MTANGULIZENI MUNGU KAZINI: JAJI NGIGWANA

Na Faustine Kapama-Mahakama, Bukoba

Mafunzo ya huduma bora kwa mteja yaliyokuwa yanatolewa kwa watumishi wa Mahakama mpya za Wilaya za Kyerwa, Misenyi, Nyangh’wale na Mbogwe yamehitimishwa leo tarehe 16 Disemba, 2022, huku Jaji wa Mahakama Kuu ya Tanzania, Kanda ya Bukoba, Mhe.  Emmanuel Ngigwana, akiwataka kutoa huduma bora kwa wananchi ili kuifanya Mahakama ya Tanzania kufikia malengo ambayo imejiwekea ya kutoa haki sawa kwa wote na kwa wakati.

Akizungumza wakati wa kufunga mafunzo hayo ya siku tano yaliyoanza tarehe 12 Disemba, 2022 katika Kituo cha Bukoba, Mhe. Ngigwana aliwasihi washiriki hao kuzingatia mambo matatu muhimu wanapotekeleza majukumu yao, ikiwemo kumtanguliza Mungu, kuzingatia maadili kazini na kuwa na bidii ya kazi.

“Ukimtanguliza Mungu utakuwa na hofu ya Mungu na utafanya ukijua kwamba kuna siku ukiwa Hakimu au mtu mwingine yoyote utasimama kutoa hesabu ya kazi uliyofanya duniani. Hivyo sisi tuchague kuwa na Mungu na tutende mema,” alisisitiza.

Jaji huyo pia aliwaasa kuzingatia maadili ya kazi kwa kuepuka kufanya mambo ambayo yanaweza kuleta doa au kusababisha maadili yao kuwekewa maswali, ikiwemo kujihusisha na vitendo vya rushwa. Amewakumbusha kuwa wao ni kioo cha jamii, hivyo wanapaswa kuwahudumia wananchi kwa kutumia lugha nzuri na bila kinyongo chochote.

Kadhalika, Mhe. Ngigwana amewasihi kufanya kazi kwa ushirikiano ili waweze kufanya kazi kama timu moja ili kutimiza malengo yaliyokusudiwa. Amesema kuwa wasifanye kazi kwa kukumbushwa na viongozi wao, bali wajitume kwa kile wanachotakiwa kufanya.

Mhe. Ngigwana amewasihi watumishi hao kuyatafsiri mafunzo waliyoyapata kwa vitendo ili kuleta mabadiliko chanya katika Mahakama kwa kuwahudumia wananchi. “Tuepuke utendaji wa kimazoea ambao tulikotoka ulileta taswira ya kulalamikiwa na wateja,” alisisitiza.

Alitumie fursa hiyo kuishukuru Serikali na Mahakama kwa ujumla kwa kuendelea kuwajengea uwezo watumishi wa Mahakama ili uboreshaji wa huduma unaoendelea katika miundombinu ufanyike pia katika kuwabadilisha watumishi kimtazamo, kifikra na kiutendaji.

“Tunatamani sana waandaaji wa mafunzo haya yasiishie kwa watumishi wa Mahakama mpya tu, bali pia yaendelee hata kwa watumishi wote kadiri mtakayopata fedha,” Mhe. Ngigwana alisema.

Wakati wa kumkaribisha Jaji Ngigwana kuzungumza na watumishi hao, Naibu Msajili wa Mahakama Kuu, Kanda ya Bukoba, Mhe. Amworo Odira aliwaeleza kuwa mafunzo waliyoyapata ni sawa na kupanda mbegu ambayo baadaye huzaa matunda, hivyo ni matumaini yake na ya Mahakama kwa ujumla kuwa wataenda kuwatumikia Watanzania kwa ubora ili kukithi matarajio yanayokusudiwa.

Naye Hakimu Mkazi Mfawidhi wa Mahakama ya Wilaya Missenyi, Mhe. Yohana Myombo, akizungumza kwa niaba ya washiriki wenzake ameishukuru Mahakama ya Tanzania kwa fursa hiyo ya mafunzo waliyopata. Amewaomba washiriki wenzake kuitumia elimu waliyoipata katika kutoa huduma bora kwa wananchi.

Katika kipindi hicho cha siku tano, watumishi hao walipitishwa kwenye mada mbalimbali, ikiwemo Maadili na Kanuni za Maadili katika Mahakama; Huduma kwa Mteja; Wajibu na Majukumu ya Mahakama za Wilaya; Utamaduni wa Mahakama; Utii na Uvumilivu katika Mahala pa Kazi; Mabadiliko maeneo ya Kazi na Uboreshaji wa Huduma za Mahakama.

Mada zingine ni Matumizi ya Vifaa vya Teknolojia ya Habari na Mawasiliano; Utunzaji wa siri; Uelewa wa Mpango Mkakati wa Mahakama; Upatikanaji wa Haki na Uaminifu kwa Umma; Usimamizi Bora wa Mfumo wa Uendeshaji na Usajili wa Mashauri na Namna ya kukabiliana na msongo wa mawazo na hasira.

Mada hizo ziliwasilishwa na wawezeshaji wabobezi katika maeneo hayo, akiwemo Msajili wa Mahakama Kuu ya Tanzania, Mhe. Sharmillah Sarwatt, Mkurugenzi wa Usimamizi wa Mashauri wa Mahakama ya Tanzania, Mhe. Desdery Kamugisha, Mkurugenzi wa Kumbukumbu na Nyaraka wa Mahakama ya Tanzania, Bw. Malimo Manyambula, Mkurugenzi Msaidizi Bajeti na Mipango katika Kurugenzi ya Mipango na Ufuatiliaji, Bi. Gladys Qambaita na Mkuu wa Kitengo cha Ujenzi cha Mahakama ya Tanzania, Mhandisi Yohana Mashausi.

Mahakama ya Tanzania imeandaa mafunzo ya huduma kwa wateja ya siku 20 kwa watumishi watakaohudumu katika Mahakama mpya za Wilaya 18 zilizojengwa kwa ufadhili wa Benki ya Dunia na kuzinduliwa na Jaji Mkuu wa Tanzania, Mhe. Prof. Ibrahim Hamis Juma tarehe 25 Novemba, 2022.

Mafunzo hayo ambayo yatatolewa kwenye vituo vya Morogoro, Kigoma, Bukoba na Musoma yanalenga kuwaandaa na kuwapatia ujuzi watumishi hao ili watoe huduma bora kwa wananchi zinazoendana na uzuri wa majengo. Tayari mafunzo hayo yameshatolewa kwenye Vituo vya Morogoro, Kigoma na Bukoba. Kituo kitakachofuata ni Musoma.

Jaji wa Mahakama Kuu ya Tanzania, Kanda ya Bukoba, Mhe.  Emmanuel Ngigwana akisisitiza jambo alipokuwa anafunga mafunzo ya siku tano yaliyokuwa yanatolewa kwa watumishi wa Mahakama mpya za Wilaya za Kyerwa, Misenyi, Nyangh’wale na Mbogwe kwenye Kituo cha Bukoba.

Naibu Msajili wa Mahakama Kuu, Kanda ya Bukoba, Mhe. Amworo Odira akieleza jambo katika hafla fupi ya kufunga mafunzo hayo.

Mtendaji wa Mahakama Kuu, Kanda ya Bukoba, Bw. Lothan Simkoko akitoa neno la shukrani kwa mafunzo hayo kufanyika katika Kituo cha Bukoba.

Hakimu Mkazi Mfawidhi wa Mahakama ya Wilaya Missenyi, Mhe. Yohana Myombo akitoa shukrani kwa niaba ya washiriki wenzake wa mafunzo.

Jaji wa Mahakama Kuu ya Tanzania, Kanda ya Bukoba, Mhe.  Emmanuel Ngigwana akimkabidhi Hakimu Mkazi Mfawidhi wa Mahakama ya Wilaya Mbogwe, Mhe. Dirame Moshi cheti chake cha ushiriki wa mafunzo hayo.

Sehemu ya washiriki wa mafunzo hayo (juu na chini) ikifuatilia hotuba ya Jaji wa Mahakama Kuu ya Tanzania, Kanda ya Bukoba, Mhe.  Emmanuel Ngigwana (hayupo kwenye picha) alipokuwa anafunga mafunzo hayo.

Sehemu nyingine ya washiriki wa mafunzo hayo (juu na chini) ikifuatilia hotuba ya Jaji wa Mahakama Kuu ya Tanzania, Kanda ya Bukoba, Mhe.  Emmanuel Ngigwana (hayupo kwenye picha) alipokuwa anafunga mafunzo hayo.