JAJI KIONGOZI KUZINDUA MAHAKAMA ZA HAKIMU MKAZI TATU

Na Tiganya Vincent-Mahakama –Katavi

Jaji Kiongozi wa Mahakama Kuu ya Tanzania, Mhe. Mustapher Siyani tarehe 18 Januari 2023 atakuwa mgeni rasmi katika hafla za uzinduzi wa majengo matatu ya Mahakama za Hakimu Mkazi.

Uzinduzi huo utafanyika katika viwanja vya jengo jipya la Mahakama ya Hakimu Mkazi Katavi. Majengo yatakayozinduliwa siku hiyo ni Mahakama ya Hakimu Mkazi Katavi, Lindi na Songwe ambayo yamejengwa kwa kutumia fedha za ndani. Ni mwendelezo wa uzinduzi wa miradi ya majengo ya Mahakama yanayozinduliwa katika maeneo mbalimbali hapa nchini.

Kukamilika kwa ujenzi wa miradi hiyo katika mikoa tofauti hapa nchini umezingatia mahitaji ya kisasa kwa wadau wa mnyororo wa utoaji haki ambapo kuna ofisi za Mawakili, Maafisa Magereza, Ustawi wa Jamii ambapo maeneo kwa ajili ya watu wenye mahitaji maalum na watoto wamewekewa vyumba vya kutumia wakiwa mahakamani.

Kuzinduliwa kwa majengo hayo katika Mikoa hiyo mitatu kutaongeza ufanisi na utoaji huduma kwa wananchi kwani majengo hayo yana mazingira rafiki ya utoaji wa huduma kwa wananchi kwa kutumia mfumo wa Teknolojia ya Habari na Mawasiliano (TEHAMA).

Hafla ya uzinduzi inatarajiwa kuanza saa 3 asubuhi na itahudhuriwa na Viongozi Waandamizi mbalimbali wa Mahakama, Serikali na Bunge. Wananchi wa Mkoa wa Katavi, Lindi, Songwe na Mikoa mingine wanaalikwa kufuatilia matangazo ya moja kwa moja ya tukio hilo yatakayorushwa kupitia  vituo vya 'Channel Ten' na ITV.

Jaji Kiongozi wa Mahakama Kuu ya Tanzania, Mhe. Mustapher Siyani.