TAWJA MCHAKAMCHAKA HADI VIJIJINI

Na Angel Meela-Mahakama, Arusha

Chama cha Majaji na Mahakimu Wanawake Tanzania (TAWJA) kimeandaa mafunzo ya siku tatu kwa ajili ya kuwapika wakufunzi wa kitabu cha masuala ya kijinsia ya wanawake na watoto watakaozunguka nchi nzima kutoa mafunzo kuhusu kitabu hicho.

Mafunzo hayo yaliyoanza jana tarehe 11 Novemba, 2022 jijini hapa ni mwendelezo wa yale yaliyofanyika Bagamoyo hapo awali na pia ni utelekelezaji wa agizo la Rais wa Jamhuri ya Muungano wa Tanzania, Mhe. Samia Suluhu Hassan aliyoyatoa alipokua akizindua kitabu hicho tarehe 20 Octoba, 2021 Ikulu jijini Dar es Salaam.

Kitabu hiki chenye jina "TANZANIA GENDER BENCH BOOK ON WOMEN’S RIGHTS” ambacho kimeandikwa na timu wa wanachama wa TAWJA na kufadhiliwa na UN Women kupitia Ubalozi wa Sweden kimeandaliwa mahususi kitumike kama nyenzo kwa watoa uamuzi na wadau wa haki wakati wa rejea za mashauri yenye mtazamo wa kijinsia.

Akifungua mafunzo hayo, Jaji Mfawidhi wa Mahakama Kuu ya Tanzania, Kanda ya Arusha, Mhe. Joachim Tiganga alisema kuwa anafahamu hatua hiyo ni utekelezaji wa maelekezo Rais wa Tanzania yenye nia ya kufikisha injili hiyo ya haki kwa watanzania na wadau wengi zaidi. 

“Ninafarijika na kufurahishwa na kazi mbalimbali za kitaaluma na kijamii wanazozifanya wanachama wa TAWJA, licha ya ratiba ngumu sana na nafasi nyeti walizonazo katika tasnina ya utoaji haki kitaifa na kimataifa bado wanapata muda wa kufanya shughuli za kitaaluma na kijamii,” alisema.

Mhe. Tiganga alisema kuwa wameshuhudia kwa upana na unyeti wake wanachama wa TAWJA wakiwa mahiri kuhakikisha haki sawa kwa wote inapatikana na kukuza utawala wa sheria kwa takribani miaka 22 tangu kuundwa kwa chama hicho 2000.

“Niwapongeze na kuwataarifu kuwa mnastahili kujivunia juhudi na mafanikio hayo, kwani si rahisi kuelewa ni jinsi gani mnaweza kufanya yote haya bila kuathiri majukumu yenu ya utoaji haki kitaifa na kimataifa, ikizingatiwa kuwa hata Rais wa Makakama ya Afrika ya ya Haki za Binadamu na Watu ni zao la umoja huu," alisema.

Sambamba na hilo, Jaji Mfawidhi huyo alisisitiza kuwa anatambua jitihada za kubadilishana uzoefu kitaaluma miongoni mwao katika kazi ya utoaji haki wanayoifanya TAWJA ambapo katika juhudi hizo wanaume hawajaachwa nyuma, na ndiyo maana hata katika orodha ya washiriki na wawezeshaji wapo wanaume wa kutosha.

Aidha, aliwaeleza kuwa haki za kijinsia si kwa wanawake na watoto pekee, wapo wanaume wengi nao wanapitia magumu katika maeneo mbalimbali na tayari baadhi yao wamefunguka na wameunda chama chao kinaitwa “Chama cha Wanaume Wanaopigwa na Wake zao Majumbani (CHAWAWAWAMA)”

“Rais wao amejitambulisha kuwa anaitwa Bw. Ernest Josephat Komba, ambaye anapatikana U-tube. Huduma na mafunzo mtakayo kwenda kuyatoa ni vyema pia yakazingatia kundi hili ambalo kwa muda mrefu limekuwa halina msaada matokeo yake ni taarifa nyingi tunazosikia za wanaume kujinyonga," alisema.

Mhe. Tiganga aliwapongeza wanachama wa TAWJA kwa juhudi kubwa wanazozifanya na amewaasa kuendelea kazi vizuri zaidi na kuyatumia mafunzo hayo kama chachu ya mabadiliko ya kumpatia mwanamke na mtoto haki na heshima anayostahiki katika jamii ya kitanzania.

Alisema kuwa kufanyika kwa mafuzo hayo ni sawa na kuwasha Mwenge ambao utafika kila kijiji ukiwamulikia wanaohitaji elimu ya haki ambayo walengwa wote wataipata ili iwaweke huru.

Jaji Mfawidhi wa Mahakama Kuu ya Tanzania, Kanda ya Arusha, Mhe. Joachim Tiganga akizungumza wakati wa ufunguzi wa mafunzo hayo.

Washiriki wa mafunzo wakifuatilia ufunguzi wa mafunzo.

Mweka Hazina wa TAWJA akizungumza jambo.

Meza kuu ikiwa katika picha ya pamoja pamoja na wageni waalikwa kutoka Mahakama ya Arusha.

Picha ua washiriki wote wa mafunzo.