HUDUMA BORA ZITAIFANYA MAHAKAMA KUWA SEHEMU RAFIKI KWA WANANCHI WOTE; JAJI MAHIMBALI

Na Mwandishi wetu, Musoma.

Kaimu Jaji Mfawidhi Mahakama Kuu, Kanda ya Musoma Mhe. Frank Mahimbali amewaasa watumishi wa Mahakama nchini kumtanguliza Mwenyezi Mungu katika kutimiza wajibu wao, hali ambayo itawasaidia kufanya kazi zao kwa weledi na maadili ili kufikia malengo ya uboreshaji wa huduma za Mahakama nchini.

Akifungua mafunzo ya huduma kwa wateja kwa watumishi wa Mahakama za Wilaya za Butiama na Rorya mkoani Mara pamoja na Mahakama za Wilaya Mkoa wa Simiyu za Busega na Itilima leo Jumatatu, Desemba 19, 2022, Jaji Mahimbali amesema kuwa kujituma pamoja na kufanya kazi kwa bidii pia kutasaidia katika kuboresha utendaji kazi wa watumishi hao na hatimaye kufikia malengo ya mahakama nchini ya kutoa huduma bora kwa wananchi wote.

"Kama mtakumbuka Mahakama zenu ni miongoni mwa mahakama 18 zilizozinduliwa hivi karibuni na  kutakuwa hakuna maana kabisa baada ya serikali kutumia fedha nyingi kujenga majengo mazuri na ya kisasa halafu huduma  isiwe ya  kuridhisha, hebu tuifanye Mahakama kuwa sehemu rafiki kwa wananchi wote " amesema

Ameongeza kuwa itakuwa ni ajabu pale ambapo mwananchi atapata changamoto ya huduma mbovu ikiwepo kauli mbaya kutoka kwa watumishi wa mahakma baada ya serikali kufanya uwekezaji huo kwa kujenga majengo bora na ya kisasa ambapo  kuwataka watumishi hao kubadili fikra iliyojengeka kwa baadhi ya wananchi ya kwamba mahakama ni sehemu ya kufunga watu badala yake mahakama ziwe sehemu ya kupata huduma ikiwemo ufafanuzi wa kisheria.

Akizungumza katika mafunzo hayo, Msajili wa Mahakama Kuu ya Tanzania, Mhe. Sharmillah Sarwatt amesema, kuwa watumishi wa Mahakama wanatakiwa kutambua kuwa Mahakama ndicho chombo pekee kilichopewa jukumu la kitoa haki hivyo utendaji kazi wenye kzuingatia maadili na weledi utawezesha mahakama kufikia malengo hayo.
"Tuna jukumu la kutoa haki kwa wananchi wote hivyo huduma bora ni muhimu kwa ustawi wa wananchi na nchi yetu kwa ujumla"amesema

Awali Mkurugenzi Msaidizi wa Mafunzo kutoka Mahakama ya Tanzania, Patricia Ngungulu alisema kuwa watumishi 140 wa Mahakama za wilaya 18 wamepata mafunzo hayo ya huduma bora kwa wateja, mafunzo yaliyofanyika kwa awamu nne.

Amesema kuwa mafunzo hayo ni sehemu ya utekelezaji wa mradi wa maboresho ya huduma za mahakama huku akiwataka watumishi hao kutimiza wajibu wao licha ya kuwepo kwa changamoto ya upungufu wa watumishi.

"Tunajua kuna upungufu wa watumishi lakini hiki kisiwe kigezo cha kushindwa kutimiza wajibu wetu, tufanye kazi kwa kujituma, weledi na kujitoa ikiwa ni pamoja na uchache wetu Ili kufikia malengo haya ya kuboresha huduma za mahakama nchini" amesema.

Kaimu Jaji Mfawidhi Mahakama Kuu, Kanda ya Musoma Mhe. Frank Mahimbali akifungua mafunzo ya huduma kwa wateja kwa watumishi wa Mahakama za Wilaya za Butiama na Rorya mkoani Mara pamoja na Mahakama za Wilaya Mkoa wa Simiyu za Busega na Itilima leo Jumatatu, Desemba 19, 2022, yanayofanyika Mahakama Kuu ya Tanzania, Kanda ya Musoma.

Meza Kuu ikiwa kwenye picha ya pamoja na washiriki wa mafunzo ya huduma kwa wateja kwa watumishi wa Mahakama za Wilaya ya Butiama na Rorya mkoani Mara pamoja na Mahakama za Wilaya Mkoa wa Simiyu za Busega na Itilima

Msajili wa Mahakama Kuu ya Tanzania, Mhe. Sharmillah Sarwatt akifafanua jambo wakati wa ufunguzi wa mafunzo hayo.

Meza Kuu ikiwa kwenye picha ya pamoja na sehemu ya washiriki wa mafunzo hayo.

Mkurugenzi Msaidizi wa Kitengo cha Mafunzo kutoka Mahakama ya Tanzania, Patricia Ngungulu akitolea ufafanuzi mambo muhimu katika mafunzo hayo. 

Meza Kuu ikiwa kwenye picha ya pamoja na sehemu ya washiriki wa mafunzo hayo.

Sehemu ya washiriki wa mafunzo hayo wakiendelea kupata mada kutoka kwa Wakufunzi wa mafunzo hayo.

Sehemu ya washiriki wa mafunzo hayo ya huduma kwa mteja wakifuatilia mada.

Sehemu ya washiriki wa mafunzo hayo ya huduma kwa mteja wakifuatilia mada.

Sehemu ya Meza Kuu ikiwa inafuatilia uzinduzi wa mafunzo ya huduma kwa mteja kwa watumishi wa Mahakama.

Picha na Mwandishi wetu.