JAJI KIONGOZI ASEMA MAHAKAMA IMEJIWEKEA UKOMO WA USIKILIZAJI MASHAURI

Na Tiganya Vincent-Mahakama-Katavi

Jaji Kiongozi wa Mahakama Kuu ya Tanzania, Mhe. Mustapher Siyani amesema ili kutekeleza Dira ya Mahakama ya utoaji haki kwa wakati, Mahakama ya Tanzania ilijiwekea viwango vya muda wa usikilizaji na umalizaji wa mashauri katika ngazi zote za Mahakama ili kuhakikisha wananchi wanapata haki zao kwa wakati.

Mhe. Siyani ametoa kauli hiyo leo tarehe 18 Januari, 2023 katika Viwanja vya Mahakama ya Hakimu Mkazi Katavi wakati wa hafla fupi ya uzinduzi wa majengo mapya ya Mahakama ya Hakimu Mkazi Katavi, Songwe na Lindi.

Alisema kwa Mahakama Kuu, muda wa kusikiliza mashauri haupaswi kuzidi miezi 24, Mahakama za Hakimu Mkazi na Mahakama ya Wilaya ukomo wa muda wa kusikiliza mashauri yanayofunguliwa haupaswi kuzidi miezi 12 na Mahakama za Mwanzo ni miezi sita.

Jaji Kiongoziu alisema kuwa pamoja kujipangia muda huo, kasi ya usikilizaji wa mashauri imekuwa ikiongezeka mwaka hata mwaka ambapo msukumo mkubwa umewekwa pia kwenye matumizi ya Teknolojia ya Habari na Mawasiliano (TEHAMA) katika usikilizaji wa mashauri.

“Ni matumaini yangu kuwa Mahakama nilizozindua leo zitazingatia ipasavyo miongozo yote inayohusu muda wa usikilizaji wa mashauri na kuwezesha wateja kupata haki kwa wakati” aliagiza.

Aidha, Mhe. Siyani alisema kwa kuzingatia mafanikio yaliyopatikana kwenye eneo hilo, viwango hivyo vya ukomo wa muda wa usikilizaji mashauri kuwepo mahakamani vilivyowekwa takribani miaka kumi iliyopita, sasa vimepitwa na wakati.

“Ninajua kwamba ziko Mahakama mbalimbali nchini na hasa Mahakama za Mwanzo ambazo zimeshusha ukomo huu wa muda hadi miezi mitatu. Aidha, Kanda nyingi za Mahakama Kuu nchini nazo tayari zimeanza kujitangaza kutokuwa na mashauri ya muda mrefu. Bila shaka huu ni wakati muafaka sasa kwa Mahakama kujitathmini upya ili kuona kama viwango hivyo bado vinaendana na dira yake ya kutoa haki kwa wakati,” alisisitiza.

Akizungumza katika hafla hiyo, Mtendaji Mkuu wa Mahakama ya Tanzania, Prof. Elisante Ole Gabriel amesema miradi mitatu hiyo imegharimu zaidi ya bilioni mbili hadi kukamilika na imeshaanza kutoa huduma kwa wananchi katika maeneo husika.

Naye Naibu Waziri wa Katiba na Sheria, Mhe Geofrey Pinda amesema Mahakama ya Tanzania imeboresha huduma mbalimbali na kupunguza malalamiko kwa wananchi, hivyo serikali itaendelea kuboresha miundombinu yake ikiwemo ujenzi wa Mahakama za mwanzo katika tarafa ambazo hazina Mahakama za Mwanzo ili kuboresha utoaji wa huduma kwa wananchi.

Jaji Kiongozi wa Mahakama Kuu ya Tanzania, Mhe. Mustapher Siyani akizungumza katika hafla ya kuzindua Mahakama za Hakimu Mkazi Katavi, Lindi na Songwe.

Jaji Kiongozi wa Mahakama Kuu ya Tanzania, Mhe. Mustapher Siyani akifunua pazia kuashiria uzinduzi wa Mahakama hizo.

Jaji Mfawidhi wa Mahakama Kuu ya Tanzania, Kanda ya Sumbawanga, Mhe. Dustan Ndunguru akizungumza katika hafla hiyo.

Jaji Kiongozi wa Mahakama Kuu ya Tanzania, Mhe. Mustapher Siyani akiwasili katika viwanja vya Mahakama ya Hakimu Mkazi Katavi kwa ajili ya uzinduzi wa Mahakama hizo tatu.