SPIKA WA BUNGE : TUKO TAYARI KUBADILI SHERIA ZENYE CHANGAMOTO YA KIJINSIA

 

Na Magreth Kinabo –Mahakama Tanga

Spika wa Bunge la Jamhuri ya Muungano wa Tanzania, Mhe. Dkt. Tulia Ackson amesema kwamba Bunge liko tayari kubadili sheria zinazoleta changamoto  katika mashauri yanayohusu ukatili wa kijinsia hususan kwa wanawake ,watoto na watu wenyeulemavu.

 Akizungumza katika mkutano wa siku mbili wa Chama cha Majaji na Mahakimu Wanawake   Tanzania (TAWJA) ambapo alikuwa mgeni rasmi kwa niaba ya Rais wa Jamhuri wa Muungano wa Tanzania, Mhe. Dkt. Samia Suluhu Hassan unaofanyika kwenye hoteli ya New Tanga Beach Resort alikishauri chama hicho kuangalia namna ya kutoa haki kwa makaundi hayo.

“Utakuta mtoto amefanyiwa kitendo cha ukatili wa kijinsia na mtuhumiwa amekamatwa baada ya sisikujiridhisha, halafu anaachiwa sasa tunajiuliza kama mtuhumiwa ameachiwa nani ametenda kitendo hicho na mtoto na ameathirika, lakini hatuambiwi nani ametenda kosa hilo. Kama sheria zinazotumika ni changamoto sisi tuko tayari kubadilisha, ili haki iweze kutendeka,” alisema Spika Tulia.

Aliongeza kwamba  kuwa ni  lazima  jamii ikapewa elimu kuhusu uendeshaji wa mashauri yanayohusu makundi hayo ili   iwe salama nayi pia muwe salama na kila mtu awe na  amani katika uendeshaji wa mashauri hayo.

Spika Tulia alisema kuwa wanachama wa TAWJA wanapotaoa hukumu anu maamuzi ya ukatili wa kijinsia watoe haki inayozingatia usawa na wakati ili mtu asione kuwa ametendewa haki kwa kutokana umasikini , mwanamke, mtoto au ni mtu mwenye ulemavu.

“Mafanikio yenu hayapimwi kwa kuzingatia hukumu au maamuzi yaliyoandikwa, idadi ya vikao vya maamuzi na idadi ya mizozo, bali yanapimwa kwa namna gani  tafsiri  ya hukumu au maamuzi hayo yanatoa nafasi kwa jamii kuweza kuondokana na ubaguzi na ukatili wa kijinsia,“ hivyo ni wakati wa wao kusimama imara   na kutekeleza majukumu yao ,”alisisitiza.

Aidha Spika huyo alisema kuwa wanachama 20 waliopatiwa mafunzo kuhusu suala hilo la namna ya kuendesha mashauri ya ukatili wa kijinsia wayatumie, kuboresha utendaji kazi, huku akisisitiza kwamba ni vizuri wanachama wanaopatiwa mafunzo wangalie kuwa mtu ana mchango gani au anatetea nini.

Aliwataka wanachama hao, kutumia wakati huo muhimu kwenye mkutano huo kujadili kuhusu Mpango Mkakati wa mwaka 2023 na kuchagua viongozi wenye sifa ya kukipeleka mbele chama hicho na kutekeleza malengo yake.

Aliwaasa kuendelea kuwa na maadili mema ili kuweza kuendelea kujenga heshima na kujenga Imani kwa wananchi.

Kwa upande wake Jaji Mkuu wa Tanzania, Mhe.Prof Ibrahim Hamis Juma alisema ni lazima uongozi wa TAWJA uweke utaratibu wa kuweka kumbukumbu na kutangaza mafanikio yanayotokana na kazi mbalimbali zinazofanywa na wanachama, ikiwemo michango mingi  ya kujitolea ambayo wanachama wameitoa.

Jaji Mkuu  huyo alitoa takwimu za mhimili huo  za Desemba 31,mwaka jana ambazo zinaonyesha uwepo wa wanachama wa TAWJA kila kona ya Mahakama, akianzia idadi ya Majaji wa Mahakama ya Rufani kuwa ni 26 ambapo kati ya hao wanaume ni 16  sawa na asilimia 62 na wanawake ni 10 sawa na asilimia 62. Idadi ya Mahakama Kuu ni 97, Majaji wanaume ni 62 sawa na asilimia 64 na wanawake ni 35 sawa na asilimia 36.

 Aliongeza kuwa idadi ya Majaji Wafawidhi ni 24, wanaume ni 16 sawa na asilimia 67 na wanawake ni nane sawa na asilimia 33. Wasajili ni watatu, wanaume ni wawili sawa na asilimia 67 na wanawake ni mmoja sawa na asilimia 33, Naibu Wasajili ni 53, wanaume ni 33 sawa na asilimia 62, wanawake ni 20 sawa na asilimia 38. Idadi Ya Mahakimu Wakazi Mahakama za Mahakama za Hakimu Mkazi ni 69, wanaume ni 38 sawa na asilimia 55 na wanawake ni 31 sawa na  asimilia 45.  

Idadi ya Mahakimu Wakazi Wafawidhi wa Mahakama za Hakimu Mkazi ni 28. Idadi ya Mahakimu Wakazi wa Mahakama za Wilaya ni 284 ,wanaume ni 141 sawa na asilimia 50 na wanawake ni 143 sawa na asilimia 59. Idadi ya Mahakimu wakazi wa Mahakama za Wilaya ni 135, wanaume ni 76 sawa na asilimia 56 na wanawake ni 59 sawa na asilimia 44. Mahakimu wa Mahakama za Mwanzo ni 875, wanaume ni 408 sawa na asilimia 47 na wanawake ni 467 sawa na asilimia 53, wengine  Mahakimu Wafawidhi wa Mahakama za Mwanzo ni 577, wanaume ni 329 na wanawake ni 248.

“Ni muhimu zaidi kwa kila mwanachama atatumiaje uwepo wake kwa uchache wenu  katika kutatua usawa wa kijinsia na uwezeshwaji wa wanawake ili nao wafaidiMaendeleo Endelevu na wafurahie Haki za Binadamu,”alisisitiza  Jaji Mkuu huku akiwashauri kuendelea kujifunz na kufanya tafiti.

Mkutano huo pia ulihudhuriwa na Jaji Mkuu wa Zanzibar, Mhe. Khamis Ramadhani Abdalla,ambaye alisema ataendele kuwa na ushirikiano na chama hicho na kuongeza  kwamba Zanzibar ina Majaji 12 kati yao wanne ni wanawake na Mahakimu  64 , ambapo wanawake ni 23.

Mkuu wa Mkoa wa Tanga, Mhe. Omary Mgumba aliomba vyombo vya usafiri vinavyokamatwa katika biashara haramu vishikiliwa, akiwemo mtuhumiwa hadi kesi itakapoisha.

Naye Mwenyekiti ws Chama   cha TAWJA ambaye pia ni Jaji Mstaafu wa Mahakama Kuu ya Tanzania, Mhe. Joaquine De Mello alisema chama hicho ina wanachama 300.

Spika wa Bunge la Jamhuri ya Muungano wa Tanzania, Mhe. Dkt. Tulia Ackson, akitoa  hotuba ya ufunzi wa mkutano wa siku mbili wa Chama cha Majaji na Mahakimu Wanawake Tanzania (TAWJA) unaofanyika katika hoteli ya New Tanga Beach Resort.

 Jaji Mkuu wa Tanzania, Mhe. Ibrahim Hamis Juma akitoa hotuba yake katika mkutano huo.

Jaji Mkuu wa Zanzibar, Mhe. Khamis Ramadhani Abdalla akizungumza jambo katika mkutano huo.

Mwenyekiti wa Chama   cha TAWJA ambaye pia ni Jaji Mstaafu wa Mahakama Kuu ya Tanzania, Mhe. Joaquine De Mello  akizungumza jambo kwenye mkutano huo.

 Baadhi ya washiriki  wakiwa katika mkutano huo.

 Baadhi ya washiriki  wakiwa katika mkutano huo.

  Mkuu wa Mkoa wa Tanga, Mhe. Omary Mgumba akizungumza jambo.

Spika wa Bunge la Jamhuri ya Muungano wa Tanzania, Mhe. Dkt. Tulia Ackson, (katikati) akiwa katika picha ya pamoja na baadhi ya washiriki katika mkutano huo.  Wa pili kulia ni Jaji Mkuu wa Tanzania, Mhe. Ibrahim Hamis Juma  wa kwa pili  (kulia) na wa kwanza (kushoto) ni ni Jaji Mkuu wa Zanzibar, Mhe. Khamis Ramadhani Abdalla, wa pili kulia ni Mwenyekiti wa Chama   cha TAWJA ambaye pia ni Jaji Mstaafu wa Mahakama Kuu ya Tanzania, Mhe. Joaquine De Mello na wa kwanza (kushoto) ni  Mkuu wa Mkoa wa Tanga, Mhe. Omary Mgumba.

Mtendaji wa Mahakama ya Tanzania, Prof. Elisante Ole Gabriel akiwasilisha mada katika mkutano huo.

 

Meza kuu ikisikiliza mada.

Jaji Mstaafu wa Mahakama Kuu ya Tanzania, Mhe. Sophia Wambura akisisitiza jambo.

Jaji wa Mahakama Kuu ya Tanzania, Mhe. Leila Mgonja, akichangia hoja.

Hakimu Mkazi wa Mahakama ya Mwanjelwa Mbeya, Mhe. Angela  Byera akichangia hoja katika mkutano huo.

(Picha na Magreth Kinabo - Mahakama)

da

.