JUDICIARY OF TANZANIA: JAJI KIONGOZI AWATAKA WATUMISHI KUSHINDANA KUTOA HUDUMA BORA KAMA SEKTA BINAFSI

Na Tiganya Vincent-Mahakama -Manyoni

Jaji Kiongozi wa Mahakama Kuu ya Tanzania, Mhe. Mustapher Siyani amewataka Watumishi wa Mahakama kufanya kazi kwa ushindani kama ilivyo kwenye sekta binafsi wakati wa utoaji wa huduma bora kwa wananchi.

Ameyasema hayo leo tarehe 30 Januari 2023 wakati wa hafla ya uzinduzi wa Mahakama za Bunda, Kilindi, Sikonge, Manyoni na Rugwe iliyofanyika katika viwanja vya Mahakama ya Wilaya Manyoni.

“Ni lazima sasa hivi, kama Mahakama inataka kujenga imani kwa wananchi watumishi wake washindane na sekta binafsi kwa utoaji wa huduma bora. Watumishi wa Mahakama hawapaswi kujisifu kwa majengo mazuri yanayoanza kuonekana sasa hivi kote nchini, bali wanapaswa kujisifu kwa kutoa huduma bora,” amesema.

Amewahimiza watumishi katika majengo hayo mazuri kuwatumikia wananchi kwa kuzingatia uzalendo na weledi wakati wanapotoa huduma.

“Watumishi wanapaswa kujisifu kwa kutoa huduma bora kwa wananchi na hawapaswi kujisifu kwa kuwa na majengo bora,” amesema na kuongeza kuwa watumishi wanatakiwa kuwa kitovu cha utoaji wa huduma bora kwa umma,” amesisitiza.

Mhe. Siyani amewataka watumishi wa Mahakama kutobweteka kwa kuona majengo mazuri bali wasaidie katika kujenga imani kwa wananchi ili waweze kuondokana na fikra ya changamoto walizokutana nazo siku za nyuma.

Ameongeza kuwa, ni vema wakahakikisha wanaokwenda mahakamani kutafuta haki, wanapata haki kwa haraka, katika mazingira yasiyo na urasimu wala harufu ya upendeleo ikiwa ni pamoja na wadaawa kuamini kuwa mchakato mzima wa usikilizwaji wa mashauri umefuata sheria zilizopo, kanuni na taratibu.

Mhe. Siyani amesema kwa watumishi wa Mahakama, kazi kubwa iliyo mbele yao baada ya kujengewa majengo hayo mazuri na ya kisasa, ni kuwahudumia wananchi hata wakishindwa waamini kuwa wameshindwa kwa haki.

Amesema hilo linawezekana ikiwa kila mmoja wao atakuwepo sehemu yake ya kazi kwa saa zote za kazi, atafungua uso wake na atatoa huduma bila kunung’unika wala kuonyesha kutaka chochote cha ziada kutoka kwa wadaawa.

Aidha Jaji Kiongozi huyo aliwaomba wadau wanaofanya kazi katika majengo ya Mahakama nao kuweka kipaumbele katika utoaji huduma bora kwani wananchi hawatatofautisha kazi za watumishi wa Mahakama na wafanyakazi waliopo katika majengo hayo.

“Kwa hiyo kwa wadau wetu naamini yapo mazuri mtakayojifunza kwa kuchangamana na watumishi wa Mahakama katika jengo moja. Rai yangu kwenu ni kuwa igeni mazuri ya Mahakama na inapobidi basi saidieni kufichua maovu kwa nia ya kujenga lakini na ninyi wenyewe muwe vinara na mabalozi wazuri wa haki,” amesema.

Amesema majengo mapya yamezinduliwa, lazima yawe kitovu cha utoaji huduma bora kwa wananchi na kwamba hudumu zilizokusudiwa zitatolewa kwa weledi, uadilifu na wanataka mabadiliko kwa mashauri yao kusikilizwa na haki kutolewa kwa haraka.

Mhe. Siyani ameongeza kuwa wananchi wanataka mazingira yanayozunguka mfumo wa kutolea haki yawe rafiki, yasiyogubikwa na urasimu wala harufu ya rushwa.

Jaji Kiongozi wa Mahakama Kuu ya Tanzania, Mhe. Mustapher Siyani (katikati) akikata utepe kuashiria uzinduzi rasmi wa jengo la Mahakama ya Wilaya Manyoni na Majengo mengine manne mapya ya Mahakama za Wilaya za Kilindi, Bunda, Rungwe na Sikonge leo tarehe 30 Januari, 2023. Pamoja nae ni Viongozi mbalimbali wa Mahakama na Serikali walioshiriki katika hafla ya uzinduzi wa Mahakama hizo. Wa pili kulia ni Jaji Mfawidhi wa Mahakama Kuu ya Tanzania, Kanda ya Dodoma, Mhe. Gerson Mdemu, wa kwanza kushoto ni Mkuu wa Mkoa wa Singida, Mhe. Peter Serukamba, wa tatu kushoto ni Mtendaji Mkuu wa Mahakama ya Tanzania, Prof. Elisante Ole Gabriel na wengine.

Jaji Kiongozi wa Mahakama Kuu ya Tanzania, Mhe. Mustapher Siyani akizungumza na Watumishi wa Mahakama, wageni waalikwa na wananchi (hawapo katika picha) waliohudhuria katika hafla ya uzinduzi wa Mahakama ya Wilaya Manyoni na Mahakama nyingine nne.

Katika picha ni sehemu ya Watumishi wa Mahakama, Wageni waalikwa pamoja na wananchi waliohudhuria katika hafla ya uzinduzi wa Mahakama ya Wilaya Manyoni wakimsikiliza Jaji Kiongozi wa Mahakama Kuu ya Tanzania, Mhe. Mustapher Mohamed Siyani (hayupo katika picha).

Jaji Mfawidhi wa Mahakama Kuu ya Tanzania Kanda ya Dodoma, Mhe. Gerson Mdemu akitoa neno la utangulizi kabla ya kumkaribisha Mgeni Rasmi Jaji Kiongozi wa Mahakama Kuu ya Tanzania, Mhe. Mustapher Siyani kwa ajili ya kutoa hotuba ya uzinduzi wa Mahakama za Wilaya za Manyoni, Bunda, Rungwe, Kilindi na Sikonge.

Mkuu wa Mkoa wa Singida, Mhe. Peter Serukamba akitoa neno wakati wa hafla ya uzinduzi wa Mahakama za Wilaya za anyoni, Bunda, Rungwe, Kilindi na Sikonge.

Kwaya ya Mahakama ikitumbuiza katika hafla ya uzinduzi wa Mahakama tajwa za Wilaya.

Jaji Kiongozi wa Mahakama Kuu ya Tanzania, Mhe. Mustapher Siyani (kulia) akipata maelezo ya jengo jipya la Mahakama ya Wilaya Manyoni kutoka kwa Mhandisi-Ujenzi kutoka Kitengo cha Usimamizi wa Majengo-Mahakama ya Tanzania, Mhandisi Fabian Kwagilwa (kushoto) kabla ya kulikagua jengo.

Jaji Kiongozi mstaafu wa Mahakama Kuu ya Tanzania, Mhe. Fakih Jundu akizungumza wakati wa hafla ya uzinduzi wa Mahakama mpya za Wilaya nne.

Naibu Waziri wa Katiba na Sheria, Mhe. Geofrey Pinda akizungumza wakati wa hafla ya uzinduzi wa Mahakama mpya za Wilaya nne iliyofanyika katika viwanja vya Mahakama mpya ya Wilaya Manyoni.