TANZIA; HAKIMU MAHAKAMA YA MWANZO KOLEKERO-BUKOBA AFARIKI DUNIA

 TANZIA

Mhe. Tumaini John Kiyeyeu enzi za uhai wake.

Mahakama ya Tanzania inasikitika kutangaza kifo cha Mtumishi wake aliyekuwa Hakimu Mkazi Daraja la I wa Mahakama ya Mwanzo Kolekero Manispaa ya Bukoba mkoani Kagera, Mhe. Tumaini John Kiyeyeu.

Kwa mujibu wa Mtendaji wa Mahakama Kuu-Kanda ya Bukoba, Bw. Lothan Simkoko, marehemu Kiyeyeu alifikwa na umauti yeye pamoja na mumewe tarehe 06 Desemba, 2022 kufuatia ajali ya gari aina ya basi la kampuni ya 'Happy Nation' linalofanya safari zake kati ya Bukoba na Dar- es -Salaam na pikipiki ambayo alikuwa amepanda na marehemu mumewe ambapo wote wawili walifariki dunia papo hapo.

Bw. Simkoko amesema kuwa, marehemu Tumaini ameacha watoto watatu (3) Marie miaka 15, Junior -miaka nane (8) na Michelle mwaka mmoja (1) na miezi 7.

Mahakama alizowahi kufanya kazi ni pamoja na; Mahakama ya Mwanzo Katoma, Mahakama ya Mwanzo Karabagaine na mpaka umauti umemkuta alikuwa Mahakama ya Mwanzo Kolekero.

Kwa mujibu wa Mtendaji huyo, mwili wa marehemu unatarajiwa kusafirishwa leo tarehe 08 Desemba, 2022 kwenda mkoani Mbeya kwa ajili ya  mazishi.

Mahakama ya Tanzania inaungana na ndugu, jamaa na marafiki kuomboleza katika kipindi hiki kigumu cha kuondokewa na mpendwa wetu.

BWANA AMETOA NA BWANA AMETWAA, JINA LAKE LIHIMIDIWE.