Na Faustine Kapama-Mahakama
Mahakama Kuu ya Tanzania Divisheni
ya Makosa ya Rushwa na Uhujumu Uchumi leo tarehe 29 Disemba, 2022 imeendesha
mafunzo maalumu kwa ajili ya kuwaandaa watumishi wa Mahakama hiyo kuanza
kusikiliza mashauri bila kutumia karatasi (paperless proceedings) kuanzia mwezi
ujao.
Akizungumza wakati anafungua mafunzo
hayo, Kaimu Jaji Mfawidhi wa Divisheni hiyo, Mhe. Godfrey Isaya aliwataka
watumishi hao kutambua kuwa wanapaswa kufahamu fikapo tarehe 1 Januari, 2023 wataanza
kusikiliza mashauri bila kutumia karatasi ikiwa ni utekelezaji wa maagizo
kuelekea matumizi kamili ya Mahakama Mtandao (e – judiciary).
“Matumizi ya teknolojia hii
mahakamani yatawezesha uharakishaji wa utoaji haki kwa wananchi kwa wakati,” Mhe.
Isaya aliwaeleza washiriki wa mafunzo hayo ambayo yamefanyika kwa siku moja kwenye Ukumbi
wa Maktaba wa Divisheni hiyo mkoani Dar es Salaam chini ya wawezeshaji mahiri
waliotoka katika Mahakama ya Wilaya Kigamboni na Mahakama ya Hakimu Mkazi
Kinondoni.
Mahakama ya Wilaya ya Kigamboni iliyopo katika Mkoa wa Dar es Salaam ni Mahakama
ya mfano katika matumizi ya mtandao kwenye usikilizaji wa mashauri bila kutumia
karatasi.
Naye Mtendaji wa Divisheni hiyo, Bi.
Masalu Kisasila, akizungumza katika hafla hiyo ya ufunguzi, alisema mafunzo
hayo yameandaliwa kwa watumishi wa kada zote katika Divisheni hiyo.
Amesema lengo kuu la mafunzo hayo ni
kupata uelewa wa pamoja kuhusu utekelezaji kwa vitendo wa safari kuelekea
matumizi kamili ya Teknolojia ya Habari na Mawasiliano (TEHAMA) katika
usikilizaji wa mashauri bila kutumia karatasi (paperless) kuanzia tarehe 1
Januari, 2023 katika Divisheni hiyo.
Hivyo, aliwasihi watumishi hao wakati
wa mafunzo hayo kuwa wasikivu na wasisite kuuliza maswali pale watakapoona
hawajaelewa ili kuleta tija kwenye matumizi ya TEHAMA kwa kuwa Mahakama ya
Tanzania ilishafanya uwekezaji mkubwa kwenye eneo hilo.
Mtendaji wa Mahakama hiyo aliwaahidi
wawezeshaji kuwa Divisheni ya Makosa ya Rushwa na Uhujumu Uchumi itakuwa ya
mfano wa kuigwa ukiondoa ya Kigamboni, ambapo Mahakama zingine zitafika
kujifunza kuhusu matumizi ya mfumo huo.
Mmoja wa wawezeshaji katika mafunzo
hayo, Hakimu Mkazi Mfawidhi wa Mahakama ya Wilaya Kigamboni, Mhe. Is–haq Bakari
Kuppa, akizungumza wakati anawasilisha mada katika mafunzo hayo alieleza kuwa tafsiri rahisi na nyepesi ya maana ya “paperless” katika
usikilizaji wa mashauri ni “mtu mmoja anaongea na mwingine anachapa maelezo ya
mzungumzaji.”
Hivyo, aliwasilihi watumishi hao kutokuwa
na hofu wakati watakapoanza rasmi matumizi ya “paperless”. Naye mwezeshaji mwingine,
ambaye ni Msaidizi wa Kumbukumbu katika Mahakama ya Hakimu Mkazi Kinondoni, Bw.
Oscar Maiseli aliwapitisha watumishi wenzake kwenye mfumo halisi wa mtandao.
Bw. Maiseli aliwaonesha hatua zote
kuanzia usajili wa shauri kwa mfumo na kuongeza nyaraka mbalimbali za
kimahakama, mfano maelezo ya mashahidi, vielelezo na mwenendo wa shauri hadi
kuweka nakala ya hukumu kwenye mfumo.
Kadhalika, alieleza kuwa matumizi ya
“paperless” yanakwenda sambamba na uwepo wa jalada gumu kwa kuhifadhi nyaraka
ngumu zilizochapwa kwenye mfumo kwa ajili ya rejea (backup file). “Jalada hili
halina “handwritten proceedings” yaani mwenendo wa shauri ulioandikwa kwa mkono,”
alisema.
Wawezeshaji wa mafunzo ya "paperless" ambao ni Hakimu Mkazi Mfawidhi wa Mahakama ya Wilaya ya Kigamboni, Mhe. Is-haq Bakari Kuppa (aliyesimama kulia) na Msaidizi wa Kumbukumbu kutoka Mahakama ya Hakimu Mkazi Kinondoni, Bw. Oscar Maiseli (aliyeinama) wakiandaa mada za kuwasilisha kwa watumishi wa Divisheni ya Makosa ya Rushwa na Uhujumu Uchumi.
Hakuna maoni:
Chapisha Maoni