JAJI MLACHA ATAKA HUDUMA MPYA KWENYE MAJENGO MAPYA

Na Faustine Kapama-Mahakama, Kigoma

Mafunzo ya huduma bora kwa mteja yaliyokuwa yanatolewa kwa watumishi wa Mahakama za Wilaya mpya za Buhigwe, Kakonko, Uvinza, Kaliua na Tanganyika kwenye Kituo cha Kigoma yamehitimishwa leo tarehe 9 Disemba, 2022, huku Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha akiwataka kubadilika na kutoa huduma mpya na bora kwa wananchi.

Akizungumza wakati wa kufunga mafunzo hayo, Mhe. Mlacha aliwaeleza washiriki hao kuwa ubora wa majengo watakayokuwa wanayatumia kuwahudumia wananchi unatakiwa uakisi upya wao kwa kila kitu, ikiwemo kutumia lugha nzuri, kuvaa vizuri na kutoa huduma bora kwa ujumla.

“Jengo jipya, huduma mpya. Kwa kuwa tunaenda kwenye majengo mapya lazima tuonyeshe upya wetu, vinginevyo majengo hayo hayatakuwa na maana. Sisi tubadilike, tuchukue mtizamo mpya tuweze kufanya kazi zetu vizuri na mwisho tuwe na Mahakama ya Tanzania yenye mtizamo mpya, hasa katika kuimarisha imani kwa wananchi,” alisema.

Jaji Mfawidhi huyo amewasisitiza watumishi hao kuendelea kutumia Teknoljia ya Habari na Mawasiliano (TEHAMA) katika shughuli zote za kimahakama. Amesema kila mmoja ana wajibika kutekeleza mwelekeo huo kwa kuwa suala la matumizi ya TEHAMA mahakamani halina mjadala kwa sasa.

“Sisi hapa Mahakama Kuu Kigoma tumefikia asilimia 100 na hakuna kurudi nyuma kwa sababu kwa sasa ndiko dunia inakokwenda. Wenzetu sasa wamefikia hatua ya kuwa na Mahakama isiyotumia karatasi, hivyo lazima tubadilike na twende na mwelekeo huo,” alisema.

Kadhalika, Jaji Mfawidhi huyo amewahimiza watumishi hao kupendana wakiwa kazini, wamalize tofauti zao na kuishi kama ndugu, kwani kwa kufanya hivyo majukumu yao yatakuwa mepesi.

Amewapongeza waandaaji na wawezeshaji wote wa mafunzo hayo kwa kazi nzuri waliyofanya ambayo anaamini italeta matunda chanya katika utendaji kazi wa atumishi hao.

Naye mtumishi kutoka Mahakama ya Wilaya Uvinza, Bw. Julius Manyanya, akiongea kwa niaba ya washiriki wenzake, aliishukuru Mahakama ya Tanzania kwa fursa hiyo waliyopata ambapo mafunzo waliyopatiwa yatakuwa chachu na hivyo kuboresha utandaji kazi katika vituo vyao.

Katika kipindi hicho cha siku tano, watumishi hao walipitishwa kwenye mada mbalimbali, ikiwemo Maadili na Kanuni za Maadili katika Mahakama; Huduma kwa Mteja; Wajibu na Majukumu ya Mahakama za Wilaya; Utamaduni wa Mahakama; Utii na Uvumilivu katika Mahala pa Kazi; Mabadiliko maeneo ya Kazi na Uboreshaji wa Huduma za Mahakama.

Mada zingine ni Matumizi ya Vifaa vya Teknolojia ya Habari na Mawasiliano; Utunzaji wa siri; Uelewa wa Mpango Mkakati wa Mahakama; Upatikanaji wa Haki na Uaminifu kwa Umma; Usimamizi Bora wa Mfumo wa Uendeshaji na Usajili wa Mashauri na Namna ya kukabiliana na msongo wa mawazo  

Mada hizo ziliwasilishwa na wawezeshaji wabobezi katika maeneo hayo, akiwemo Msajili Mkuu wa Mahakama ya Tanzania, Mhe. Wilbert Chuma, Msajili wa Mahakama Kuu ya Tanzania, Mhe. Sharmillah Sarwatt, Mkurugenzi wa Mipango na Ufuatiliaji wa Mahakama ya Tanzania, Bw. Erasmus Uisso na Mkuu wa Kitengo cha Ujenzi cha Mahakama ya Tanzania, Mhandisi Yohana Mashausi.

Mahakama ya Tanzania imeandaa mafunzo ya huduma kwa wateja ya siku 20 kwa watumishi watakaohudumu katika Mahakama za Wilaya 18 zilizojengwa kwa ufadhili wa Benki ya Dunia na kuzinduliwa na Jaji Mkuu wa Tanzania, Mhe. Prof. Ibrahim Hamis Juma tarehe 25 Novemba, 2022.

Mafunzo hayo ambayo yatatolewa kwenye vituo vya Morogoro, Kigoma, Bukoba na Musoma yanalenga kuwaandaa na kuwapatia ujuzi watumishi hao ili watoe huduma bora kwa wananchi zinazoendana na uzuri wa majengo.

Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha akisisitiza jambo wakati wa kufunga mafunzo ya watumsihi wa Mahakama Wilaya mpya za Buhigwe, Kakonko, Uvinza, Kaliua na Tanganyika yaliyokuwa yanafanyika kwenye Kituo cha Kigoma. Kulia ni Mtendaji wa Mahakama Kuu, Kanda ya Kigoma, Bw. Moses Mashaka na kushoto ni Afisa Utumishi Mwandamizi wa Mahakama ya Tanzania, Bw. Jumanne Muna.

Mtendaji wa Mahakama Kuu ya Tanzania, Kanda ya Kigoma, Bw. Moses Mashaka akimkaribisha Mhe. Mlacha kuzungumza na washiriki kabla ya kufunga mafunzo hayo.

Mtumishi kutoka Mahakama ya Wilaya Uvinza, Bw. Julius Manyanya akitoa neno la shukurani kwa niaba ya washiriki wenzake.

Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha (kulia) akimkabidhi cheti cha ushiriki wa mafunzo hayo Hakimu Mkazi Mfawidhi wa Mahakama ya Wilaya Tanganyika, Mhe. Glory Mwakihaba.

Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha (kulia) akimkabidhi cheti cha ushiriki wa mafunzo hayo Mtumishi wa Mahakama ya Wilaya Uvinza, Bw. Bukuru Kassanga.

Sehemu ya washiriki (juu na chini) ikimsikiliza Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha wakati wa kufunga mafunzo hayo.

Sehemu ya nyingine ya washiriki (juu na chini) ikimsikiliza Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha wakati wa kufunga mafunzo hayo.

Sehemu nyingine ya tatu ya washiriki (juu na chini) ikimsikiliza Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha wakati wa kufunga mafunzo hayo.