MAHAKAMA MOROGORO YAMPA TUZO HAKIMU MAUA KWA UTUMISHI ULIOTUKUKA

Na Evelina Odemba – Mahakama Morogoro.

Mahakama Kuu ya Tanzania Kanda ya Morogoro imempatia tuzo maalumu  aliyekuwa Hakimu Mkazi Mkuu wa Mahakama ya Wilaya Morogoro, Mhe. Maua Hassani Hamduni baada ya kumaliza muda wake wa kazi/kustaafu kwa mujibu wa sheria.

Akizungumza hivi karibuni wakati wa hafla ya kumuaga Hakimu huyo, Jaji Mfawidhi wa Mahakama Kuu ya Tanzania Kanda ya Morogoro, Mhe. Paul Ngwembe alisema kuwa Hakimu huyo amekuwa ni mfano wa kuigwa kutokana na kujituma kwa kazi nyakati zote na kuwa, atakumbukwa kwa utendaji kazi wake.

“Ni vyema watumishi wa Kanda hii, kuiga mfano wa Mhe. Maua, basi ni wakati sasa watumishi wa Mahakama wajifunze kwake ili kuziba pengo lake katika Mahakama yetu,” alisema Mhe. Ngwembe.

Akizungumza mara baada ya kukabidhiwa tuzo ya utumishi bora, Mhe. Maua alitoa shukurani zake za dhati kwa uongozi wa Mahakama Tanzania na Kanda ya Morogoro kwa kuuthamini mchango wake katika Mahakama na kuomba ushirikiano waliouonesha kwake udumu.

Mhe. Maua aliongeza kuwa bila kupewa ushirikiano toka kwa viongozi na watumishi wa kada zote asingeweza kufanya kazi kwa ubora.

Mhe. Maua aliajiriwa tarehe 10 Desemba, 1979 kama Karani katika Mahakama ya Wilaya Nzega, nafasi ambayo aliitumikia mpaka mwaka 1989 ambapo alipandishwa cheo kuwa Hakimu wa Mahakama ya Mwanzo Ulemo hii ikiwa ni baada ya kujiendeleza na kupata cheti cha sheria katika chuo Kikuu cha Mzumbe.

Mwaka 1995, Mhe. Maua alihitimu ngazi ya Stashahada ya Sheria na kupandishwa cheo kuwa Hakimu wa Wilaya katika Kituo cha kazi Morogoro mpaka mwaka 2008 alipopandishwa cheo kuwa Hakimu Mkazi daraja la II na mwaka huo huo alijiendeleza katika Shule ya Sheria kwa Vitendo (LST).

Aidha, mnamo mwaka 2015 Mhe. Maua aliteuliwa kuwa Hakimu Mkazi Mfawidhi wa Mahakama na kuhamishiwa Wilaya ya Mufindi Mkoani Iringa. Mwaka 2020 alihamishiwa Mahakama ya Wilaya Morogoro akiwa kama Hakimu Mkazi Mfawidhi na mwaka 2022 alipandishwa cheo kuwa Hakimu Mkazi Mkuu nafasi ambayo amedumu nayo mpaka alipostaafu.

Kadhaika, katika hafla hiyo, Mahakama Kanda ya Morogoro ilimpokea Naibu Msajili mpya wa Kanda hiyo aliyehamishiwa hapo kutoka Mahakama Kuu Kanda ya Mwanza, Mhe. Augustina Mmbando ambaye aliwataka Watumishi na Wadau wa Mahakama katika Kanda hiyo kutoa ushirikiano wakati wa kazi ili kuujenga vyema Mhimili wa Mahakama.

Hakimu Mkazi Mkuu mstaafu wa Mahakama ya Wilaya Morogoro, Mhe. Maua Hassani Hamduni (katikati) akipokea tuzo maalum kutoka kwa Jaji Mfawidhi wa Mahakama Kuu Kanda ya Morogoro, Mhe. Paul Ngwembe (kushoto). Tuzo hilo amepatiwa kama pongeza kwa kazi nzuri aliyofanya kabla ya kustaafu kwa mujibu wa sheria. Kulia ni Mwenza wa Mhe. Maua.

Jaji Mfawidhi wa Mahakama Kuu ya Tanzania Kanda ya Morogoro Mhe. Paul Ngwembe akionesha tuzo maalumu aliyokabidhiwa Hakimu Mkazi MKuu Mhe. Maua Hamduni ( hayupo pichani) aliyokabidhiwa mara baada ya kustaafu utumishi wa umma kwa mujibu wa sheria.

Hakimu Mkazi Mkuu mstaafu wa Mahakama ya Wilaya Morogoro, Mhe. Maua Hassani Hamduni (kulia) pamoja na mwenza wake wakiwa wameshika zawadi maalum ya keki kama pongezi ya kumaliza muda wake wa utumishi baada ya kufikisha miaka 60 kwa mujibu wa sheria.

Sehemu ya Watumishi wa Mahakama Kanda ya Morogoro na wageni waalikwa wakiwa katika sherehe ya kumuaga Hakimu Mkazi Mkuu mstaafu wa Mahakama ya Wilaya Morogoro, Mhe. Maua Hassani Hamduni (hayupo katika picha).

Hakimu Mkazi Mkuu mstaafu wa Mahakama ya Wilaya Morogoro, Mhe. Maua Hassani Hamduni (aliyeketi katikati) pamoja na mwenza wake (aliyesimama mwenye tai nyekundu) wakiwa katika picha ya pamoja na watumishi wa Mahakama ya Wilaya Morogoro aliofanya nao kazi mpaka anastaafu.

Naibu Msajili wa Mahakama Kuu Kanda ya Morogoro, Mhe. Augustina Mmbando (kushoto) akipokea keki ya ukaribisho kutoka kwa Jaji wa Mahakama Kuu ya Tanzania, Kanda ya Morogoro, Mhe. Gabriel Malata. Mhe. Augustina amehamishiwa kituoni hapo baada ya mtangulizi wake Mhe. Sylivester Kainda kuteuliwa kuwa Msajili wa Mahakama ya Rufani (T).

Hakimu Mkazi Mkuu mstaafu wa Mahakama ya Wilaya Morogoro, Mhe. Maua Hassani Hamduni (mwenye gauni ya zambarau) akifurahia jambo pamoja na wenzake katika sherehe maalum iliyoandaliwa kwa ajili ya kumuaga baada ya kustaafu utumishi wa umma kwa mujibu wa sheria.