BILLIONI 18.3 ZIMETUMIKA KUJENGA MAHAKAMA ZA WILAYA 18: MTENDAJI MKUU

 

Na Tiganya Vincent-Mahakama ya Tanzania

Jumla ya shilingi bilioni 18 za Kitanzania zimetumika katika ujenzi wa majengo 18 ya Mahakama za Wilaya nchini.

Kauli hiyo imetolewa leo tarehe 25 Novemba, 2022 na Mtendaji Mkuu wa Mahakama ya Tanzania, Prof. Elisante Ole Gabriel wakati akitoa taarifa ya utekelezaji wa miradi hiyo kwenye halfa fupi ya uzinduzi wa Mahakama hizo ambao umefanyika katika viwanja vya Mahakama ya Wilaya ya Busega, mkoani Simiyu.

Akiziwasiliisha taarifa yake, Mtendaji Mkuu alimwambia Jaji Mkuu wa Tanzania, Mhe. Prof. Ibrahim Hamis Juma, ambaye alikuwa mgeni rasmi katika hafla hiyo, wananchi waliofurika katika viwanja hivyo pamoja na Watanzania waliokuwa wanafuatilia tukio hilo kupitia Televisheni ya Taifa kuwa ujenzi wa majengo hayo jumla ya shilingi bilioni 2.7 zimetumika kununulia samani kwa ajili ya ofisi mbalimbali za Mahakama hizo.

Kwa mujibu wa Prof. Ole Gabriel, majengo 18 ya Mahakama za Wilaya yaliyozinduliwa na Jaji Mkuu wa Tanzania yamejengwa kwa ufadhili wa mkopo nafuu uliotolewa na Benki ya Dunia kwa Serikali ya Tanzania.

Alisema kukamilika kwa majengo hayo kumesaidia kuboresha miundombinu ya Mahakama ambapo kati miradi hiyo 18, miradi 15 ni Mahakama mpya za Wilaya ambazo hazikuwa na huduma za Mahakama ya wilaya na tatu ni Mahakama za Wilaya zilizokuwa na majengo chakavu.

Prof. Gabriel alizitaja Mahakama za Wilaya zilizozinduliwa ni Nyang’ale, Mbongwe, Kaliua, Uvinza, Kakonko, Buhigwe, Kyerwa, Misenyi, Kilombero, Mvomero, Gairo, Songwe, Butiama, Rorya, Tanganyika, Itilima, Busega na Mkinga.

Alisema ujenzi wa miradi hiyo ambayo imetekelezwa na Wakandarasi wazawa ipo katika Mikoa tofauti hapa nchini na imezingatia mahitaji ya kisasa kwa wadau wa mnyororo wa utoaji haki ambapo zipo ofisi za Mawakili, Maafisa Magereza, Ustawi wa Jamii ambapo watu wenye mahitaji maalum na watoto wamewekewa vyumba vya kutumia wakiwa mahakamani hapo.

Mtendaji Mkuu aliongeza kuwa kuzinduliwa kwa majengo hayo katika Wilaya hizo 18 kutaongeza ufanisi na utoaji huduma kwa wananchi kwani majengo hayo yana mzingira rafiki ya utoaji wa huduma kwa wananchi kwa kutumia mfumo ya kitekinolojia.

Alisema ujenzi wa miradi hiyo ni sehemu ya utekelezaji wa Mpango Mkakati wa Mahakama wa Miaka mitano (5) wa 2020/21-2024/25 nguzo ya upatikanaji wa haki kwa wakati kupitia uboreshaji wa miundombinu ya majengo na kusogeza huduma za haki karibu na wananchi.

Mtendaji Mkuu wa Mahakama ya Tanzania, Prof. Elisante Ole Gabriel akiwasilisha taarifa ya mradi wa ujenzi wa Mahakama za Wilaya 18 katika hafla ya uzinduzi wa Mahakama hizo leo tarehe 25 Novemba, 2022.

Jaji Mkuu wa Tanzania Mhe.Prof. Ibrahim Hamis Juma (katikati) akiwa na viongozi mbalimbali wakiimba wimbo wa Taifa wakati wa hafla fupi ya uzinduzi wa majengo mapya ya Mahakama za Wilaya 18 iliyofanyika katika viwanja vya Mahakama ya Wilaya ya Busega  mkoani Simiyu.

Mkuu wa Mkoa wa Simiyu, Dkt. Yahya Nawanda akitoa salamu za Serikali ya Mkoa wakati wa hafla fupi ya uzinduzi wa majengo mapya ya Mahakama za Wilaya 18 nchini iliyofanyika leo katika viwanja vya Mahakama ya Wilaya ya Busega.

Mwakilishi Mkazi wa Benki ya Dunia Preeti Arora akitoa salamu ya Benki wakati wakati wa hafla fupi ya uzinduzi wa majengo 18 ya Mahakama za Wilaya ilifanyika leo katika viwanja vya Mahakama ya Wilaya ya Busega, mkaoni Simiyu.

Jaji Mfawidhi wa Kanda ya Shinyanga, Mhe.Athuman Matuma akitoa salamu za Kanda wakati wa hafla fupi ya uzinduzi wa majengo 18 ya Mahakama za Wilaya ilifanyika leo katika Viwanja vya Mahakama ya Wilaya ya Busega, mkaoni Simiyu.

Viongozi wa Mahakama na Taasisi mbalimbali wakifuatilia matukio mbalimbali wakati wakati wa hafla fupi ya uzinduzi wa majengo 18 ya Mahakama za Wilaya ilifanyika leo katika Viwanja vya Mahakama ya Wilaya ya Busega, mkaoni Simiyu.