WATUMISHI MAHAKAMA MPYA ZA WILAYA WATAKIWA KUZINGATIA SHERIA UTUNZAJI WA NYARAKA, KUMBUKUMBU

·Mwanasaikolojia awasihi wajibebe kama wanataka kufanikiwa 

Na Faustine Kapama-Mahakama, Bukoba

Mafunzo ya huduma bora ya siku tano kwa mteja kwa watumishi wa Mahakama mpya za Wilaya za Kyerwa, Misenyi, Nyangh’ware na Mbogwe yameingia siku ya pili leo tarehe 13 Disemba, 2022 katika Kituo cha Bukoba huku watumsihi hao wakitakiwa kuzingatia kanuni, taratibu na sheria mbalimbali zinazosimamia utunzaji wa kumbukumbu na nyaraka ndani ya Mahakama ya Tanzania.

Wito huo umetolewa na Mkurugenzi wa Kumbukumbu na Nyaraka wa Mahakama ya Tanzania, Bw. Malimo Manyambula alipokuwa anawasilisha mada kuhusu Utunzaji wa Nyaraka na Kumbukumbu katika mafunzo hayo. Alisema utunzaji mbaya wa kumbukumbu na nyaraka huhatarisha usalama wake.

“Tuna sheria na sera za nchi na taratibu zetu za ndani ambazo zinatayarishwa na Jaji Mkuu au Mtendaji Mkuu au Msajili Mkuu kuhusiana na masuala hayo. Watu wanatakiwa wazingatie taratibu hizo kwa wakati. Inapotokea mtu hatekelezi maana yake anakuwa anaenda kinyume na hizo taratibu, hivyo kuhatarisha usalama wa kumbukumbu zetu,” amesema.

Katika mada yake, Bw. Manyambula aliwapitisha washiriki hao wa mafunzo kwenye suala zima la utunzaji wa kumbukumbu kutoka zinapozalishwa, zinapotumika na wakati zinapotumika zinatunzwaje  na mpaka zinapofikia ukomo, yaani jalada linapokuwa limefungwa.

“Nia kubwa ni kuhakikisha tunakuwa na utunzaji sahihi wa kumbukumbu ambao utaleta matokeo chanya ya kutoa uamuzi ulio sahihi na unaopatikana kwa wakati. Kumbukumbu sahihi zinapoenda kwa mtu sahihi, basi atatoa uamuzi sahihi na kwa wakati kwa sababu hakutakuwa na ucheleweshaji wowote. Lakini ukipeleka kumbukumbu ambazo siyo sahihi au ni sahihi lakini siyo kwa mhusika kutakuwa na ucheleweshaji wa kutoa uamuzi,” alisema.

Mkurugenzi huyo aliwakumbusha watumishi hao utaratibu wa kufungua na utunzaji wa majalada kwa mujibu wa taratibu zilizoelezwa kwenye Mwongozo wa Masjala katika ofisi za umma na kusisitiza kuwa ili kurahisisha upatikanaji wa taarifa, kila Idara au Kitengo kinatakiwa kuwa na majalada yanayohusu kazi zao.

Aliwaeleza washiriki hao wa mafunzo baadhi ya madhara ya kutozingatia mwongozo wa kufungua na kutunza majalada, ikiwemo kuchelewesha utoaji wa uamuzi au kutoa uamuzi usiosahihi, menejimenti kutokuwa na ufahamu wa kutosha wa kazi za taasisi na uvujaji wa siri za Serikali.

Naye Mwanasaikolojia, Bi. Sadaka Gandi, akiwasilisha mada kuhusu Uaminifu, Uvumilivu na Saikolojia mahali pa kazi katika mafunzo hayo, aliwasihi watumishi katika Mahakama mpya za Wilaya za Kyerwa, Misenyi, Nyangh’ware na Mbogwe kujitafakari na kujibeba kama wanataka kufanikiwa wanapotekeleza majukumu yao mbalimbali mahakamani.

“Binadamu anatakiwa kujibeba mwenyewe, kubeba wengine na kuruhusu wengine wajibebe wenyewe. Hii ina maana kuwa na uwezo wa kujitambua, kuweza kuwaelewa na kuwavumilia wengine, kuwa na uwezo wa kuvaa viatu vya wengine na maisha yakaendelea. Jipambanue ili uweze kufurahia maisha, jua jinsi ya kuthibiti hisia zako na chukua muda kidogo kabla ya kuchua uamuzi wowote,” alisema.

Mwanasaikolojia huyo amewaomba washiriki hao wa mafunzo kuwa na mtizamo chanya wanapotekeleza majukumu yao kwa kuzingatia kuwa Mahakama ya Tanzania inahitaji watumishi wenye mitizamo iliyopevuka.

“Mtizamo wa mtu mmoja unaweza kuathiri kila mtu katika taasisi. Ukiwa na mtu mwenye mtizamo mbaya atawavuruga tu kwenye taasisi yenu na mtapaona mahali pa kazi pabaya. Kuimarisha mitizamo chanya mahali pa kazi italeta manufaa kwa waajiri, wafanyakazi na wananchi kwa ujumla. Hivyo, mtizamo chanya ni muhimu kama tunataka kutekeleza majukumu yetu kwa matarajio ya taasisi yetu,” amesema.

Bi. Gandi ameeleza faida za mtu mwenye mtizamo chanya ni kuwa na heshima kwa wengine, kuwa na shauku ya kuambukiza mambo mema kuhusu maisha, kujitolea kufanya kazi, kuwa na mawazo ya ubunifu na kuwasaidia wengine. Amesema mambo hayo yote ni muhimu kwa mtumishi kuwanayo mahali pa kazi.

Mahakama ya Tanzania imeandaa mafunzo ya huduma kwa wateja ya siku 20 kwa watumishi watakaohudumu katika Mahakama mpya za Wilaya 18 zilizojengwa kwa ufadhili wa Benki ya Dunia na kuzinduliwa na Jaji Mkuu wa Tanzania, Mhe. Prof. Ibrahim Hamis Juma tarehe 25 Novemba, 2022.

Mafunzo hayo ambayo yatatolewa kwenye vituo vya Morogoro, Kigoma, Bukoba na Musoma yanalenga kuwaandaa na kuwapatia ujuzi watumishi hao ili watoe huduma bora kwa wananchi zinazoendana na uzuri wa majengo. Tayari mafunzo hayo yameshatolewa kwenye Vituo vya Morogoro na Kigoma.

Mkurugenzi wa Kumbukumbu na Nyaraka wa Mahakama ya Tanzania, Bw. Malimo Manyambula (juu na chini) akisisitiza jambo alipokuwa anawasilisha mada kwenye mafunzo ambayo yamewaleta pamoja watumishi kutoka Mahakama mpya za Wilaya za Kyerwa, Misenyi, Nyangh’ware na Mbogwe katika Kituo cha Bukoba leo tarehe 13 Disemba, 2022.

Mwanasaikolojia, Bi. Sadaka Gandi akieleza jambo alipokuwa anawasilisha mada kwenye mafunzo hayo.

Sehemu ya watumishi kutoka Mahakama mpya za Wilaya za Kyerwa, Misenyi, Nyangh’ware na Mbogwe (juu na chini) ikiwa tayari kupokea 'dozi' kutoka kwa wawezeshaji.

Sehemu nyingine ya watumishi kutoka Mahakama  hizo mpya za Wilaya (juu na chini) ikipokea 'dozi' kutoka kwa wawezeshaji.