WATUMISHI MAHAKAMA ZA WILAYA MPYA MGUU SAWA KUTEKELEZA MPANGO MKAKATI

Na Faustine Kapama-Mahakama, Kigoma

Mkurugenzi wa Mipango na Ufuatiliaji wa Mahakama ya Tanzania, Bw. Erasmus Uisso amewahimiza watumishi wa Mahakama za Wilaya mpya za Buhigwe, Kakonko, Uvinza, Kaliua na Tanganyika kutekeleza Mpango Mkakati wa Mahakama kikamilifu katika maeneo yao ya kazi ili kukidhi matarajio yaliyokusudiwa kwa wananchi.

Bw. Uisso ametoa wito huo leo tarehe 9 Disemba, 2022 alipokuwa anawasilisha mada kuhusu Mpango Mkakati wa Mahakama (2021-2025) katika siku ya tano na ya mwisho ya mafunzo ya huduma bora kwa mteja kwa watumishi kutoka Mahakama hizo kwenye Kituo cha Kigoma.

“Kila mtumishi wa Mahakama ana wajibu wa kutekeleza Mpango Mkakati kuanzia Mlinzi, Dereva, Karani, Katibu Mahususi, Hakimu au Jaji. Ili kufanikisha mpango mkakati lazima tufanye kazi kama timu. Mafanikio ya Jaji Kiongozi, Jaji Mfawidhi, Mtendaji Mkuu yanategemea mchango wa kila mmoja katika Mahakama. Kila mmoja ana nafasi yake katika utekelezaji wa mpango huo,” amesema.

Amewaeleza watumishi hao kuwa katika kutekeleza Mpango Mkakati wa pili wanasisitiza zaidi kwenye tunu za Mahakama hasa kwa kuzingatia uwepo wa maeneo mapya, mfano Buhigwe, Kakonko, Uvinza, Kaliua, Tanganyika na mengine ambayo hayakuwa na Mahakama za Wilaya na kwamba wananchi wangependa wapate huduma nzuri.

“Tuna tunu zetu za Mahakama ambazo zinatuongoza kwenye kufikia maono yetu. Uadilifu, usawa kwa maana ya kuhudumia wateja wote kwa usawa bila kuangalia kipato cha mtu au hadhi yake katika jamii, ushirikiano kwetu sisi ndani ya Mahakama na wadau wetu, uwazi na uwajibikaji,” Mkurugenzi huyo alisema.

Amewakumbusha washiriki hao wa mafunzo kuwa wanatakiwa kufanya kazi kwa kulinda uhuru wa Mahakama, huku wakitambua wakati huo huo kwamba wanapaswa kuwajibika kwa umma na kuwa na uwazi katika kuendesha shughuli za kimahakama.

“Jambo jingine muhimu ni weledi, nisisitize kwenye eneo hili kuwa kuna baadhi ya watu wanafikiri weledi ni watu wa ngazi fulani, lakini weledi maana yake ni taaluma, kila mtu ana weledi katika eneo lake. Tukizingatia haya tutafikia mahitaji ambayo wateja wetu wanatarajia,” alisema. 

Kadhalika, Bw. Uisso alieleza mafaniko mengi yaliyofikiwa wakati wa kutekeleza Mpango Mkakati wa Mahakama wa kwanza, ikiwemo kuongezeka kwa kasi ya usikilizaji wa mashauri ambayo ilipunguza mlundikano na kuongezeka kwa imani ya wananchi kwa Mahakama kutoka asilimia 61 mwaka 2015 hadi asilimia 78 mwaka 2019 kulingana na utafiti uliofanyika.

“Pia tumefanikiwa katika kuboresha mazingira ya kufanyia kazi kupitia ujenzi wa miundombinu na ukarabati wa majengo katika ngazi mbalimbali za Mahakama. Moja ya maeneo ambayo tumejenga ni pamoja na Mahakama Kuu Kigoma na majengo mapya ambayo watumishi hawa wanaenda kuyatumia,” alisema.

Naye Mhandisi Yohana Mashausi, akiwasilisha mada kuhusu Matumizi na Utunzaji wa Majengo Mapya, aliwaomba watumishi hao kuzingatia matumizi bora ya miundombinu iliyopo kwenye majengo ya Mahakama ili kupunguza gharama za uendeshaji.

“Mfano, watu wanaweza kutoka kazini wakaacha feni zinawaka, hizo ni gharama zinaedelea kutumika ukizingatia tuna ukomo wa matumizi ya fedha za umma. Hizi fedha kidogo tunazotumiwa tunatakiwa kuzitumia vizuri, vinginevyo tunaweza kuyaona majengo haya ni mzigo,” alisema.

Amewakumbusha kuwa majengo hayo yamejengwa kwa gharama kubwa, hivyo ni matarajio ya Mahakama kuwa yatatumika kwa kipindi kirefu kadri iwezekanavyo. Amesema kama majengo hayo yatatumika vizuri hapatakuwa na ukarabati wa mara kwa mara.

Awali, akiwasilisha mada kuhusu Msongo wa Mawazo na namna ya Kuzuia Hasira, Mshauli Mtaalam Binafsi, Bw. Godfrey Wawa aliwaomba watumishi hao kupendana, kuheshimiana na kuzingatia misingi ya kazi ili waweze kuthibiti na kujiepusha na msongo wa mawazo ambao unaathari kubwa katika ufanisi kazini.

Alisema kuwa uwepo wa msongo wa mawazo huathiri mtu binafsi, familia na hata taasisi anayofanyika kazi, hivyo usipothibitiwa unaweza kuleta athari kubwa, ikiwemo uwezo wa mtu kufikiri, hivyo kupelekea utendaji wa kazi kushuka.

“Naomba tupendane, tuheshimiane kila mmoja kwa nafasi yake. Usijione wewe ni kiongozi ukawadharau wengine. Kumbuka, yule Mfagiaji, Dereva au Mlinzi pale mlangoni anaweza kuwa ana majibu ya changamoto yako,” Bw. Wawa aliwaambia watumishi hao.

Alisisitiza uvumilivu mahala pa kazi kwa kuzingatia kuwa kila binadamu ana mapungufu yake na udhaifu wake. “Kama binadamu, lazima kusameheana. Roho ya kuvumiliana na kusameheana ni muhimu sana mahala pa kazi. Jifunze kuachilia mambo moyoni mwako, hii itakusaidia sana kujiepusha na msongo wa mawazo,” alisema.

Kadhalika, Mtaalamu huyo aliwaomba watumishi hao kuthibiti hasira zao wawapo kazini kwani kwa kufanya vinginevyo wanaweza kuleta matokeo hasi, hivyo kuathiri mahusiano na utangamano miongoni mwao na kuathiri utendaji kazi kwa ujumla.

“Hasira ni nzuri wakati mwingine, kwa sababu inaweza kumfanya mtu kusema ukweli, kuondoa unafiki na kumfanya yule anayesemwa kuchukua tahadhali au hatua sahihi. Lakini, hasira isipothibitiwa inaweza kukuletea hasara, maumivu na kukutumbukiza kwenye matatizo,” alisema.

Mahakama ya Tanzania imeandaa mafunzo ya huduma bora kwa wateja ya siku 20 kwa watumishi watakaohudumu katika Mahakama za Wilaya 18 zilizojengwa kwa ufadhili wa Benki ya Dunia na kuzinduliwa na Jaji Mkuu wa Tanzania, Mhe. Prof. Ibrahim Hamis Juma tarehe 25 Novemba, 2022.

Mafunzo hayo ambayo yatatolewa kwenye vituo vya Morogoro, Kigoma, Bukoba na Musoma yanalenga kuwaandaa na kuwapatia ujuzi watumishi hao ili watoe huduma bora kwa wananchi zinazoendana na uzuri wa majengo.

Mkurugenzi wa Mipango na Ufuatiliaji wa Mahakama ya Tanzania, Bw. Erasmus Uisso akiwasilisha mada kwenye mafunzo yaliyowaleta pamoja watumishi kutoka Mahakama za Wilaya mpya za Buhigwe, Kakonko, Uvinza, Kaliua na Tanganyika katika siku ya tano na ya mwisho kwenye Kituo cha Kigoma leo tarehe 9 Disemba, 2022.

Mhandisi Yohana Mashausi, naye alikuwepo kuwasilisha mada kuhusu Matumizi na Utunzaji wa Majengo Mapya katika mafunzo hayo.

Mshauli Mtaalam Binafsi, Bw. Godfrey Wawa akisisitiza jambo alipokuwa anawasilisha mada kwenye mafunzo hayo.

Washiriki wa mafunzo kutoka Mahakama hizo za Wilaya (juu na picha mbili chini) wakipasha misuri mara baada ya kupata 'dozi' kutoka kwa Wawezeshaji wa mada mbalimbali.