‘HAKUNA KULALA MATUMIZI YA TEHAMA MAHAKAMANI’

Na Faustine Kapama-Mahakama, Kigoma

Mkurugenzi Msaidizi wa Teknolojia ya Habari na Mawasiliano (TEHAMA) wa Mahakama ya Tanzania, Bw. Allan Machela amewahimiza watumishi wa Mahakama za Wilaya mpya za Buhigwe, Kakonko, Uvinza, Kaliua na Tanganyika kwenda sambamba na madadiliko yanayoendelea hivi sasa mahakamani, hasa katika matumizi ya teknolojia mpya katika shughuli za utoaji haki kwa wananchi.

Akiwasilisha mada kuhusu Matumizi ya Vifaa vya TEHAMA katika siku ya tatu ya mafunzo ya huduma bora kwa mteja yanayofanyika katika Kituo cha Kigoma, Bw. Machela amesema watumishi wa Mahakama hizo hawana budi kuendelea kujifunza juu ya mabadiliko hayo kwa kuwa wanaenda kuhuduma katika majengo mapya ambayo yamefungwa vifaa na mifumo ya kisasa.

“Msilale usingizi, msijisahau kwenye matumizi ya TEHAMA kwa sababu TEHAMA ipo kila mahali, ukilala, ukiamka, ukitembea ni TEHAMA. Kwa hiyo ukilala, umeachwa. Naomba muendelee kujifunza na kujikumbusha mara kwa mara, kimbieni kwa mwendo huu wa madadiliko ya teknolojia hasa kwenye shughuli za kimahakama, hakuna kulala,” alisema.

Amewaeleza watumishi hao kuwa wanatakiwa kuwa na bidii ya kujifunza ili waweze kuwa na matumizi bora, salama na sahihi ya vifaa hivyo kwa sababu wanaenda kuingia kwenye majengo mapya ambayo yamejengwa kisasa na kufungwa mifumo ya teknolojia mpya.

“Vifaa hivi ni vya kisasa na teknolojia inabadilika kila siku, ulichokutana nacho mwaka jana au mwaka juzi sicho utakachokutana nacho leo, kwa hiyo ni lazima kwenda na mabadiliko haya ya teknolojia ili wote twende pamoja. Niwaambie tu kwamba matumizi ya TEHAMA kwa sasa mahakamani hayana mbadala,” alisema.

Bw. Machela aliwaambia washiriki hao kuwa TEHMA katika Mahakama ina jukumu muhimu katika kuhakikisha kwamba dira, dhamira na mpango mkakati unatekelezwa vyema kupitia uboreshaji wa kisasa na uendeshaji wa shughuli za kimahakama kwa kutumia miundombinu halisi na ile ya kwenye mtandao.

Alibainisha kuwa TEHAMA ni chombo muhimu katika uboreshaji wa shughuli za Mahakama au mfumo wa Mahakama, lakini inaweza kubaki kuwa zana ikiwa hawataitumia kwa ustadi, badala yake inaweza kuvuruga juhudi za uboreshaji unaotarajiwa.

Kwa mujibu wa Naibu Mkurugenzi huyo, teknolojia ya habari hutengeneza fursa na changamoto ambazo zinahitaji kueleweka vizuri na kusimamiwa kikamilifu, ikiwa Mahakama ya Tanzania italazimika kufaidika kikamilifu na kile ambacho Teknolojia ya Habari inatoa.

Mahakama ya Tanzania imeandaa mafunzo ya huduma kwa wateja ya siku 20 kwa watumishi watakaohudumu katika Mahakama za Wilaya 18 zilizojengwa kwa ufadhili wa Benki ya Dunia na kuzinduliwa na Jaji Mkuu wa Tanzania, Mhe. Prof. Ibrahim Hamis Juma tarehe 25 Novemba, 2022.

Mafunzo hayo ambayo yatatolewa kwenye vituo vya Morogoro, Kigoma, Bukoba na Musoma yanalenga kuwaandaa na kuwapatia ujuzi watumishi hao ili watoe huduma bora kwa wananchi zinazoendana na uzuri wa majengo.

Mkurugenzi Msaidizi wa Teknolojia ya Habari na Mawasiliano (TEHAMA) wa Mahakama ya Tanzania, Bw. Allan Machela akiwasilisha mada kwenye mafunzo ya huduma bora kwa mteja kwa watumishi wa Mahakama za Wilaya za Buhigwe, Kakonko, Uvinza, Kaliua na Tanganyika katika Kituo cha Kigoma leo tarehe 7 Disemba, 2022.

Sehemu ya watumishi kutoka Mahakama za Wilaya za Buhigwe, Kakonko, Uvinza, Kaliua na Tanganyika (juu na chini) ikifuatilia mada iliyokuwa inawasilishwa.

Sehemu nyingine ya watumishi kutoka Mahakama hizo (juu na chini) ikifuatilia kwa makini mada iliyokuwa inawasilishwa na Bw. Machela.

Sehemu nyingine ya tatu ya watumishi kutoka Mahakama za Wilaya za Buhigwe, Kakonko, Uvinza, Kaliua na Tanganyika (juu na chini ikifuatilia uwasilishaji wa mada hiyo.