JAJI MFAWIDHI TEMEKE ATOA UJUMBE MZITO KWA VIONGOZI WA DINI

• Mufti wa Kenya mambo safi

Na Faustine Kapama-Mahakama

Jaji Mfawidhi wa Kituo Jumuishi cha Masuala ya Familia Temeke, Mhe. Ilvin Mugeta amewaomba viongozi wa dini na Kamati ya Amani ya Jumuiya ya Maridhiano Tanzania kushirikiana na Mahakama ya Tanzania katika kurejesha maadili, kujenga taswila njema na kukuza imani kwa wananchi. 

Akizungumza wakati anafungua mafunzo ya siku mbili ya wajumbe wa Kamati hiyo leo tarehe 29 Novemba, 2022 katika ukumbi wa mikutano uliopo katika Kituo hicho Jumuishi jijini Dar es Salaam, Mhe. Mugeta amesema kuwa Mahakama inawashirikisha viongozi hao kwa kutambua mchango wao katika kujenga mtangamano wa kijamii.

“Mahakama ya Tanzania inaamini kuwa mkiwezesha jamii kutanzua migogoro kwa usuluhishi, kesi mahakamani zitapungua na itaishi kwa amani zaidi. Kazi na wajibu wenu wa kuhakikisha jamii inaishi kwa usuluhishi na maridhiano ni muhimu sana kwani utatuzi wa migogoro kwa njia hizo ni ishara ya kuwa na jamii iliyostaarabika,” alisema.

Jaji Mfawidhi huyo amewaambia viongozi hao kuwa kwa kufundisha na kuhimiza maisha yanayozingatia maadili miongoni mwa waamini wao kutatokomeza vitendo vya ufisadi nchini ambavyo huathiri sana shughuli za utoaji huduma na haki katika jamii.

Aidha, amewaomba wafuatilie kwa makini mada zikazowasilishwa katika mafunzo hayo ili waweze kufahamu majukumu ya Mahakama kikatiba katika kulinda amani ya nchi na Sheria ya uendeshaji wa Mahakama, Mpango Mkakati wa Mahakama na Maboresho katika Mahakama, mafanikio na changamoto.

Mhe. Mugeta amezitaja mada zingine zitakazowasilishwa kwenye mafunzo hayo, ikiwemo Biashara haramu ya utumwa wa kisasa, madawa ya kulevya  na madhara kwa jamii; Imani zenye misimamo mikali na athari katika jamii na Utamaduni wa Kiafrika au Kitanzania na ujio wa dini.

Mada zingine ni Uhusiano wa Mihimili ya nchi na namna inavyofanya kazi na dhana ya Serikali na Utawala bora na Rushwa katika Tanzania na changamoto za Rushwa kwa Mahakama.

Mhe. Mugeta amesema kuwa ni imani yake baada ya mafunzo hayo, viongozi hao wataifahamu vyema Mahakama na utendaji wake, hivyo kuwa mabalozi wake kwa kuwaelezea waumini wao mambo mazuri yanayofanywa na Mahakama katika kutekeleza wajibu wake wa kikatiba kwa maendeleo ya nchi.

“Tunatamani wananchi wafahamu kuwa Mahakama ni sehemu ya utatuzi wa migogoro kinyume na taswira iliyojengeka miongoni mwa baadhi ya wanajamii kwamba Mahakama ni mahali pa kufunga watu,” amesema.

Amewahakikishia viongozi hao kuwa Mahakama inawaona kama wadau muhimu na inathamini mchango wao katika utekelezaji wa majukumu yake. Amesema Mahakama itaendea kutoa ushirikiano kwa viongozi hao pale watakapouhitaji.

“Milango iko wazi, tunawakaribisheni muda wowote kwa ajili ya kutoa maoni, ushauri na mapendekezo ya kuboresha utoaji wa haki na utatuzi wa migogoro nchini,” amesema.

Akizungumza katika ufunguzi huo, Mufti wa Kenya Omar Aboubakar alisema kuwa Mahakama zinahitaji ushirikiano wa karibu na viongozi wa kidini ambao huchangia kwa kiasi kikubwa katika kurejesha maadili kwa wananchi, hivyo kupunguza au uondosha kwa kiasi kikubwa madhara mbalimbali katika jamii.

Amesema ushirikiano huo utaondoa hofu kwa wananchi kwamba mahakamani ni mahali panapoogofya, jambo ambalo sio kweli. “Mahakamani ni mahala pa zuri na salama, ambapo mtu atapata haki yake, atapata usawa na haki na usawa vikiwepo vitaleta amani katika jamii,” alisema.

Akitoa neno la utangulizi, Mkurugenzi Msaidizi Mafunzo wa Mahakama ya Tanzania, Bi. Patricia Ngungulu amesema Mahakama imeona ni vema kuwashirikisha viongozi hao ambao ni sehemu muhimu kwa jamii kwani kwa kupitia wao ujumbe utafika kwa waamini wanaowahudumia kwa kuwaelimisha kuhusiana na mmomonyoko wa maadili katika jamii.

“Ni rahisi watu wakaelimishwa wakiwa Makanisani au Misikitini kuhusu ubaya wa utendaji wa makosa kama ubakaji, utumiaji wa madawa ya kulevya, mauaji, unyang’anyi na mengine na wakaweza kubadilika kimienendo na kifikira na hatimae kuwa na jamii nzuri na kupungua kwa matendo hayo kama si kumalizika kabisa,” amesema.

Jaji Mfawidhi wa Kituo Jumuishi cha Masuala ya Familia Temeke, Mhe. Ilvin Mugeta akizungumza wakati wa ufunguzi wa mafunzo ya viongozi wa dini jijini Dar es Salaam leo tarehe 29 Novemba, 2022.

Mufti wa Kenya Omar Aboubakar akiwasilisha salamu katika hafla ya ufunguzi wa mafunzo hayo.

Mkurugenzi Msaidizi Mafunzo wa Mahakama ya Tanzania, Bi. Patricia Ngungulu akitoa neno la utangulizi katika hafla hiyo.

Wawezeshaji katika mafunzo hayo wakitafakari jambo.

Meza kuu ikiongozwa na Jaji Mfawidhi wa Kituo Jumuishi cha Masuala ya Familia Temeke, Mhe. Ilvin Mugeta (katikati) ikifuatilia utambulisho wa viongozi wa dini mbalimbali wanaohudhuria mafunzo hayo. Wengine ni Naibu Msajili wa Mahakama Kuu  ya Tanzania, Mhe. Martha Mpaze (kushoto) na Mwenyekiti wa Kamati za Amani na Jumuiya za Maridhiano Tanzania, Alhaji Musa Salum.

Sehemu ya viongozi wa dini wanaohudhuria mafunzo hayo.

Meza kuu ikiongozwa na Jaji Mfawidhi wa Kituo Jumuishi cha Masuala ya Familia Temeke, Mhe. Ilvin Mugeta (katikati waliokaa) ikiwa katika picha ya pamoja na viongozi wakuu wa  Kamati ya Amani ya Jumuiya ya Maridhiano Tanzania.

Meza kuu ikiongozwa na Jaji Mfawidhi wa Kituo Jumuishi cha Masuala ya Familia Temeke, Mhe. Ilvin Mugeta (katikati waliokaa) ikiwa katika picha ya pamoja na viongozi wa dini (juu na chini) wanaohudhuria mafunzo hayo.

Meza kuu ikiongozwa na Jaji Mfawidhi wa Kituo Jumuishi cha Masuala ya Familia Temeke, Mhe. Ilvin Mugeta (katikati waliokaa) ikiwa katika picha ya pamoja na Sekretarieti ya Mafunzo na baadhi ya wajumbe wa menejimenti.

Meza kuu ikiongozwa na Jaji Mfawidhi wa Kituo Jumuishi cha Masuala ya Familia Temeke, Mhe. Ilvin Mugeta (katikati waliokaa) ikiwa katika picha ya pamoja na baadhi ya Waandishi wa Habari waliohudhuria ufunguzi wa mafunzo hayo.