KITUO KINACHOFUATA NI BUKOBA

• Watumishi kutoka Mahakama za Wilaya Kyerwa, Misenyi, Nyang'hware na Mbogwe waanza kupokea 'dozi'
• Naibu Msajili asema maadili ya watoa huduma wa Mahakama huangaliwa popote walipo

Na Faustine Kapama-Mahakama, Kigoma

Mafunzo ya huduma bora kwa mteja ya siku tano kwa watumishi wa Mahakama mpya za Wilaya za Kyerwa, Misenyi, Nyangh’ware na Mbogwe yameanza leo tarehe 12 Disemba, 2022 katika Kituo cha Bukoba huku watumsihi hao wakitakiwa kuzingatia maadili na kanuni zilizowekwa na Mahakama ya Tanzania wanapotekeleza majukumu yao ya utoaji haki kwa wananchi.

Akiwasilisha mada ya kwanza kuhusu Maadili, Kanuni za Maadili na Utamaduni katika muktadha wa Mahakama kwa watumishi hao, Naibu Msajili kutoka Kurugenzi ya Usimamizi, Ukaguzi wa shughuli za kimahakama na Maadili, Mhe. Kinabo Minja amewaeleza washiriki hao wa mafunzo kuwa maadili ni suala muhimu katika taasisi yoyote ili kuweza kufikia malengo yake iliyojiwekea.

“Maadili yanatofautiana kutokana na mazingira, au aina ya kazi. Mahakama kama zilivyo taasisi au mihimili mingine ina maadili na kanuni zinazoongoza mienendo na tabia za watoa huduma wake. Lengo hapa ni kuongeza kiwango cha kutoa huduma bora kwa wananchi na yule tunayemhudumia aridhike. Hatuwezi kufanya haya tusipozingatia maadili na kanuni zilizopo,” alisema.

Amesisitiza kuwa ni muhimu kwa mtumishi wote wa Mahakama, yaani maafisa wa kimahakama (Judicial officers) na wasio wa kimahakama (non-Judicial officers) kuwa wadilifu kwa kuzingatia kanuni zinazoongoza utendaji wao wa kazi wakati wote wakiwa kazini au nje ya kazi. Amesema kuwa maadili ya watoa huduma wa Mahakama hayaangaliwi tu wakati wakiwa kazini, bali pia huangaliwa hata wakiwa nje ya kazi.

“Kutokuzingatia maadili kuna athari sana kwenye huduma tunazozitoa hata kama tukiwa kwenye shughuli zetu za kawaida. Kwa hiyo ni vizuri kuyazigatia mkiwa kazini na nje ya kazi, hakikisheni mnalinda taswila nzuri ya Mahakama kwa kadri inavyotakiwa,” alisema Mhe. Minja.

Amesema uwepo wa maadili mahala pa kazi ni muhimu kwa kuwa huongeza tija na, au ubora wa huduma, hujenga au kuongeza imani ya Mahakama kwa umma, hulinda taswira ya Mahakama, hujenga na kuimarisha au kukuza mahusiano miongoni mwa watumishi, huleta amani na utengamano kwa taifa ili kukuza uchumi endelevu na humfanya mtumishi kutekeleza vema jukumu la utoaji haki kwa wananchi.

Hivyo, akawasihi maafisa kutoka katika Mahakama hizo mpya za Wilaya kuwa waadilifu wa ghali ya juu, kusimamia uhuru wa uamuzi wao, kuenenda kulingana na kanuni zinazokubalika, kuwa na weledi na bidii, au umakini wanapotekeleza majukumu yao, kuzingatia  usawa na kutokuwa na upendeleo.

“Nafasi ya Hakimu katika jamii ni nyeti sana na maadili yake hayapaswi kutiliwa mashaka. Hakimu ni kioo cha jamii, uzingatiaji wake wa miiko na maadili ya kazi yake ni elimu tosha kwa jamii. Mtoa haki (Hakimu) anapaswa kuwa na tabia njema mbele ya jamii na hata awapo mwenyewe, hivyo hatakiwi kuwa na mwenendo au matendo yanayoashiria rushwa na hatafuata maelekezo au ahadi alizopewa katika utekelezaji wa jukumu la msingi la utoaji haki,” alisema.

Kadhalika, Mhe. Minja aliwaeleza washiriki hao wa mafunzo kuwa watumishi wasio maafisa wa Mahakama wanapaswa kuepuka matendo au mwenendo unaoashiria vitendo vya ukiukaji maadili, kuwa waadilifu katika kuwahudumia wananchi, kuzingatia miiko na maadili ya kazi na kuwahudumia wananchi kwa kutumia lugha nzuri na bashasha (customer care) na pia kuwahudumia wateja wa Mahakama kwa wakati na bila kupendelea.

“Maadili ni sehemu ya maisha yetu wakati wote, tukiwa kazini na nje ya kazi. Kwakuwa tumechagua kuwa katika familia hii ya utoaji haki basi tutekeleze wajibu wetu kwa kuhakikisha tunatoa huduma bora,” Naibu Msajili huyo aliwaambia watumishi hao.

Mahakama ya Tanzania imeandaa mafunzo ya huduma kwa wateja ya siku 20 kwa watumishi watakaohudumu katika Mahakama mpya za Wilaya 18 zilizojengwa kwa ufadhili wa Benki ya Dunia na kuzinduliwa na Jaji Mkuu wa Tanzania, Mhe. Prof. Ibrahim Hamis Juma tarehe 25 Novemba, 2022.

Mafunzo hayo ambayo yatatolewa kwenye vituo vya Morogoro, Kigoma, Bukoba na Musoma yanalenga kuwaandaa na kuwapatia ujuzi watumishi hao ili watoe huduma bora kwa wananchi zinazoendana na uzuri wa majengo. Tayari mafunzo hayo yameshatolewa kwenye Vituo vya Morogoro na Kigoma.

Naibu Msajili kutoka Kurugenzi ya Usimamizi, Ukaguzi wa shughuli za kimahakama na Maadili, Mhe. Kinabo Minja (juu na chini) akiwasilisha mada katika siku ya kwanza ya mafunzo kwa watumishi wa Mahakama mpya za Wilaya za Kyerwa, Misenyi, Nyangh’ware na Mbogwe yanayotolewa katika Kituo cha Bukoba.

Sehemu ya watumishi kutoka Mahakama mpya za Wilaya za Kyerwa, Misenyi, Nyangh’ware na Mbogwe (juu na chini) ikifuatilia mada iliyokuwa inawasilishwa kwenye mafunzo hayo.

Sehemu nyingine ya watumishi kutoka Mahakama mpya za Wilaya za Kyerwa, Misenyi, Nyangh’ware na Mbogwe (juu na picha mbili chini) ikifuatilia mada iliyokuwa inawasilishwa kwenye mafunzo hayo.