MSAJILI MAHAKAMA KUU ATAKA MWANANCHI KWANZA, MENGINE BAADAYE

Na Faustine Kapama-Mahakama, Bukoba

Msajili wa Mahakama Kuu ya Tanzania, Mhe. Sharmillah Sarwatt amewataka watumishi wa Mahakama mpya za Wilaya za Kyerwa, Misenyi, Nyangh’wale na Mbogwe kuwatumikia Watanzania kwa bidii na weledi wa hali ya juu huku wakitoa kipaumbele kwa mwananchi kwani ndiyo muhimu katika muktadha mzima wa uwepo wa Mahakama ya Tanzania hapa nchini.

Akiwasilisha mada kuhusu Wajibu na Majukumu ya Watumishi katika Mahakama za Wilaya kwa watumishi wa Mahakama hizo kwenye mafunzo yanayofanyika katika Kituo cha Bukoba, Mhe. Sarwatt alisema kuwa mwananchi ndiye kipaumbele cha kwanza kwa Mahakama kwa vile ndiye aliyesababisha kuwepo utekelezaji wa mradi wa maboresho unaoendelea.

“Mwananchi ndiye kipaumbele chetu, ndiye anayetufanya tuamke asubuhi kwenda kazini. Kila mwananchi anayekuja mahakamani ndiye anayekusababisha uwepo hapo. Kama wananchi walikuwa hawahitaji huduma zetu tusingejenga Mahakama hizi zote. Kwa hiyo, mawazo yetu, ubunifu wetu umlenge huyu mwananchi. Tunataka mwananchi ajione ana bahati kuzaliwa Tanzania,” alisema.

Msajili wa Mahakama Kuu huyo aliwaeleza watumishi hao kuwa Mahakama hizo wanazokwenda kufanya kazi hazikujengwa hivyo kwa bahati mbaya bali zimekuja kwa malengo maalumu, ikiwemo kuwezesha haki kupatikana kwa wakati na kuongeza ufanisi na huduma bora kwa wananchi.

“Majengo haya yana vipengele vya kipekee kuwawezesha wadau wengi kukutana katika sehemu moja. Tunataka mwananchi asisumbuke tena, akihitaji huduma ya mwendesha mashtaka aipate, akihitaji msaada wa kisheria aupate. Kama nyinyi Mahakimu Wafawidhi hamjawaalika wadau hawa fanyeni sasa,” alisema.

Mhe. Sarwatt amewaeleza watumishi hao kuwa majengo hayo pia yamekuja na aina mpya ya utendaji kazi, hivyo wanapaswa kuacha kufanya kazi kwa mazoea.  Amewakumbusha kuzingatia maadili wanapotekeleza majukumu yao wakiwa katika Mahakama hizo mpya kwani hakutakuwepo na kisingizio chochote cha kutoa huduma isiyoridhisha kwa wananchi.

“Tunategemea uwazi wa hali ya juu mnapotekeleza majukumu yenu. Haitakiwi kabisa kuonekana kuwa na hata dalili zozote za tuhuma yoyote. Kipaumbele chetu ni mwananchi, hata kama una matatizo yako, yule mwananchi yanamhusu nini, kuna uhusiano gani wa changamoto zako na mwananchi. Tunataka huduma itolewe kwa wakati na bora na hakuna sababu yoyote ya kutokufanya haya,” alisema.

Naye Hakimu Mkazi Mwandamizi kutoka Kitengo cha Maboresho cha Mahakama ya Tanzania, Mhe. Edward Mpabansi, akiwasilisha mada kuhusu Tathimini ya Mpango Mkakati wa Mradi wa Maboresho wa Mahakama ya Tanzania kwenye mafunzo hayo, alisema Mahakama ya Tanzania imejiwekea Mpango Mkakati kama nyenzo ya kuhakikisha inafikia malengo ya Dira ya Maendeleo ya Taifa.

Alisema kulikuwepo na Mpango Mkakati wa kwanza uliotekelezwa kuanzia mwaka 2015/2016 na kukamilishwa mwaka 2019/2020 ukiwa na nguzo tatu, Utawala, Uwajibikaji na Usimamizi  wa Rasilimali; Upatikanaji wa Haki na kwa Haraka na Kuongeza Imani ya Wananchi kwa Mahakama na Kushirikisha Wadau. Amesema kwa sasa Mahakama ya Tanzania inaendelea kutekeleza Mpango Mkakati wa pili (2020/2021-2024/2025 ukiwa na nguzo hizo tatu.

Mhe. Mpabansi amewaeleza washiriki hao wa mafunzo kuwa katika kutekeleza mpango mkakati wa kwanza, Mahakama imefanikiwa katika maeneo mengi, ikiwemo uwepo wa matumizi ya Teknolojia ya Habari na Mawasiliano (TEHAMA) katika kurahisisha utoaji wa huduma na jinsi Mahakama inavyotumia teknolojia hiyo katika utoaji haki kwa wakati.

“Kumekuwepo na ufunguaji wa mashauri kimtandao, kusikiliza mashauri kwa njia ya mtandao (video conferencing), kupandisha uamuzi katika mtandao ambapo jumla ya mashauri 3,271 ya Mahakama ya Rufani yalipandishwa hadi kufikia tarehe 30 Novemba, 2021, huku jumla ya mashauri 12,137 ya Mahakama Kuu, 748 Divisheni ya Biashara, 797 Divisheni ya Kazi, 1,981 Divisheni ya Ardhi na 204 ya Mahakama ya Rushwa na Uhujumu Uchumi yakipandishwa,” alisema.

Ametaja baadhi ya mafanikio mengine kama kupunguza mlundikano wa mashauri kutoka asilimia 13 mwaka 2015 hadi kufikia asilimia tisa kufikia Septemba 2022, kanzishwa kwa huduma ya Mahakama inayotembea (Dar es Salaam na Mwanza), kuimarishwa kwa ukaguzi na usimamizi wa Mahakama katika ngazi zote, ujenzi wa Vituo Jumuishi vya Utoaji Haki sita kwa mikoa ya Arusha, Dar es Salaam (Temeke na Kinondoni), Dodoma, Morogoro na Mwanza, ujenzi wa Mahakama Kuu mbili za  Kigoma na Mara na ujenzi wa Mahakama mpya 18 katika Wilaya mbalimbali mpya na za zamani.

Mahakama ya Tanzania imeandaa mafunzo ya huduma kwa wateja ya siku 20 kwa watumishi watakaohudumu katika Mahakama mpya za Wilaya 18 zilizojengwa kwa ufadhili wa Benki ya Dunia na kuzinduliwa na Jaji Mkuu wa Tanzania, Mhe. Prof. Ibrahim Hamis Juma tarehe 25 Novemba, 2022.

Mafunzo hayo ambayo yatatolewa kwenye vituo vya Morogoro, Kigoma, Bukoba na Musoma yanalenga kuwaandaa na kuwapatia ujuzi watumishi hao ili watoe huduma bora kwa wananchi zinazoendana na uzuri wa majengo. Tayari mafunzo hayo yameshatolewa kwenye Vituo vya Morogoro na Kigoma.

Msajili wa Mahakama Kuu ya Tanzania, Mhe. Sharmillah Sarwatt (juu na chini) akiwasilisha mada kwenye mafunzo ya watumishi wa Mahakama mpya za Wilaya za Kyerwa, Misenyi, Nyangh’ware na Mbogwe katika Kituo cha Bukoba leo tarehe 13 Disemba, 2022.

Hakimu Mkazi Mwandamizi kutoka Kitengo cha Maboresho cha Mahakama ya Tanzania, Mhe. Edward Mpabansi, akisisitiza jambo alipokuwa akiwasilisha mada kuhusu Tathimini ya Mpango Mkakati wa Mradi wa Maboresho wa Mahakama ya Tanzania kwa watumishi hao.

Sehemu ya watumishi kutoka Mahakama mpya za Wilaya za Kyerwa, Misenyi, Nyangh’ware na Mbogwe (juu na chini) ikifuatilia uwasilishaji wa mada mbalimbali kwenye mafunzo hayo.

Sehemu nyingine ya watumishi kutoka Mahakama mpya za Wilaya za Kyerwa, Misenyi, Nyangh’ware na Mbogwe (juu na chini) ikifuatilia uwasilishaji wa mada mbalimbali kwenye mafunzo hayo.