WATUMISHI WA MAHAKAMA WAANZA KUHAMIA MAKAO MAKUU JIJINI DODOMA

Na Tiganya Vincent-Mahakama, Dodoma

Mtendaji Mkuu wa Mahakama ya Tanzania, Prof. Elisante Ole Gabriel jana tarehe 29 Disemba, 2022 ameongoza timu ya kwanza ya watumishi kuhamia katika jengo la Makao Makuu ya Mahakama ya Tanzania lililopo jijini hapa ambapo inategemewa kuwa hadi kufikia mwisho wa mwaka huu wa fedha awamu zote za watumishi wanaotakiwa kuhamia Dodoma zitakuwa zimekamilika.

Akizungumza akiwa ofisini kwake katika jengo hilo jipya na la kisasa, Prof. Ole Gabriel amemshukuru Jaji Mkuu wa Tanzania, Mhe. Prof. Ibrahim Hamis Juma kwa uongozi wake mahiri ambao umewezesha mpango wa kuanza kuhamia katika Makao Makuu ya Mahakama tarehe 29 Disemba, 2022 kufanikiwa kama ulivyopangwa. Amesema hatua hiyo imefanya Mhimili wa Mahakama kuanza kuungana na Mihimili Mingine (Serikali Kuu na Bunge) ambayo imeshahamia Dodoma.

Mtendaji Mkuu amesema kuwa mradi wa ujenzi wa jengo hilo hadi kukamilika kwakwe utagharimu jumla ya shilingi bilioni 129.7 za Kitanzania. Amesema jengo hilo lina ukubwa wa mita za mraba 60,000, hivyo kulifanya liwe la sita kwa ukubwa duniani kwa Makao Makuu za Mahakama. Prof. Ole Gabriel akabainisha kuwa kazi kubwa iliyopo sasa ni kuweka samani na kazi zingine za nje ili kunadhifisha mazingira na jengo lenyewe. Amesema baada ya hatua hizo taratibu za uzinduzi wa jengo hilo zitafanyika kwa itifaki stahiki.

Aidha Mtendaji Mkuu huyo wa Mahakama aliishukuru Serikali ya Awamu ya Sita inayoongozwa na Rais wa Jamhuri ya Muungano wa Tanzania, Mhe. Dkt. Samia Suluhu Hassan kwa msukumo mkubwa katika mradi huo ambao umeiwezesha Mahakama ya Tanzania nayo kuwa na Makao Makuu yake na jengo la hadhi ya juu.

Naye Mkurugenzi wa Utawala na Rasilimali Watu wa Mahakama ya Tanzania Beatrice Parick, akizungumza katika halfa hiyo fupi alisema watumishi wamefurahi kuhamia Dodoma kwa kuwa wamepata mazingira mazuri ya kufanyia kazi ambayo yatawasaidia katika kuongeza ufanisi wa utoaji wa huduma za haki kwa wananchi.

Aliongeza kuwa uwepo wa viwanja vya michezo mbalimbali katika eneo hilo utatoa fursa kwa watumishi wa Mahakama ya Tanzania Makao Makuu kufanya mazoezi ambayo yatawasaidia kujikinga na magonjwa yasiyo ya kuambukizwa.

Kwa upande wake, Mshauri Elekezi wa Kampuni ya Arqes Africa Architects and Interior Designers Ltd, Bi. Rose Nestory, akizungumza wakati wa kukabidhi jengo hilo alisema hivi sasa watumishi wa Mahakama wanaruhusiwa kuanza kulitumia kwa malengo yaliyokusudiwa kwani kazi zilizobakia hazitaathiri utendaji wao wa kazi. Bi. Rose ameshukuru uongozi wa Mahakama kwa kuwaamini kama wabunifu wa jengo na pia Mkandarasi CRJE ambaye amefanya kazi ya ujenzi.

Mwonekano kwa nje wa sehemu ya jengo la Makao Makuu ya Mahakama ya Tanzania lililopo jijini Dodoma. Mahakama ya Tanzania imeanza kuhamia Dodoma kuanzia tarehe 29 Disemba, 2022.

Mtendaji Mkuu wa Mahakama ya Tanzania, Prof. Elisante Ole Gabriel (kushoto) akipokea hati ya matumizi ya sehemu ya jengo la Makao Makuu ya Mahakama ya Tanzania kutoka kwa Mshauri Elekezi wa Kampuni ya Arqes Africa Architects and Interior Designers Ltd, Msanifu Rose Nestory (katikati).

Mtendaji Mkuu wa Mahakama ya Tanzania, Prof. Elisante Ole Gabriel akiwa ofisini kwake katika jengo jipya la Makao Makuu ya Mahakama ya Tanzania jijini Dodoma.

Mtendaji Mkuu wa Mahakama ya Tanzania, Prof. Elisante Ole Gabriel (katikati) akiwa katika picha ya pamoja na Wakandarasi waliojenga jengo la Makao Makuu ya Mahakama ya Tanzania.

Mtendaji Mkuu wa Mahakama ya Tanzania, Prof. Elisante Ole Gabriel (mwenye miwani) (picha ya juu na chini) akipata maelezo ya maeneo ya jengo la Makao Makuu ya Mahakama ya Tanzania kutoka kwa Mshauri Elekezi wa Kampuni ya Arqes Africa Architects and Interior Designers Ltd, Msanifu Rose Nestory (aliyenyosha mikono).

Mtendaji Mkuu wa Mahakama ya Tanzania Prof. Elisante Ole Gabriel (katikati) na Mkurugenzi wa Utawala na Rasilimali watu wa Mahakama ya Tanzania, Bi. Beatrice Patrick (kushoto) wakipata maelezo kutoka kwa Mshauri Elekezi wa Kampuni ya Arqes Africa Architects and Interior Designers Ltd, Msanifu Rose Nestory (kulia).

Mtendaji Mkuu wa Mahakama ya Tanzania Prof. Elisante Ole Gabriel(kushoto) akikagua sehemu ya maliwato kwa ajili ya watu wenye mahitaji Maalum iliyopo katika jengo la Makao Makuu ya Mahakama ya Tanzania mjini Dodoma. Kulia ni Msahauri Mwelekezi kutoka Kampuni ya Arqes Africa Architects and Interior Designers Ltd, Msanifu Rose Nestory (katikati).

(Picha na Tiganya Vincent-Mahakama ya Tanzania)