashtaka unapoamua kuondoa shitaka linalomkabili mshitakiwa kabla ya shauri dhidi yake halijafikia mwisho wa kusikilizwa, mfano baadhi ya makosa ambayo hayana ukomo wa siku 60 kama ya uhukumu uchumi, Mahakama inaweza kumwachia huru mshitakiwa na anaweza kukamatwa tena na kufunguliwa mashitaka hayo hayo.

“Ili mtu aambiwe hana hatia ni lazima kwa shauri la jinai liwe limesikilizwa na Mahakama ijiridhishe ushahidi uliopelekwa mahakamani haukidhi matakwa ya kisheria, huyo ndiye anayeambiwa yuko huru na hana hatia na hawezi kukamatwa tena. Kuna wengine wanaachiwa huru bila Mahakama kutamka kuwa hana hatia, tafsiri yake ni kwamba shauri lake halijasikilizwa kufika mwisho.

“Kifungu namba 225 cha Sheria ya Mwenendo wa Makosa ya Jinai kinataja aina ya mashauri ya jinai kuanzia siku yamefunguliwa kwa muda wa siku 60 upelelezi usipokamilika Hakimu ana mamlaka ya kuondoa shauri hilo mahakamani na kumwachia huru mshitakiwa, lakini haioneshi hana hatia. Jamhuri ikienda kukamilisha upelelezi, basi mshitakiwa atakamatwa tena na kushitakiwa kwa kosa lilelile,” alisema.

 Akizungumzia mchakato wa usajili wa mashauri mahakamani, Mhe.  Massawe amesema kila Mahakama kuanzia ngazi ya Mahakama ya Mwanzo huwa na utaratibu wake. Alisema katika Mahakama ya Mwanzo, mlalamikaji anapofika mahakamani huwasilisha madai na kujaza fomu na utaratibu ukikamilika shauri litasajiliwa na mhusika hupewa hati ya wito kwa upande wa pili.

Naibu Msajili huyo ameeleza kuwa mchakato wa usajili wa shauri la madai katika Mahakama ya Wilaya au Mahakama ya Hakimu Mkazi unaanzia kwa mlalamikaji kuandika hati ya madai kwa kuzingatia mamlaka ya Mahakama dhidi ya lalamiko lake na kuiwasilisha mahakamani ama kwa nakala ngumu au laini kupitia   mfumo wa Teknolojia ya Habari na Mawasiliano (TEHAMA) ambao kwa sasa ndio unaosisitwa na Mahakama ya Tanzania kutumika.

Amesema mfumo huo umerahisisha usajili, hivyo mtu anaweza kusajili shauri lake popote alipo bila ya kufika mahakamani na pale ambapo Hakimu Mfawidhi pamoja na watu wa masijala wakiridhika baada ya kupitia nyaraka zinazohusika kama zimekamilika na kukidhi matakwa ya kisheria, Mahakama itapanga tarehe ya kuanza mchakato wa kusikilizwa kwa shauri hilo.

Kwa upande wa mashauri ya jinai katika Mahakama ya Mwanzo, Mahakama ya Wilaya na Mahakama ya Hakimu Mkazi, Naibu Msajili huyo alisema mchakato huanzia kituo cha polisi na baadaye hati ya mashitaka huandaliwa ambayo huletwa mahakamani na baada ya kusajiliwa shauri hilo litakuwa tayari  kusikilizwa.

Mhe. Massawe pia ameeleza kuwa mashauri yanapofika Mahakama ya Mwanzo hayatakiwi kuzidi miezi sita na kwa sasa hayazidi miezi mitatu yanakuwa yameisha, lakini kwa Mahakama ya Wilaya na Mahakama ya Hakimu Mkazi hutakiwa kukamilika ndani ya miezi 12 kwa mashauri ambayo Mahakama hizo zina mamlaka ya kuyasikiza.

Kwa upande wa Mahakama Kuu na Mahakama ya Rufani, Naibu Msajili huyo alibainisha kuwa mashauri hutakiwa kumalizika kwa wastani wa kipindi cha miezi 24.

Naibu Msajili wa Mahakama Kuu ya Tanzania, Masijala Kuu, Mhe. Elimo Massawe akizungumza na waandishi wa habari (hawapo katika picha) ofisini kwake leo Jijini Dar es Salaam.

Naibu Msajili wa Mahakama Kuu ya Tanzania Masijala Kuu, Mhe. Elimo Massawe (katikati) akizungumza na waandishi wa habari ofisini kwake leo Jijini Dar es Salaam.