KITUO JUMUISHI TEMEKE, MABENKI WAKUBALIANA KUMALIZA MASHAURI KWA WAKATI

Na Lordgard Kilala – Kituo Jumuishi Temeke

Kituo Jumuishi cha Masuala ya Familia Temeke kimesaini hati ya makubaliano na Chama cha Mabenki Tanzania (Tanzania Banking Association) ili kuharakisha utoaji haki kwenye mashauri yanayohusu mirathi na ndoa.

Makubaliano hayo yaliingiwa hivi karibuni wakati wa kikao cha kawaida cha kusukuma mashauri ya madai kilichohusisha wadau wa haki madai ya mirathi na ndoa kutoka taasisi mbalimbali, ikiwemo Wizara ya Ardhi, Nyumba na Maendeleo ya Makazi.

Wadau wengine waliohudhuria kikao hicho ni Taasisi za Kifedha, Wakala wa Usajili Ufilisi na Udhamini (RITA), Mifuko ya Hifadhi ya Jamii, Mtandao wa Watoa Msaada wa Kisheria Tanzania (TANLAP), Chama cha Mawakili wa Tanganyika, Chama cha Mabenki Tanzania, Mawakili na wenyeji kutoka Mahakama.

Makubaliano hayo ni matokeo ya majadiliano yaliyoanza tarehe 23 Septemba 2022 kuhusu namna bora ya kuharakisha utekelezaji wa hukumu ya haki mirathi kwa kupunguza vigezo vinavyohitajika na mabenki kwenye kufunga akaunti ya marehemu na kuhamisha fedha kwenda kwenye akaunti ya amana ya mirathi.

Hatua hiyo ilifikiwa baada ya uwepo wa taasisi kama mabenki zinazohusika kwenye mnyororo wa malipo ya mirathi ambapo Mahakama haina udhibiti wa moja kwa moja katika shughuli zao.

Akizungumza katika kikao hicho, Jaji Mfawidhi wa Kituo hicho, Mhe. Ilvin Mugeta alieleza changamoto ambayo Mahakama hukabiliana nayo katika kushughulikia mashauri ya masuala ya familia, ikiwemo Mahakama kutokuwa na uthibiti wa moja kwa moja kwenye shughuli za kibenki.

"Kama hakuna pingamizi la kupinga msimamizi wa mirathi au uhalali wa wosia, shauri halizidi miezi sita kuanzia Mahakama ya Mwanzo hadi Mahakama Kuu. Baada ya hapo, michakato inayofuata kuhakikisha msimamizi wa mirathi anatekeleza majukumu yake inahusisha taasisi zingine ambazo Mahakama haina udhibiti nazo."

Jaji Mugeta alitoa mifano baadhi ya changamoto hizo kama muda unaotumika kuhamisha umiliki wa ardhi kutoka kwa marehemu kwenda kwa msimamizi wa mirathi na kisha kwenda kwa warithi, muda wa kukamilisha malipo ya michango ya waajiri au waajiriwa kwa marehemu kwenye mifuko ya hifadhi ya jamii pamoja na uchelewaji wa matangazo magazetini.

“Hapo kuna changamoto ambazo kama zisipodhibitiwa au kuwekewa utaratibu hata kituo hiki kitaingia kwenye orodha ya Mahakama zinazochelewesha mashauri. Hizo changamoto haziwezi kutatuliwa kama wadau hatukutani, kukaa na kuzungumza kutafuta suluhu inayokusudiwa. Kwa kuwa muda ambao Mahakama imejiwekea kufunga shauri siyo lazima uwe muda ambao taasisi hizo zimejiwekea kuhudumia wateja wao.” alisisitiza.

Naye Mkurugenzi wa Chama cha Mabenki Tanzania (Tanzania Banking Association), Bi Tusekelege Joune, akiwasilisha salamu za taasisi hiyo kabla ya zoezi la utiaji saini hati ya makubaliano alisema, “Kama Taasisi ya Mabenki tunaahidi ushirikiano kwani hili jambo linagusa maisha ya kila Mtanzania na wateja wetu.”

Akifafanua kuhusu makubaliano yatakayowezesha kasi ya huduma za kibenki kwenye mashauri ya mirathi, Bi. Joune aliendelea kusema, “Sisi kama sekta ya mabenki hatutaki kuwa kikwazo kumpa haki anayestahili, hivyo tutajidhatiti kutekeleza mambo tuliyokubaliana wala hatutegemei kupishana katika utekelezaji kwa kuwa makubaliano haya tunayaelewa na tulishiriki kuyaandaa.”

Akielezea hali iliyopo kwa sasa katika usikilizaji wa mashauri katika Kituo Jumuishi hicho, Naibu Msajili Martha Mpaze alisema kuwa kasi ya uondoshaji inaridhisha kwani tangu  huduma ilipoanza tarehe 25 Mwezi Octoba, 2021 hadi tarehe 17 Novemba, 2022, jumla ya mashauri 8,330 kwa aina zote yalifunguliwa ambapo mashauri 6,465 yameshatolewa uamuzi, sawa na asilimia 78, huku mengine 1,865 yakiwa bado yanaendelea kusikilizwa, ambayo ni sawa na asilimia 22.

Mhe. Mpaze hakuacha kuzungumza kuhusu hali ya mlundikano ambapo alisema katika Kituo hicho siyo changamoto ukilinganisha na Mahakama nyingine. Amesema kwa mujibu wa utaratibu wa ndani wa kujipima, viwango walivyojiwekea vipo juu kuliko vilivyowekwa na Mahakama ya Tanzania.

Mkurugenzi Mtendaji chama cha Mabenki Tanzania, Bi. Bi Tusekelege Joune (kulia) na Naibu Msajili Mahakama Kuu Temeke, Mhe. Martha Mpaze (kushoto) wakisaini nyaraka za hati ya makubaliano.

Mkurugenzi Mtendaji chama cha Mabenki Tanzania, Bi. Bi Tusekelege Joune (kulia) na Naibu Msajili Mahakama Kuu Temeke, Mhe. Martha Mpaze (kushoto) wakionyesha nyaraka za hati ya makubaliano baada ya utiaji saini.

Jaji Mfawidhi wa Kituo Jumuishi cha Masula ya Familia, Mhe. Jaji Ilvin Mugeta (katikati) akisisitiza jambo kabla ya utiaji sahihi hati ya makubaliano. Kushoto ni Jaji wa Mahakama Kuu Temeke, Mhe. Jaji Asina Omari na kushoto ni Naibu Msajili wa Mahakama Kuu Temeke Martha Mpaze.

Wadau mbalimbali wa haki madai ya mirathi na ndoa wakishuhudia zoezi la utiaji saini hati ya makubaliano.

Wadau mbalimbali wa haki madai ya mirathi na ndoa wakisikiliza kwa makini mijadala katika kikao cha kusukuma mashauri ya madai kabla ya zoezi la utiaji saini hati ya makubaliano.